ކެނެޑާގެ ނޯވާ ސްކޯޝިއާގައި ކުރިއަށްދިޔަ މަސްވެރިކަމުގެ މުބާރާތެއްގައި 322 ކިލޯގެ ބޮޑު ކަންނެއްޔެއް ބާނައިގެން އުމުރުން އެންމެ 13 އަހަރުގެ އަންހެން ކުއްޖަކު ދުނިޔޭގެ ރެކޯޑު މުގުރާލައިފިއެވެ. ޑެލީން ޖެކުއާޑް ނަމަކަށް ކިޔާ މި ކުއްޖާ މި ކާމިޔާބީ ހޯދީ "ވެޖްޕޯޓް ޓޫނާ ޓޯނަމެންޓް" ގައެވެ.
މި ބިޔަ ކަންނެލި ބޭނުމަށްޓަކައި ޑެލީން ވަނީ އެއް ގަޑިއިރަށް ވުރެ ގިނައިރު ވަންދެން އެއްވެސް މީހެއްގެ އެހީތެރިކަމަކާ ނުލައި މަސައްކަތްކޮށްފައެވެ. އެ ދޯނީގެ ކެޕްޓަނަކަށް އޭނާގެ ބައްޕަ ހުރި ނަމަވެސް، ވޯލްޑް ރެކޯޑުން ޖާގަ ހޯދުމުގެ ގަވާއިދު އޮންނަ ގޮތުން މަސް ބޭނުމުގައި އެހެން މީހެއްގެ އެހީތެރިކަން ހޯދުމުގެ ފުރުސަތެއް އޭނާއަކަށް ނެތެވެ.
ޑެލީން ބޭނި މި ބޮޑު ކަންނެލީގެ ބަރުދަނުގައި ގާތްގަނޑަކަށް 322 ކިލޯ ހުއްޓެވެ. މިއީ މީގެ ކުރިން އަންހެން ކުދިންގެ ޖޫނިއާ ވޯލްޑް ރެކޯޑުގެ ގޮތުގައި އޮތް 280 ކިލޯއަށް ވުރެ މާ ބޮޑުތަން ވެސް އިތުރު އަދަދެކެވެ. އެހެންކަމުން މިއީ އޭނާ ހޯދި ވަރަށް ބޮޑު ކާމިޔާބީއެކެވެ.
މި މަސް ބާނައިގެން ޑެލީން ހެދި އާ ރެކޯޑު ރަސްމީކޮށް ބަލައިގަތުމަށްޓަކައި، އިންޓަނޭޝަނަލް ގޭމް ފިޝް އެސޯސިއޭޝަންގެ ހުއްދައަށް އޭނާ މިހާރު އަންނަނީ އިންތިޒާރުކުރަމުންނެވެ. މި ރެކޯޑު ކަށަވަރުކުރުމުގެ މަރުހަލާތަކަށް ދެތިން މަސް ދުވަސް ނަގާނެ ކަމަށް ރިޕޯޓުތައް ބުނެއެވެ.
ބޮޑެތި މަސް ބޭނުމުގެ މިފަދަ ހަރަކާތްތަކަށް ޑެލީން އަކީ އަދި މުޅިން އާ ކުއްޖެކެވެ. އެހެން ނަމަވެސް، އެހާ ޅަ އުމުރުގައި އޭނާ ދެއްކި ހިތްވަރާއި ހޯދި މި ތާރީހީ ކާމިޔާބީގެ ސަބަބުން މަސްވެރިކަމުގެ ދާއިރާގެ ގިނަ ބައެއްގެ ސަމާލުކަމާއި ތައުރީފު އޭނާއަށް ވަނީ ލިބިފައެވެ.