ކޮފީއަކީ ހަމައެކަނި ވަރުބަލިކަން ފިލުވާލައި ހުޝިޔާރުކަން ދެނިވި ބުއިމެއް ނޫނެވެ. ފިންލަންޑްގެ އޯލޫ ޔުނިވަސިޓީ އިން ކުރިއަށްގެންދިޔަ އާ ދިރާސާއަކުން ދައްކާގޮތުގައި، ގަވާއިދުން ކޮފީ ބޯ މީހުންގެ ހަށިގަނޑުގައި ސަރުބީ އެކުލެވޭ މިންވަރު މަދުވެ، ހަށިގަނޑުގެ މެޓަބޮލިޒަމް ނުވަތަ ކާނާ ހަކަތައަށް ބަދަލުކޮށްދޭ ނިޒާމަށް އެދެވޭ ބޮޑެތި ބަދަލުތަކެއް އާދެއެވެ.
މި ދިރާސާގެ ނަތީޖާއިން އެނގުނު ގޮތުގައި، ގިނައިން ކޮފީ ބޯ މީހުންގެ ހަށިގަނޑުގެ މުޅި ޖުމްލަ ފެޓް އަދި ހާއްސަކޮށް ބަނޑުގެ ސަރުބީ ހުންނަ މިންވަރު ނިސްބަތުން މަދެވެ. މީގެ އިތުރުން، ބޮޑީ މާސް އިންޑެކްސް އެއްވަރެއްގައި ހުރި ނަމަވެސް، ކޮފީ ބޯ މީހުންގެ ހަށިގަނޑުގައި މަސްތަކުގެ މިންވަރު އިތުރުވެފައި، މެޓަބޮލިކް މާކަރުތައް ވަރަށް ރަނގަޅު ފެންވަރެއްގައި ހުންނަކަން ފާހަގަކުރެވުނެވެ.
މީގެ އިތުރުން ސައިންސްވެރިންނަށް ފާހަގަކުރެވުނު އެންމެ ތަފާތު ކަމަކީ، ކޮފީ ބުއިމުގެ ސަބަބުން ހަށިގަނޑުގެ ހޯމޯންތަކަށާއި އެމިނޯ އެސިޑްތަކަށް އަންނަ ބަދަލުތަކެވެ. ގިނައިން ކޮފީ ބޯ މީހުންގެ ހަށިގަނޑުގައި، އިންސިއުލިން ރެސިސްޓެންސް ނުވަތަ އިންސިއުލިންއަށް ހަށިގަނޑު ނުގުޑުމަށް މެދުވެރިކުރުވާ ވަކި ބާވަތްތަކެއްގެ އެމިނޯ އެސިޑްތައް ހުންނަ މިންވަރު ދަށްކޮށްދެއެވެ.
މި ބަދަލުތަކުގެ ސަބަބުން، ގަވާއިދުން ކޮފީ ބޯ މީހުންނަށް ޓައިޕް 2 ޑައިބެޓީސް (ހަކުރުބަލި) ޖެހުމުގެ ފުރުސަތު ވަރަށް ބޮޑަށް ކުޑަވެގެންދެއެވެ. ހަށިގަނޑުގެ އިންސިއުލިން މަސައްކަތްކުރާ ގޮތް ރަނގަޅުވުމަކީ ހަކުރުބަލިން ރައްކާތެރިވުމަށް ލިބޭ މުހިންމު އެހީތެރިކަމެކެވެ.
ޖުމްލަކޮށް ބަލާއިރު، މި ދިރާސާއިން އެނގެނީ ކޮފީއަކީ ހަމައެކަނި މޫޑު ރަނގަޅުކޮށްދޭ ބުއިމެއްގެ އިތުރުން، ހަށިގަނޑުގެ ސަރުބީ މަދުކޮށް، މަސްތައް ވަރުގަދަކޮށް، އަދި ހަކުރުބަލި ފަދަ ދާއިމީ ބަލިތަކުން ރައްކާތެރިވުމަށް އެހީތެރިވެދޭ ސިއްހީ ގޮތުން ގިނަ ފައިދާތަކެއް އެކުލެވޭ ބުއިމެއް ކަމެވެ.
ހަވާލާ: ސައިންސް ޑެއިލީ 2026.