ކަންޏާ ކާންވާނީ ބޮޑު ކާއްޓެކެވެ. ނުވަތަ ކަންޏާ ކުޑަކާއްޓެއް ނުކާށެވެ. މިއީ މިބަސް ބޭނުން ކޮށް އުޅޭ ދެ ގޮތެވެ. މިއީ ދިވެހި އަދަބީ ބަސްތަކުގެ ތެރެއިން ހަރުބަހެކެވެ.

މިބަހުގެ ބަހަވީ މާނައަށް ބަލައިލަމާ ހިނގާށެވެ. މި ބަހުން އެ ބުނެވެނީ ކާއްޓެއް ހެހެގެން އަދި އެ ފަޅައިގެން ކާއިރު، ބޮޑު ކާއްޓެއް ކާށެވެ. ނުވަތަ ކުޑަ ކާއްޓެއް ނުކާށެވެ. އެހެނީ އެހާ ބުރަ މަސައްކަތުން، އެހާ ހިތްވަރުން ކުރާ އެ މަސައްކަތުން ބޮޑު ފައިދާއެއް ލިބޭނީ ބޮޑު ކާއްޓެއް ކެއީމައެވެ.

މިބަހުގެ ހަގީގީ މާނައަށް ބަލައިލަމާ ހިނގާށެވެ. މި ބަހުގައި މި ބުނަނީ ކަމެއް ކުރާކަމަށް ވަނީވިއްޔާ ކަމަކަށްވާކަހަލަ ކަމެއް ކުރާށެވެ. ކަމެއް ކުރާނަމަ އެކަމެއް ކުރެވެން އޮތް އެންމެ ރަނގަޅުގޮތަކަށް ނުވަތަ އެ ކަމަކުން އެންމެ ބޮޑުފައިދާއެއް ލިބޭނޭ ގޮތަކަށް އެކަމެއް ކުރުމަށެވެ. ހެޔޮކަންތަކަށާއި ނުބައިކަންތަކަށްވެސް މިބަސް ބޭނުން ކޮށް އުޅެއެވެ.

ނަމަވެސް މިބަސް ގިނައިން ބުނެއުޅެނީ ނުބައިކަންތަކަށް ނިސްބަތްކޮށެވެ. އެހެނީ އެ ޒަމާނުގައި މީހެއްގެ ރުކަކުން ކާއްޓެއް ކެއުމަކީ ކުށެކެވެ. ކުށުގެ އަދަބު ބިނާ ވަނީ ކާ ކާށީގެ ބޮޑު ކުޑަ މިނަކަށް ނޫނެވެ. އެހެން ކަމުން ވަގަށް ނަމަވެސް ކާއްޓެއް ކާނަމަ، ކާންވާނީ ބޮޑު ކާއްޓެކޭ ބުނުމުގެ ގޮތުންނެވެ. ކާ ކާށި ބޮޑުވިޔަސް، ކުޑަވިޔަސް ލިބޭނީ އެއް އަދަބެކެވެ.