މައިބަދައިގެ ރިއްސުމާއި މައިބަދައިގެ ބަލިތަކަށް އާ އުއްމީދެއް ގެނެސްދޭ މުހިންމު ދިރާސާއެއްގެ ނަތީޖާ ދާދިފަހުން ވަނީ އާންމުކޮށްފައެވެ. އެޑިންބަރާ ޔުނިވަރސިޓީގެ ދިރާސާވެރިން ކުރިއަށްގެންދިޔަ މި ދިރާސާއިން ދައްކާ ގޮތުގައި، ޖެނެޓިކް ނުވަތަ ވާރުތަވާ ބަދަލުތަކެއްގެ ސަބަބުން މައިބަދައިގެ ކަށިތަކުގެ ދެމެދުގައިވާ މަޑު ކަށިތައް (ނެޗުރަލް ޝޮކް އަބްސޯބަރސް) ހަރުވެ، ހަލާކުވާން މެދުވެރިވެއެވެ. މި ކަމުގެ ސަބަބުން މައިބަދައިގެ ބަލިތަކަށް މަގުފަހިވެ، އިންސާނުންނަށް ބޮޑެތި ތަދުތަކާ ކުރިމަތިލާންޖެހެއެވެ.
މި ދިރާސާ ކުރިއަށްގެންދިއުމަށްޓަކައި ދިރާސާވެރިން ބޭނުންކޮށްފައިވަނީ "ޒީބްރާފިޝް" ނަމަކަށްކިޔާ މަހެކެވެ. ކޮލަޖެންއާ ގުޅުންހުރި ޖީންއެއްގައި މައްސަލަ ހުރި މި މަސްތަކުގެ މައިބަދައިގައި މިނަރަލްތައް ޖަމާވެ، އިންސާނުންގެ މައިބަދައިގެ ޑިސްކު ހަލާކުވުމުން ދިމާވާ ފަދައިން ކަށިތައް ގުޅޭ ގޮތް (ސްޕައިނަލް ފިއުޝަން) ދިމާވިކަން ފާހަގަކުރެވުނެވެ. މިއީ މައިބަދައިގެ ބަލިތައް އުފެދޭ ގޮތް ދެނެގަތުމަށް ލިބުނު މުހިންމު އަލިމަގެކެވެ.
ނަމަވެސް، އެންމެ އުއްމީދީ ކަމަކީ މިހާރުވެސް އޮސްޓެއޯޕޮރޯސިސް (ކަށިގިފީ ބަލި) އަށް ބޭނުންކުރަމުންދާ ބޭހެއް ބޭނުންކޮށްގެން، މައިބަދައަށް ލިބެމުންދިޔަ މި ގެއްލުންތައް ކުޑަކުރެވުނު ކަމެވެ. ދިރާސާވެރިން ވަނީ މި ބޭހުގެ އިތުރުން ހަށިގަނޑުގައިވާ ފެޓް މެޓަބޮލިޒަމް ނުވަތަ މެޓަބޮލިޒަމްގެ މަރުހަލާތަކަށް އަމާޒުކޮށްގެންވެސް މައިބަދައިގެ ހަލާކުވުން މަޑުޖައްސާލެވިދާނެކަން ސާބިތުކޮށްދީފައެވެ.
މި ހޯދުމުގެ ސަބަބުން ކުރިއަށް އޮތް ތަނުގައި މައިބަދައިގައި ރިއްސާ ބަލިމީހުންނަށް އާ ފަރުވާތަކެއް ތައާރަފުކުރުމަށް ވަރަށް ބޮޑަށް މަގުފަހިވެގެންދާނެއެވެ. މައިބަދައިގެ މައްސަލަތަކަށް ސާޖަރީއެއް ނުވަތަ ވަގުތީ ތަދުކަނޑުވާ ބޭސްތަކުގެ ބަދަލުގައި، މައްސަލައިގެ އަސްލު މައްސަލައަށް އަމާޒުކޮށްގެން ދެވޭނެ ފަރުވާތައް ހޯދުމުގެ އާ ދޮރުތަކެއް މި ދިރާސާއާއެކު މިވަނީ ހުޅުވިފައެވެ.
ހަވާލާ: ސައިންސް ޑެއިލީ 2026.