އެންޓާކްޓިކާގެ އެންމެ ފިނި، އަދި އެކަހެރި ސަރަޙައްދުގައި އޮންނަ "ކޮންކޯޑިއާ ސްޓޭޝަން" ގައި 12 މީހުންގެ ޓީމެއް ހިމަނައިގެން 10 މަސްދުވަހުގެ މުއްދަތަށް ހިންގި ދިރާސާއަކުން، މުސްތަޤްބަލުގައި މާސްއަށް ކުރެވޭ ޖަޒާވީ ދަތުރުތަކުގައި އެސްޓްރޯނޯޓުންނަށް ކުރިމަތިވެދާނެ ނަފްސާނީ އަދި އިޖުތިމާއީ ގޮންޖެހުންތަކާ ބެހޭ ގޮތުން ނުހަނު މުހިންމު މަޢުލޫމާތުތަކެއް ހާމަވެއްޖެއެވެ. މި ދިރާސާގެ ހޯދުންތައް ސޫރިކް ޔުނިވާރިސިޓީގެ ދިރާސާވެރިން ވަނީ މިހިނގާ އޮގަސްޓުމަހު ޝާއިޢުކޮށްފައެވެ.
މި ދިރާސާއިން ދައްކާ ގޮތުގައި، އެކަހެރި މާޙައުލެއްގައި ގިނަ ދުވަސްތަކެއް ވަންދެން އުޅޭއިރު އެސްޓްރޯނޯޓުންނަށް ހަމައެކަނި އޮތް ބިރަކީ ތަނުގެ އެކަހެރިކަމާއި އެކަނިވެރިކަމެއް ނޫނެވެ. އޭގެ ބަދަލުގައި، އެއް ބަޔަކު އަނެއް ބަޔަކާއެކު މާ ގިނަ ވަގުތު ހޭދަކުރަންޖެހުމާއި، އަމިއްލަ މިނިވަންކަމާއި "ޕްރައިވެސީ" ނުލިބުމަކީވެސް ނަފްސާނީ ބޮޑު ނުތަނަވަސްކަމެއް އުފެދޭ ކަމެކެވެ.
ދިރާސާ ކުރިއަށްދިޔަ މުއްދަތުގައި، ބައިވެރިންގެ އަތުގައި އަޅުވާފައިވާ ޕްރޮކްސިމަލް ސެންސަރުތަކުގެ އެހީގައި، އެމީހުން އެކަކު އަނެކަކާ ބައްދަލުވާ މިންވަރާއި އެކުގައި ހޭދަކުރާ ވަގުތު ވަނީ ސައިންސްވެރިން ދެނެގަނެފައެވެ. މީގެ އިތުރުން، ގަވާއިދުން ފުރާ ސާވޭތަކާއި ސައިކޮލޮޖިކަލް އެސެސްމަންޓްތަކުގެ އެހީގައި ޓީމުގެ އެކުވެރިކަމާއި އިތުބާރު ހުރި މިންވަރު ވަނީ ވަޒަންކޮށްފައެވެ.
މި ދިރާސާއިން ފާހަގަކުރެވުނު އެންމެ ބޮޑު އެއް ހޯދުމަކީ، އެކަކު އަނެކަކާ ގިނައިން ބައްދަލުވެ، ވާހަކަދައްކާ ހެދުމަކީ އަބަދު ރަނގަޅު ނަތީޖާއެއް ނުކުންނަ ކަމެއް ނޫން ކަމެވެ. މާ ގިނައިން ގުޅުން ބެހެއްޓި މީހުންގެ މެދުގައި ނަފްސާނީ ހަމަނުޖެހުންތަކާއި، އިތުބާރު ކުޑަވުމުގެ މައްސަލަތައް އިތުރުވެ، މަސައްކަތުގެ ފެންވަރު ދަށްވިކަމަށް ރިޕޯޓުކޮށްފައިވެއެވެ.
މީގެ އިތުރުން، ދިރާސާގެ މުއްދަތު އިތުރުވަމުން ދިޔަވަރަކަށް 12 މީހުންގެ މުޅި ޓީމު ކުދިކުދި ގުރޫޕްތަކަކަށް ބެހިގެންދިޔަ ކަން ފާހަގަކުރެވުނެވެ. މިގޮތުން ބައިވެރިން ގިނައިން ވަގުތު ހޭދަކުރަން ފެށީ އެމީހުންގެ އަމިއްލަ މާދަރީ ބަހުން ވާހަކަދައްކާ، އަދި އެއް ޤައުމަކަށް ނިސްބަތްވާ މީހުންނާއެކުގައެވެ.
ޔުނިވަރސިޓީ އޮފް ސޫރިކްގެ ޕްރޮފެސަރު ޖަން ޝްމުޓްޒް ވިދާޅުވި ގޮތުގައި، "އެކަހެރި މާޙައުލުތަކުގައި ކުދި ޓީމުތަކުން މާ ގިނައިން ބައްދަލުވުމަކީ އެއީ އިޖުތިމާއީ އެހީތެރިކަން ލިބޭ ކަމެއް ނޫނެވެ. އޭގެ ބަދަލުގައި އެއީ މަޝްރަޙު ހޫނުވެ، ނަފްރަތު އުފެދުމަށް މަގުފަހިވާ ކަމެކެވެ."
މި ހޯދުންތަކަކީ ކުރިއަށް އޮތް ތަނުގައި ހަނދާއި މާސްއަށް ފޮނުވާ އެސްޓްރޯނޯޓުން އިންތިޚާބުކުރުމާއި، އެމީހުންގެ ތަމްރީނުތައް ފަރުމާކުރުމުގައި ނުހަނު ބޭނުންތެރި މަޢުލޫމާތުތަކެކެވެ. މާސްއަށް ކުރާ ދަތުރަކީ އެތައް މަހެއް ނުވަތަ އަހަރެއް ނަގާނެ ދަތުރަކަށްވެފައި، ސަބްމެރިންތަކާއި އެކަހެރި ރިސާޗް ސްޓޭޝަންތަކުގައި މަސައްކަތްކުރާ ފަރާތްތަކަށްވެސް މި ހޯދުމުގެ މުހިންމުކަން ބޮޑެވެ.
މާސް ފަދަ ދުރު ގުރަހައަކަށް ދަތުރުކުރާ އެސްޓްރޯނޯޓުންނަށް ހަމައެކަނި ދިމާވާނެ ގޮންޖެހުމަކީ އެކަނިވެރިކަމެއް ނޫނެވެ. އެކަކު އަނެކަކަށް ފިލޭނެ ނުވަތަ އެކަނިވެލާނެ ވަގުތެއް ނުލިބި، މާ ގާތްކޮށް އުޅެންޖެހުމަކީވެސް މިފަދަ މިޝަންތަކުގެ ކާމިޔާބީއަށް އޮތް ބޮޑު ނުރައްކަލެކެވެ.
ހަވާލާ: ޕްރޮފެސަރު ޖަން ޝްމުޓްޒް (ޔުނިވަރސިޓީ އޮފް ސޫރިކް) އަދި ޑރ. އެންޑްރިއާ ކެންޓިސާނީ (ޔުނިވަރސިޓީ އޮފް ބާން).