ތެލުލައިގެން ތައްޔާރުކުރާ ފްރެންޗް ފްރައިޒް އަވަހަށް ކްރިސްޕީކޮށް (ކުރަންޗީކޮށް) ތައްޔާރުކުރެވޭނެ އަދި އެއަށް އެތެރެވާ ތެލުގެ މިންވަރު ނުހަނު ބޮޑަށް ކުޑަކޮށްދޭނެ އާ ކައްކާ ގޮތެއް ސައިންސްވެރިން ހޯދައިފިއެވެ. އެމެރިކާގެ ޔުނިވަސިޓީ އޮފް އިލިނޯއީގެ ރިސާޗަރުން ހުށަހަޅުއްވަނީ މައިކްރޯވޭވް އަދި އާދައިގެ ތެލުލުމުގެ ގޮތް އެއްކޮށްލައިގެން ފްރެންޗް ފްރައިޒް ތައްޔާރުކުރުމަށެވެ. މިއީ ސިއްހަތަށް ފައިދާހުރި ގޮތެއްގައި މިފަދަ ކާނާ ތައްޔާރުކުރުމަށް ލިބުނު ބޮޑު ކުރިއެރުމެކެވެ.
މި އާ ނިޒާމުގައި މައިކްރޯވޭވް ބޭނުންކުރެވެނީ ފްރެންޗް ފްރައިޒްގެ ތެރެއަށް ތެޔޮ ވަނުން ހުއްޓުވައިދިނުމަށެވެ. މައިކްރޯވޭވްގެ ހޫނުން އާވި އުފެދި، އޭގެ ސަބަބުން ތެޔޮ އެތެރެވިޔަނުދީ ހިފަހައްޓައިދެއެވެ. އޭގެ ފަހުން އާދައިގެ ގޮތަށް ތެލުލުމުން، މީހުން ގަޔާވާ ފަދަ މުރަނަކަމާއި (ކުރަންޗީކަން) ރަހަ ފްރެންޗް ފްރައިޒްއަށް ލިބިގެންދެއެވެ. މީގެ ސަބަބުން ކެއުމުގެ މީރުކަމަށް އެއްވެސް އުނިކަމެއް ނުލިބި ތެލުގެ މިންވަރު މަދުކުރެވެއެވެ.
ގިނަ އަދަދަކަށް ތެޔޮ އެކުލެވޭ ކާނާ ކެއުމަކީ ހިތުގެ ބަލިތަކާއި، ފަލަވުމާއި، އަދި ސިއްހީ ގިނަ މައްސަލަތަކާ ގުޅިފައިވާ ކަމެކެވެ. އެހެންކަމުން، ކާނާގައި ހިމެނޭ ތެލުގެ މިންވަރު މަދުކުރުމަކީ އާންމު ސިއްހަތު ރަނގަޅުކުރުމަށް އެޅޭނެ މުހިންމު ފިޔަވަޅެކެވެ. މި އާ ހޯދުމުގެ ސަބަބުން، ތެލުލި ކާނާއަށް ލޯބިކުރާ ފަރާތްތަކަށް ސިއްހީ ގޮތުން ނުރައްކާ ކުޑަ، ރައްކާތެރި ގޮތެއްގައި ފްރެންޗް ފްރައިޒް ބޭނުންކުރުމުގެ ފުރުސަތު ހުޅުވިގެންދާނެއެވެ.
މި ދިރާސާއަކީ ކާނާ ތައްޔާރުކުރާ އުފެއްދުންތެރިންނަށާއި ގޭގޭގައި ކައްކާ މީހުންނަށްވެސް ވަރަށް ފައިދާހުރި ހޯދުމެކެވެ. މި ނިޒާމު އާންމުކޮށް ބޭނުންކުރަން ފެށުމުން، ތެލުލައިގެން ތައްޔާރުކުރާ ތަފާތު އެކި ބާވަތްތަކުގެ ކާނާ މައިކްރޯވޭވް އެހީގައި ސިއްހަތަށް މާ ފައިދާހުރި ގޮތެއްގައި އުފެއްދުމުގެ ފުރުސަތު ބޮޑުވެގެންދާނެއެވެ. މިއީ ތެލުލި ކާނާގެ ސިނާއަތަށް އަންނާނެ މުހިންމު ބަދަލެކެވެ.
ހަވާލާ: ސައިންސް ޑެއިލީ 2026.