އިންސާނުންނަށާއި އެހެނިހެން ދިރޭތަކެއްޗަށް އެހީތެރިކަން ފޯރުކޮށްދިނުމަކީ ސުވަރުގެ ހާސިލުކުރުމަށް އޮތް މުހިންމު މަގެއްކަމަށް މަޝްހޫރު ދީނީ އިލްމުވެރިޔާ މުފްތީ މެންކު ބުނެފިއެވެ. އިނގިރޭސިވިލާތުގެ ބޯލްޓަންގައި ބޭއްވި ހާއްސަ ހަރަކާތެއްގައި ވާހަކަދައްކަމުން މުފްތީ މެންކު ވަނީ އެކަކު އަނެކަކަށް އެހީތެރިވުމާއި، ހިތްތައް ސާފުކުރުމުގެ މުހިންމުކަމުގެ މައްޗަށް އަލިއަޅުވާލާފައެވެ.
މުފްތީ މެންކު ބުނި ގޮތުގައި، ކުއްތާއަކަށް ފެންދިން އިންސާނަކަށް ސުވަރުގެ ލިބުނުކަމުގެ ވާހަކައަކީ އިސްލާމްދީނުގައި އެހީތެރިވުމުގެ އަގުބޮޑުކަން އަންގައިދޭ މުހިންމު މިސާލެކެވެ. ދިރޭ އެހެން އެއްޗަކަށް އެހީވެގެން ސުވަރުގެ ލިބޭނަމަ، އިންސާނަކަށް އެހީތެރިކަން ފޯރުކޮށްދީގެން ލިބޭނެ ދަރުމައާއި ސަވާބު މާ ބޮޑުވާނެކަމަށް އޭނާ ފާހަގަކުރިއެވެ.
އަބްދުﷲ އެއިޑް ޖަމިއްޔާއިން އިންތިޒާމުކޮށްގެން ބޭއްވި މި ހަރަކާތުގައި މުފްތީ މެންކު ވަނީ ނަމާދަށް ރައްކާތެރިވުމަށާއި، ކުށްތަކުން ތައުބާވުމަށް އިލްތިމާސްކޮށްފައެވެ. އަދި އިންސާނުންނަށް ހެދޭ ގޯސްތަކުން އިބުރަތް ލިބިގަނެ، ހަސަދަވެރިކަމާއި ނަފްރަތުން ހިތްތައް ސާފުކުރުމަކީ އުފާވެރި ދިރިއުޅުމަކަށް ކޮންމެހެން ބޭނުންތެރި ކަމެއްކަމަށްވެސް ބުންޏެވެ.
މީގެއިތުރުން، ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ މީހުންނަށް އެހީވުމުގެ މުހިންމުކަމުގެ މައްޗަށް އަލިއަޅުވާލަމުން މުފްތީ މެންކު ވަނީ ފަލަސްތީނާއި ގައްޒާ އަދި ލެބަނޯންގެ ރައްޔިތުންނަށް އެހީތެރިކަން ފޯރުކޮށްދިނުމަށް ގޮވާލާފައެވެ. މި ހަރަކާތުގެ ތެރެއިން ހާލުގައި ޖެހިފައިވާ ފަރާތްތަކަށް އެހީވުމަށް 100،000 އަށްވުރެ ގިނަ ޕައުންޑް ވަނީ އެއްކޮށްފައެވެ.
ވާހަކަ ނިންމާލަމުން މުފްތީ މެންކު ބުނީ، އިންސާނުންގެ މެދުގައި އޮންނަ އާއިލީ ގުޅުންތައް ބަދަހިކޮށް، އެކަކު އަނެކަކަށް މާފުކުރުމުގެ ރީތި ސިފަ އަށަގަންނުވަންޖެހޭ ކަމަށެވެ. އަދި އެހެން މީހުންނަށް ހެޔޮކޮށް ހިތުމަކީ الله ގެ ރުއްސެވުމާއި ފުއްސެވުން ލިބި، ސުވަރުގެއަށް ވާސިލުވުމަށް އޮތް އެންމެ އަލިގަދަ މަގުކަމަށްވެސް މުފްތީ މެންކު ބުންޏެވެ.