ވިލާގަނޑުގައި ގަޑިއަކު 50 މޭލަށް ވައި ގަދަވާނެ ކަމަށް ލަފާކުރެވޭތީ، ކަނޑުދަތުރުފަތުރު ކުރުމުގައި ސަމާލުވުމަށް ފުލުހުންނާއި މޫސުމާ ބެހޭ ގައުމީ އިދާރާއިން އެދިއްޖެއެވެ.
މޫސުމާ ބެހޭ ގައުމީ އިދާރާއިން ވަނީ ނ. އަތޮޅުން ފެށިގެން ވ. އަތޮޅާ ދެމެދުގެ ސަރަހައްދަށް ވައިޓް އެލާޓް ނެރެފައެވެ. އެ އިދާރާއިން ބުނީ އާންމުގޮތެއްގައި ގަޑިއަކު 19 މޭލާއި 20 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި، ވިލާގަނޑުގައި ވައި ވަރަށް ބޮޑަށް ގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށް ބުންޏެވެ.
ކަނޑުމަތީގެ ނުރައްކާތެރި ހާދިސާތައް ގިނަވަމުންދާތީ، ސޯޝަލް މީޑިއާ މެދުވެރިކޮށް ފުލުހުން ވަނީ ކަނޑުދަތުރު ކުރައްވާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ.
ފުލުހުން ބުނީ ޒަރޫރީ ދަތުރުތައް ފިޔަވައި މި ދުވަސްވަރު ކަނޑަށް ނިކުމެ އުޅުމުން ދުރުވެ، މޫސުމާ ބެހޭ އެންމެ ފަހުގެ މައުލޫމާތު ހޯދުން މުހިންމު ކަމަށެވެ. އަދި ނެރެފައިވާ ސަމާލުތަކާ އެއްގޮތަށް އަމަލުކުރުމަށް ފުލުހުން ވަނީ ބާރުއަޅާފައެވެ.
މޫސުމީ މި ނުތަނަވަސްކަމުގައި ކަނޑުމަތީގެ ހާދިސާތަކުން ސަލާމަތްވެ ތިބުމަށްޓަކައި، ކަމާ ބެހޭ އިދާރާތަކުން ދޭ އިރުޝާދުތަކަށް ބޯލަނބައި، ރައްކާތެރިކަމުގެ ފިޔަވަޅުތައް އެޅުމަށް އެންމެހާ ފަރާތްތަކަށް ވަނީ އިލްތިމާސްކޮށްފައެވެ.