ކާރްތިކް އާރްޔަން ލީޑް ރޯލު ކުޅޭ ފިލްމު "ބޫލް ބުލައްޔާ 2" ގެ އެންމެ ފަހު ޝޫޓިންގ ޝެޑިއުލް މި ހިނގާ އޮގަސްޓް މަހުގެ 10 ގައި ފަށާގޮތަށް ނިންމައިފިއެވެ.

ފިލްމުގެ ޕްރޮޑިއުސަރ މުރާދު ކޭތާނީ ބުނެފައިވާ ގޮތުގައި އޮގަސްޓުން ފެށިގެން ކާރްތިކް އަދި ފިލްމުގެ މައިގަނޑު ތަރިން ކަމަށްވާ ތައްބޫއާއި ކިއާރާގެ އިތުރުން އެހެން ތަރިންނާއެކު ޝޫޓިންގ ފަށާނެއެވެ. އަދި ކޮވިޑް-19 އާއި ގުޅިގެން އަޅާފައިވާ ފިޔަވަޅުތަކުގެ ސަބަބުން އެމީހުން ޝޫޓް ކުރާނީ ސެޓުގައިކަމަށާއި ޝޫޓް ކުރާނީ ސަލާމަތީ ހުރިހާ ފިޔަވަޅުތަކަކާއެކު ކަމަށްވެސް އޭނާ ބުނެފައިވެއެވެ.

ފިލްމުގެ ފަހު ޝޫޓިންގ ޝެޑިއުލްއަށް ދެ ސެޓެއް ތައްޔާރުކޮށްފައިވެއެވެ. ކާތިކް ފިލްމުގެ ޝޫޓިންގ ފަށާނީ އޭނާ މިހާރު ޝޫޓްކުރަމުންދާ އެކްތާ ކަޕޫރްގެ "ފްރެޑީ"ގެ ޝޫޓިންގ އިން ޗުއްޓީއެއް ނަގައިގެންނެވެ.

"ބޫލް ބުލައްޔާ 2" އަކީ 2007 ވަނަ އަހަރު ޕްރިޔަދަރްޝަން، އަކްޝޭ ކުމާރާއި ވިދްޔާ ބާލަންއާއެކު ގެނެސްދިން ހިޓް ފިލްމު "ބޫލް ބުލައްޔާ" ގެ ސީކުއެލްއެކެވެ. ސީކުއެލްގެ ތަރިންގެ ތެރޭގައި ކާރްތިކްގެ އިތުރުން ކިއާރާ އަދުވާނީ، ތައްބޫ، އަމަރް އުޕަދިޔައި އަދި ރާޖްޕަލް ޔާދަވް ހިމެނެއެވެ.

2019 ގައި ޝޫޓިންގ ފެށި "ބޫލް ބުލައްޔާ 2" އަކީ 2020 ގެ ޖުލައި މަހު ރިލީޒްކުރަން ތާވަލުކުރި ފިލްމެކެވެ. ނަމަވެސް ކޮވިޑް-19ގެ ސަބަބުން ޝޫޓިންގ ހުއްޓުމުން ފިލްމު ރިލީޒްކުރުން ވަނީ ވަކި މުއްދަތެއް ނެތް ގޮތަށް ފަސްކޮށްފައެވެ. ފިލްމުގެ ޕްރޮޑިއުސަރ ބުނެފައިވާ ގޮތުގައި އެމީހުން އަދި ފިލްމު ރިލީޒް ކުރުމާމެދަކު ނުވިސްނައެވެ. އެމީހުން އެކަމާ ވިސްނާނީ ފިލްމުގެ މަސައްކަތް ނިންމާލެވުނީމައެވެ.