އިންސާނުންނަށް ކުށް ކުރެވުމަކީ އިންސާނީ ތަބީއަތުގެ ބައެއް ކަމަށާއި، ނަމަވެސް الله ގެ ރަހުމަތުން އުންމީދު ކަނޑާނުލައި ތައުބާވުމުގައި ދެމިތިބުމަށް މަޝްހޫރު ދީނީ އިލްމުވެރިޔާ މުފްތީ އިސްމާއީލް މެންކު ނަސޭހަތްތެރިވެއްޖެއެވެ.
މުފްތީ މެންކު ދެއްވި ދީނީ ތަގުރީރެއްގައި ބުނީ، ކޮންމެ އިންސާނަކަށްވެސް ކުށެއް ކުރެވިދާނެ ކަމަށެވެ. އަދި އިންސާނާއަށް ކުށެއް ކުރެވުމުން الله ގެ ރަހުމަތުން އުންމީދު ކަނޑުވާލުމަށް ޝައިތާނާ މަސައްކަތް ކުރާނެ ކަމަށްވެސް ބުންޏެވެ. ނަމަވެސް އެފަދަ ހިޔާލުތަކަށް ފުރުސަތު ނުދީ الله ގެ ހަޒުރަތުން ފާފަފުއްސެވުމަށް އެދެންޖެހޭނެ ކަމަށް ބުންޏެވެ.
އެދޭ ކަންކަން ހާސިލުކުރުމަށްޓަކައި ދުއާކުރުމުގެ ކުރިން الله ގެ ހަޒުރަތުން ފާފަފުއްސެވުމަށް އެދުމަކީ ދުއާ އިޖާބަވުމުގެ މަގު އަލިކޮށްދޭ ކަމެއް ކަމަށް މުފްތީ މެންކު ފާހަގަކުރިއެވެ. ކީރިތި ގުރައާނުގައިވާ ނަބިއްޔުންގެ ދުއާތަކަށް ބަލާއިރުވެސް، އެބޭކަލުން ދުއާ ފައްޓަވާފައިވަނީ الله ގެ ހަޒުރަތުން ފާފަފުއްސެވުމަށް އެދިގެން ކަމަށް ކަން ފާހަގަކުރިއެވެ.
އިންސާނާ الله އަށް ދުއާކުރާއިރު، الله ގެ ރީތި އިސްމުފުޅުތައް ބޭނުންކުރުމުގެ މުހިންމުކަމުގެ މައްޗަށް މުފްތީ މެންކު އަލިއަޅުވާލިއެވެ. އެގޮތުން ބަލިމަޑުކަމުން ޝިފާ އެދޭއިރު "އައްޝާފީ" އަދި ދަރިންނާއި އާއިލީ އުފާވެރިކަމަށް އެދޭއިރު "އަލްވައްހާބު" ފަދަ އިސްމުފުޅުތަކުން ނިދާކުރުމަށް އިލްތިމާސްކުރިއެވެ.
"الله އީ ފާފަފުއްސަވާ، ތައުބާ ގަބޫލުކުރައްވާ އިލާހު. އިންސާނާ ކުރި ފާފަ ކިތަންމެ ބޮޑުވި ނަމަވެސް، އިހުލާސްތެރިކަމާއެކު ތައުބާވުމުން الله ފާފަ ފުއްސަވާނެ،" މުފްތީ މެންކު ބުންޏެވެ.
ދިރިއުޅުމުގައި ކުރިމަތިވާ އިމްތިހާނުތަކާއި ދަތިތަކަކީ ކޮންމެ މީހަކަށްވެސް ކުރިމަތިވާނެ ކަންކަން ކަމަށާއި، އެފަދަ ހާލަތްތަކުގައި الله އާ އޮންނަ ގުޅުން ބަދަހިކުރަންޖެހޭ ކަމަށް މުފްތީ މެންކު ބުންޏެވެ. އަދި އަޅުކަންތަކުގައި ދެމިހުރެ، ހެޔޮ އަމަލުތައް ގިނަކުރުމަށް އެދުނެވެ.
މީގެއިތުރުން، އެހެން މީހުންނަށް މާފުކުރުމާއި އޯގާތެރިވުމަކީ އިސްލާމްދީނުގައި ނުހަނު ބޮޑަށް ބާރުއަޅުއްވާފައިވާ ކަމެއް ކަމަށާއި، الله ގެ ހަޒުރަތުން ފާފަފުއްސެވުމަށް އެދޭ ފަދައިން އެހެން މީހުންނަށް މާފުކުރާ ބަޔަކަށް ވުމަށް މުފްތީ މެންކު ނަސޭހަތްތެރިވިއެވެ.