އޮސްޓްރޭލިއާގެ ޔުނިވަސިޓީ އޮފް ޓެކްނޮލޮޖީ ސިޑްނީގެ ސައިންސްވެރިން ވަނީ ސިކުނޑީގެ ކެންސަރުގެ ނުރައްކާތެރި ބާވަތެއް ކަމަށްވާ ގްލިއޯބްލާސްޓޯމާ އަށް ފަރުވާ ކުރުމުގައި އުންމީދީ އާ ހޯދުމެއް ހޯދާފައެވެ. ސައިންސްވެރިން އުފެއްދި "ސްމާޓް ނެނޯޕާޓިކަލްސް" ބޭނުންކޮށްގެން، ސާޖަރީ ކުރާއިރު ލޮލަށް ނުފެންނަ ވަރުގެ ކެންސަރު ސެލްތައް ދެނެގަތުމުގެ އިތުރުން، އޮޕަރޭޝަނަށްފަހު ނުނެގި ބާކީވާ މައިކްރޯސްކޯޕިކް ސެލްތައް ނައްތާލެވިދާނެކަން ވަނީ ސާބިތުކޮށްދީފައެވެ. މިއީ ސިކުނޑީގެ ކެންސަރު އެނބުރި އައުން ހުއްޓުވުމަށް ކުރެވޭ މަސައްކަތުގައި ލިބުނު ވަރަށް ބޮޑު ކުރިއެރުމެކެވެ.
މި ނެނޯޕާޓިކަލްތަކަކީ ދެ މަރުހަލާއަކުން މަސައްކަތްކުރާ އެއްޗެކެވެ. ފުރަތަމަ މަރުހަލާގައި، ސާޖަރީ ކުރާ ވަގުތު ކެންސަރު ސެލްތަކުގައި މި ނެނޯޕާޓިކަލްތައް އަށަގަނެ ހާއްސަ އައްޔެއް އުފައްދައި، ކެންސަރު ސެލްތައް ހުންނަ ތަންތަން ސާފުކޮށް ޑޮކްޓަރުންނަށް ދައްކައިދެއެވެ. މީގެ ސަބަބުން ސިކުނޑީގެ ރައްކާތެރި ސެލްތަކަށް ގެއްލުން ނުދީ، ކެންސަރު އުފެދިފައިވާ ސަރަހައްދުތައް ސާޖަރީގައި ސާފުކުރަން ޑޮކްޓަރުންނަށް ފަސޭހަވެގެންދެއެވެ.
ދެވަނަ މަރުހަލާގައި، އޮޕަރޭޝަނަށްފަހު ސިކުނޑީގައި ބާކީވެފައި ހުންނަ ކެންސަރު ސެލްތައް ނައްތާލުމަށް މި ނެނޯޕާޓިކަލްތައް މަސައްކަތްކުރެއެވެ. ސާޖަރީއަށްފަހު ބާކީވާ ކުދިކުދި ސެލްތަކަކީ އާންމުކޮށް ކެންސަރު އަލުން އެނބުރި އައުމަށް މެދުވެރިވާ މައިގަނޑު ސަބަބެވެ. ނަމަވެސް، މި ސްމާޓް ނެނޯޕާޓިކަލްތަކުގެ އެހީގައި އެ ބާކީވާ ސެލްތައް އެއްކޮށް ނައްތާލެވޭތީ، ކެންސަރު އަލުން އުފެދުމުގެ ފުރުސަތު ނައްތާލަދެއެވެ.
މީދާ ބޭނުންކޮށްގެން ކުރި މި ތަހުލީލުތަކުން ދައްކާގޮތުގައި، މި ފަރުވާ ދެވުނު މީދާތަކުގެ ސިކުނޑިން ކެންސަރު އެނބުރި އައުން ހުއްޓުވި، 60 ދުވަހުގެ މުއްދަތަށް 100 އިންސައްތަ މީދާ ވަނީ ސަލާމަތްވެފައެވެ. މިއީ ވަރަށް އުއްމީދީ ނަތީޖާއެއް ނަމަވެސް، ސައިންސްވެރިން ފާހަގަކުރާ ގޮތުގައި މި ފަރުވާ އިންސާނުންގެ ހަށިގަނޑުގައި އަދި ޓެސްޓުކޮށްފައެއް ނުވެއެވެ. އިންސާނުންނަށް މީގެއިން ކުރާނެ އަސަރުތައް ދެނެގަތުމަށް އިތުރު ކްލިނިކަލް ޓްރަޔަލްތައް ކުރިއަށް އޮތް ތަނުގައި ކުރިއަށްގެންދިއުމަށް ވަނީ ހަމަޖެހިފައެވެ.
ހަވާލާ: ސައިންސް ޑެއިލީ 2026.