ޗީޒް ތައްޔާރުކުރުމުގައި އޭގެ މީރުރަހައާއި ވަސް ގެނެސްދޭ ބެކްޓީރިއާތަކަކީ އިންސާނާގެ ގޮހޮރުގެ ދުޅަހެޔޮކަމަށްވެސް ނުހަނު ފައިދާހުރި ބެކްޓީރިއާތަކެއްކަން ސައިންސްވެރިންގެ އާ ދިރާސާއަކުން ހާމަވެއްޖެއެވެ. އިނގިރޭސިވިލާތުގެ ޔުނިވަސިޓީ އޮފް ރީޑިންގްގެ ދިރާސާވެރިން، އިނގިރޭސިވިލާތުގައި އާންމުކޮށް އުފައްދާ ތިން ބާވަތެއްގެ "އާޓިސަން" ޗީޒް ދިރާސާކޮށްގެން ހޯދި ހޯދުންތަކުން ދައްކާ ގޮތުގައި، ޗީޒްގެ ރަހަ ފުރިހަމަވުމަށް އެހީތެރިވެދޭ މައިކްރޯބްސްތަކަކީ ގޮހޮރުގެ ސިއްހަތު ރަނގަޅުކޮށްދިނުމުގައި މުހިންމު ދައުރެއް އަދާކުރާ އެއްޗެކެވެ.
މި ދިރާސާއިން އެނގުނު ގޮތުގައި، ޗީޒް އުފައްދައި ސީރާވާން (މެޗުއާވުމަށް) ދޫކޮށްލެވޭ މުއްދަތުގެ ތެރޭގައި، އޭގައިވާ ފައިދާހުރި ބެކްޓީރިއާތަކުން އޭގެ ވަހާއި އޮމާންކަމަށް ބޮޑެތި ބަދަލުތަކެއް ގެނެސްދެއެވެ. އަދި މި މަރުހަލާގައި، ސިއްހަތަށް ފައިދާހުރި މާއްދާތަކެއް އުފައްދައިދެއެވެ. މީގެ ތެރޭގައި ހަށިގަނޑުގެ އެތެރޭގެ ދުޅަހެޔޮކަން ދަމަހައްޓައި، ދުޅަވުމުން (އިންފްލެމޭޝަން) ރައްކާތެރިކޮށްދޭ މާއްދާތައް ހިމެނެއެވެ.
މީގެ އިތުރުން، މި ބެކްޓީރިއާތަކުގެ ސަބަބުން ހަށިގަނޑުގައިވާ ކޮލެސްޓްރޯލްގެ މިންވަރު ކޮންޓްރޯލްކުރުމަށާއި، ކޭންބުއިމުގެ އާދަތައް ނުވަތަ ބަނޑުހައިވުން ކޮންޓްރޯލްކުރުމަށް އެހީތެރިވެދޭ ކޮމްޕައުންޑްތައް އުފައްދައިދެއެވެ. މިއީ ގޮހޮރުގެ އެތެރޭގައިވާ "ގުޑް ބެކްޓީރިއާ" ނުވަތަ ފައިދާހުރި ޖަރާސީމުތަކުގެ ބެލެންސް ހިފެހެއްޓުމަށް ލިބިގެންދާ ބޮޑު އެހީއެކެވެ.
ސައިންސްވެރިން ގަބޫލުކުރާ ގޮތުގައި މި ދިރާސާގެ ސަބަބުން، ކާބޯތަކެތީގެ ރަހަ މީރުކުރުމަށް ބޭނުންކުރާ ސާފު ބެކްޓީރިއާތަކަކީ ހަމައެކަނި ރަހަ ރަނގަޅުކުރާ އެއްޗެއްގެ އިތުރުން، އިންސާނާގެ ދުޅަހެޔޮކަމަށް ސީދާ ފައިދާކުރާ ވަސީލަތެއްގެ ގޮތުގައި ބޭނުންކުރެވިދާނެއެވެ. މިއީ ކުރިއަށް އޮތް ތަނުގައި ގޮހޮރުގެ މައްސަލަތަކަށް ހައްލު ހޯދުމަށް ސިއްހީ ގޮތުން ފައިދާހުރި ކާބޯތަކެތި އުފެއްދުމަށް ހުޅުވިގެންދިޔަ އާ ދޮރެކެވެ.
ހަވާލާ: ސައިންސް ޑެއިލީ 2026.