މެންޗެސްޓާ ސިޓީއާއި ނޯވޭގެ ގައުމީ ޓީމަށް ކުޅެމުންއަންނަ މަޝްހޫރު ފޯވާޑް އާލިން ހާލަންޑުގެ މޮޅު ކުޅުމާ ގުޅިގެން، އިތުރު 4 ވާލްޑް ރެކޯޑް ސެޓިފިކެޓް އޭނާއަށް ލިބިއްޖެއެވެ. އުމުރުން 26 އަހަރުގެ ހާލަންޑަށް މި ރެކޯޑުތައް ހަވާލުކޮށްފައިވަނީ އިނގިރޭސި ޕްރީމިއާ ލީގުގެ އާ ސީޒަން ފެށެން ކައިރިވެފައި ވަނިކޮށެވެ.
ހާލަންޑަށް ލިބުނު ރެކޯޑުތަކުގެ ތެރޭގައި އިނގިރޭސި ޕްރީމިއާ ލީގުގައި އެންމެ އަވަހަށް 100 ގޯލު ހަމަކުރި ކުޅުންތެރިޔާގެ ރެކޯޑު ހިމެނެއެވެ. އޭނާ މި ކާމިޔާބީ ހޯދާފައިވަނީ އެންމެ 111 މެޗުންނެވެ. މީގެއިތުރުން، ޕްރީމިއާ ލީގުގެ އެއް ސީޒަނެއްގައި އެންމެ ގިނަ ގޯލު ޖެހި ކުޅުންތެރިޔާގެ ރެކޯޑުވެސް އޭނާއަށް ވަނީ ލިބިފައެވެ. އެއީ މެންޗެސްޓާ ސިޓީއަށް ކުޅުނު ފުރަތަމަ ސީޒަނުގައި 36 ގޯލު ޖަހައިގެންނެވެ.
ޔޫއީއެފްއޭ ޗެމްޕިއަންސް ލީގުގައި ހާލަންޑު ހެދި ހާއްސަ ރެކޯޑަކީ އެއް މެޗެއްގައި އެންމެ ގިނަ ގޯލު ޖެހި ކުޅުންތެރިޔާގެ ރެކޯޑެވެ. އާރްބީ ލައިޕްޒިގާ ދެކޮޅަށް ކުޅުނު މެޗުގައި އޭނާ ވަނީ 5 ގޯލު ޖަހައިފައެވެ. މިއީ ޗެމްޕިއަންސް ލީގުގެ ތާރީހުގައިވެސް ކުޅުންތެރިއަކަށް އެއް މެޗެއްގައި ޖެހުނު އެންމެ ގިނަ ގޯލެވެ.
އިންޓަނޭޝަނަލް ފުޓްބޯޅައިގައި ނޯވޭ ގައުމީ ޓީމާއެކުވެސް ހާލަންޑު ވަނީ ބޮޑު ރެކޯޑެއް ހަދައިފައެވެ. އެއީ ޔޫއީއެފްއޭ ނޭޝަންސް ލީގުގެ ތާރީހުގައި އެންމެ ގިނަ ގޯލު ޖެހި ކުޅުންތެރިޔާގެ ރެކޯޑެވެ. އޭނާ ވަނީ މި މުބާރާތުގައި ނޯވޭއަށް 19 ގޯލު ޖަހައިދީފައެވެ.
މި އާ ސެޓިފިކެޓްތަކާއެކު ހާލަންޑު ވެގެންގޮސްފައިވަނީ ދުނިޔޭގެ ފުޓްބޯޅައިގައި މިވަގުތު ހުރި އެންމެ ނުރައްކާތެރި އަދި ކާމިޔާބު އެއް ފޯވާޑަށެވެ. ކުރިއަށް އޮތް ސީޒަނުގައިވެސް ހާލަންޑުގެ ފަރާތުން އިތުރު ރެކޯޑުތަކެއް ފެނުމުގެ ފުރުސަތު ބޮޑެވެ.