ސްޓާ ޕްލަސްގެ "ސާތު ނިބާނާ ސާތިޔާ" އަކީ އިންޑިއާގެ އެންމެ ކާމިޔާބު ޑްރާމާ ސިލްސިލާތަކުގެ ތެރޭގައި ހިމެނޭ އެއް ސިލްސިލާއެވެ. 7 އަހަރު ވަންދެން މެދުކެނޑުމެއްނެތި ދެއްކުމަށްފަހު ސިލްސިލާ ނިންމާލީ 23 ޖުލައި 2017 ގައެވެ.

މުޅި ސިލްސިލާގައިވެސް އެންމެ މަޝްހޫރުވީ އެއް ކެރެކްޓަރއަކީ ވަރަށް ކިޔަމަންތެރި، އާއިލާއަށްޓަކައި ކޮންމެފަދަ ޤުރުބާނީއެއްވެސް ވާން ތައްޔާރަށް ހުރި ހިތްވަރުގަދަ އަންހެނެއްގެ ރޯލު ކުޅުނު "ގޯޕީ މޯދީ" ނުވަތަ "ގޯޕީ ބަހޫ" އެވެ. ސީރީޒްގެ ފުރަތަމަކޮޅު ގޯޕީއަކީ ނުކިޔަވައި ހުރި އެއްޗެއް ނޭނގޭ މީހެއްގެ ގޮތުގައި ދެއްކި ނަމަވެސް ސިލްސިލާ ކުރިއަށް ދިޔަ ވަރަކަށް އެ ކެރެކްޓަރ ކުރިއަރަމުން ދިޔަގޮތް ގިނަ ބަޔަކަށް ވަރަށް ކަމުދިޔައެވެ.

ދެ އަހަރަށްފަހު ފުރަތަމަ އެ ރޯލު ކުޅުނު ޖިއާ މާނިކް ސިލްސިލާ ދޫކޮށްލުމުން ދެން ގޯޕީގެ ރޯލު ކުޅޭނެ ބަތަލާއެއް ހޯދުންވީ ސީރީޒްގެ ޓީމަށް ވަރަށް ދަތި ކަމަކަށެވެ. އެގޮތުން ފަހުން އެ ރޯލު ކުޅުނު ޑެވޮލީނާ ބަޓަޗާޖީއަށް އެ ރޯލު ހުށަހެޅުމުގެ ކުރިން މަޝްހޫރު ބައެއް އެހެން ތަރިންނަށްވެސް އެ ރޯލު ހުށަހެޅިއެވެ. ނަމަވެސް އެއިން އެއްވެސް ތަރިއަކު އެ ރޯލު ޤަބޫލެއް ނުކުރިއެވެ.

މި ލިޔުމުގައި މި ބަލައިލަނީ "ގޯޕީ ބަހޫ"ގެ ރޯލު ހުށަހަޅައި، އެ ރޯލު ޤަބޫލުނުކޮށް ދޫކޮށްލި 5 ބަތަލާއިންނަށެވެ.

* މާހީ ވިޖް

ގޯޕީގެ ރޯލު ހުށަހެޅި އެއް ބަތަލާއަކީ "ލާގީ ތުޖްސެ ލަގަން" އަދި "ބާލިކާ ވަދޫ" ފަދަ ސިލްސިލާތަކުގައި މޮޅު އެކްޓިންގއެއް ދެއްކި މާހީ ވިޖްއެވެ. ނަމަވެސް އޭނާގެ ޒާތީ ދިރިއުޅުމުގެ ކަންތައްތަކުގައި މާ ބިޒީ ދުވަސްކޮޅަކަށް ވާތީ އޭނާ ވަނީ އެ ރޯލު ދޫކޮށްލާފައެވެ.

* ޖެނިފާ ވިންގެޓް

"ކަސޯޓީ ޒިންދަގީ ކޭ" އާއި "ސަންގަމް" އަދި "ދިލް މިލް ގަޔޭ" ފަދަ ސިލްސިލާތަކުން މަޤުބޫލުކަން ހޯދި ޖެނިފާ ވިންގެޓަށް ގޯޕީގެ ރޯލު ހުށަހެޅުމުން އޭނާވެސް ވަނީ އެ ރޯލު ޤަބޫލުނުކޮށް ދޫކޮށްލާފައެވެ. އޭނާ އެ ރޯލު ޤަބޫލުނުކުރީ އޭނާއާއި އެ ރޯލު ނުގުޅޭ ކަމަށް ޤަބޫލުކުރެވޭތީއެވެ.

* ޑްރަޝްތީ ދާމީ

"ދިލް މިލް ގަޔޭ" އަދި "ގީތު - ހުއީ ސަބްސޭ ޕަރާއީ" އިން މަޤުބޫލުކަން ހޯދި ޑްރަޝްތީ ދާމީވެސް ވަނީ ގޯޕީގެ ރޯލު ޤަބޫލުނުކޮށް ދޫކޮށްލާފައެވެ. އޭނާ އެ ރޯލު ޤަބޫލު ނުކުރި ސަބަބެއް ހާމަކޮށްފައެއް ނުވެއެވެ.

* ރުބީނާ ދިލައިކް

އެހެން ޕްރޮޖެކްޓްތަކެއްގެ މަސައްކަތުގައި ބިޒީވުމުން "ޗޯޓީ ބަހޫ"ގެ ދެ ސީޒަނުން ވިދާލި ރުބީނާ ދިލައިކްވެސް ވަނީ ގޯޕީގެ ރޯލު ނުކުޅެ ދޫކޮށްލާފައެވެ.

* ރާގިނީ ކަންނާ

"ސަސުރާލް ގެންދާ ޕޫލް" ގައި ސުހާނާގެ ރޯލު ކުޅެގެން ބޮޑު މަޤުބޫލުކަމެއް ހޯދި ރާގިނީ ކަންނާވެސް ވަނީ ގޯފީގެ ރޯލު ޤަބޫލުނުކޮށްފައެވެ. ސަބަބެއް ކަމަށް އޭނާ ބުނެފައިވަނީ އެދުވަސްވަރު އޭނާ ޓީވީގެ އެއްވެސް ހުށަހެޅުމެއް ޤަބޫލުކުރަން ބޭނުން ނުވުމެވެ.

މިއިން އެއްވެސް ބަތަލާއަކު ގޯޕީގެ ރޯލު ޤަބޫލު ނުކުރުމުން ދެން ހުށަހެޅީ ފަހުން ގޯޕީގެ ރޯލު ކުޅުނު ޑެވޮލީނާ ބަޓަޗާރްޖީއަށެވެ. އޭނާ އެ ރޯލު ޤަބޫލުކުރުންވީ އޭނާގެ ތަރި ރޮކެޓެއްހާ ހަލުވިކޮށް އަރައިގެން ދިޔަ ކަމަކަށެވެ. ކުޑަ ދުވަސްކޮޅެއްގެ ތެރޭގައި ޓީވީ ބަތަލާއިންގެ ތެރެއިން އެންމެ ނަން ހިނގާ އެއް ބަތަލާއަށް އޭނާ ވިއެވެ.

2017 ގައި ސިލްސިލާ ނިންމާލި ފަހުންވެސް މި ސިލްސިލާގެ އަޑު މަޑެއް ނުވިއެވެ. ސިލްސިލާއަށް ލިބުނު މަޤުބޫލުކަމުގެ ސަބަބުން ދެވަނަ ސީޒަނެއް އުފެއްދުމަށް ޕްރޮޑިއުސަރުން ނިންމިއެވެ. އެގޮތުން ދެވަނަ ސީޒަން މިދިޔަ އަހަރުގެ އޮކްޓޯބަރު 19 އިން ފެށިގެން ސްޓާ ޕްލަސްއިން ދައްކަން ފެށިއެވެ. ކުރީ ސީޒަންގެ ކާސްޓުންނާއި މުޅިން އާ ކާސްޓަކާއިއެކު ސިލްސިލާ ކުރިއަށް ދާއިރު ކުރީގެ ތަރިން ބޭނުންކުރީ އާ ތަރިން ތަޢާރަފު ކުރަންކަމަށް ވެއެވެ. ދެވަނަ ސީޒަންގެ ލީޑް ރޯލު ކުޅެނީ ސްނޭހާ ޖެއިންއާއި ހަރްޝް ނަގަރް އަދި އަކަންކްޝާ ޖުނޭޖާއެވެ.