މިސް ވޯލްޑް މުބާރާތުގައި ފުރަތަމަ ފަހަރަށް ރާއްޖެ ތަމްސީލުކުރުމަށް މަރިޔަމް އީމާ މުހައްމަދު ހޯމަ ދުވަހު ފުރައިފިއެވެ. މިއީ ދުނިޔޭގެ އެންމެ ބޮޑު އެއް ރީތީގެ މުބާރާތުގައި ރާއްޖޭގެ ބައިވެރިއަކު ރަސްމީކޮށް ވާދަކުރާ ފުރަތަމަ ފަހަރެވެ.
އުމުރުން 23 އަހަރުގެ އީމާއަކީ މޮޑެލްކުރުމުގެ ދާއިރާގައި ގިނަ ތަޖުރިބާތަކެއް ހާސިލުކޮށްފައިވާ ފަރާތެކެވެ. އޭނާ ވަނީ މި އޮގަސްޓު މަހުގެ ތިންވަނަ ދުވަހު ބޭއްވި މިސް ވޯލްޑް ރާއްޖެ 2026 ގެ ތާޖު ހާސިލުކޮށްފައެވެ.
އީމާ ރާއްޖެ ތަމްސީލުކުރުމަށް ހަމަޖެހިފައިވަނީ ވިއެޓްނާމްގައި އޮންނަ 75 ވަނަ މިސް ވޯލްޑް ފެސްޓިވަލްގައެވެ. މި މުބާރާތުގެ ހަރަކާތްތައް ކުރިއަށްދާނީ އޮގަސްޓު މަހުގެ 9 އިން ސެޕްޓެމްބަރު މަހުގެ 5 ވަނަ ދުވަހުގެ ނިޔަލަށެވެ.
މީގެ ކުރިން 2000 ވަނަ އަހަރު ރާއްޖެއިން ވަނީ 50 ވަނަ މިސް ވޯލްޑް މުބާރާތް ކޯ-ހޯސްޓުކޮށްފައެވެ. ނަމަވެސް އެ މުބާރާތުގައި ރާއްޖޭގެ ރަސްމީ ބައިވެރިއަކު ވާދަކޮށްފައެއް ނުވެއެވެ. އީމާގެ މި ކާމިޔާބީއާއެކު ރާއްޖޭގެ މޮޑެލިން ދާއިރާއަށް ވަނީ އާ ބާބެއް ފެށިގެން ގޮސްފައެވެ.