މަޝްހޫރު ރެޕް ލަވަކިއުންތެރިޔާ ޓޫޕާކް ޝަކޫރު މަރާލި މައްސަލައަށް ތިރީހަކަށް އަހަރު ވާން އުޅެނިކޮށް، އެ މައްސަލައިގެ ޝަރީއަތް ކޯޓުގައި އެންމެ ފަހުން ފަށައިފިއެވެ. އެގޮތުން، މި މައްސަލައިގެ ޝަރީއަތް ކުރިއަށް ގެންދިއުމަށްޓަކައި ޖޫރީން ނެގުމުގެ މަރުހަލާ މިހާރު ވަނީ ފަށާފައެވެ.
މިއީ 1996 ވަނަ އަހަރުގެ ސެޕްޓެމްބަރު މަހު ލަސްވޭގަސްގައި ކާރެއްގެ ތެރެއިން ދިން ބަޑީގެ ހަމަލާއެއްގައި ޓޫޕާކް މަރާލި ހާދިސާއާ ގުޅިގެން ކުރިއަށްދާ ޝަރީއަތެކެވެ. މި މައްސަލައިގައި ދައުވާ އުފުލާފައިވަނީ ސައުތު ސައިޑް ކޮމްޕްޓަން ކްރިޕްސް ގޭންގުގެ ކުރީގެ ލީޑަރު ޑުއޭން "ކެފީ ޑީ" ޑޭވިސްގެ މައްޗަށެވެ. އޭނާގެ މައްޗަށް ކުރަނީ ނުރައްކާތެރި ހަތިޔާރެއް ބޭނުންކޮށްގެން މީހަކު މަރާލުމުގައި ބައިވެރިވިކަމުގެ ދައުވާއެވެ.
އުމުރުން 63 އަހަރުގެ ޑޭވިސް 2023 ވަނަ އަހަރު ހައްޔަރުކުރި ނަމަވެސް، އޭނާ ވަނީ ކޯޓުގައި އޭނާގެ މައްޗަށް ކުރެވޭ މަރުގެ ދައުވާއަށް އިންކާރުކޮށްފައެވެ. މިއީ މިއުޒިކީ ދާއިރާގައި ދުނިޔޭގެ ސަމާލުކަން ހޯދާފައިވާ މަޝްހޫރު ތަރިއެއްގެ މަރުގެ މައްސަލައިގައި ގިނަ ދުވަސްތަކަކަށްފަހު ފެށުނު އެންމެ ފާހަގަކޮށްލެވޭ އެއް ޝަރީއަތެވެ.