ހާސްވެ ނުތަނަވަސް ވެފައި އިން ޝާނާގެ ހަށިގަނޑުގައި ދެކޮޅު ހަދާނޭ ހިތްވަރެއް ނެތެވެ. ޝާނާގެ ވަލީ ދިނީ ވެސް ގާޒީއެއްގެ ގޮތުގައި އިން މީހެކެވެ. ކޮންމެއަކަސް ކޮންމެވެސް ޒާތަކަށް ޝާނާ އާއި އެމީހަކާއި ކައިވެެނި ކުރެވިއްޖެއެވެ. އެއީ ސުއޫދު ނަމަކަށް ކިޔާ ސީރިޔާ ފިރިހެނެކެވެ. ޝާނާގެ ހާސްކަމާއި ނުތަނަވަސްކަމުގައި ސުފުރާމަތީގައި ހުރި ކެއުމަން އިންސާފު ކުރަމުން ދިޔައެވެ.

ކުއްލިއަކަށް އެތަނުގެ ތެރެއަށް ބަޑިއެއް ހިފައިގެން ހުރި ފިރިހެނަކު ވަނެވެ. އަދި އަރަބި ބަހުން ކޮންމެވެސް އެއްޗެހިތަކެއް ކިއެވެ. އޭނާގެ މޫނުމަތީގައި ވަނީ ބިރުވެރިކަމާއި ހާސްކަމެވެ. ނުތަނަވަސް ކަމާއި ނަފްރަތެވެ. އެމީހާ އެބުނި އެއްޗަކާއެކު އެ މަޖިލީހުގައި ތިބި ހުރިހާ ފިރިހެނުންހެން ތެދުވެ އެމީހުންގެ ހަތިޔާރުތައް އަތަށް ނަގައިފިއެވެ. އެހެން އަންހެނަކު ހާޖަރުއާއި އެކީ ޝާނާގެ ގާތަށް އައިސް ޝާނާ ގޮވައިގެން އެގޭގައި ހުރި ކޮޓަރިއަކަށް ވަނެވެ. ޝާނާގެ ހިތް ބިރުވެރުކަމުގައި ރޮއެ ހޭރެނީއެވެ. ޝާނާގެ ލޮލުން ކަރުނަވެސް ހިލެން ފަށައިފިއެވެ. ހާޖަރާއި ދެން ހުރި އަންހެންމީހާގެ ކިބައިން މާ ބޮޑު ނުތަވަސްކަމެއް ފެންނަން ނެތުމުން ހާޖަރު ކުރެން ވެގެން މިއުޅޭ ގޮތެއް ޝާނާ ދިޔައީ ތަކުރާރުކޮށް އަހަމުންނެވެ. ނަމަވެސް ހާޖަރު ވެގެން އުޅޭގޮތެއް ކިޔައެއް ނުދެއެވެ. ފަހަރުގައި ހާޖަރަށްވެސް ނޭނގެނީ ކަމުގައި ވެދާނެއެވެ. ނަމަވެސް ހާޖަރު އެދެމުން ދިޔައީ ޝާނާ ކުރެން ހަމަޖެހުމަށެވެ.

އެ ކޮޓަރީގެ ތެރޭގައި އެމީހުން ތިބޭތާ އިރުކޮޅެއް ވެއްޖެއެވެ. ބޭރުގައި ހަތިޔާރު ހިފައިގެން ތެޅިފޮޅިގަތް ބަޔަކު ކުރާކަމެއް ޝާނާއަކަށް ނޭނގެއެވެ. ބަޔަކު މީހުންގެ ހަމަލާއެއް އަމާޒުވީ ކަމަށް ޝާނާ ނިންމައިގެން ހުއްޓެވެ. އިރުކޮޅެއްވީތަނާ ބާރު އަޑުފައްގަނޑެއް އިވެން ފަށައިފިއެވެ. ޝާނާ އަށްވެސް އެއީ ބަޑީގެ އަޑުފަށްގަނޑެއްކަން ޔަގީންވިއެވެ. ޝާނާއަށް އޭނާގެ ދެ ކަންފަތުގައި އަތް އަޅާ ދެކަންފަތް ފޮރުވާލިއެވެ. ހާޖަރުވެސް އޭރު އިނީ އެފަދައިންނެވެ. އެކޮޓަރީގައި މި މީހުން ތިއްބައި އެކޮޓަރީގެ އެހެން ދޮރެއް ހުޅުވާލާ ބޯދިއްކޮށްލީ މޫނު ބުރުގާ އަޅައިގެން ހުރި އެހެން އަންހެނެކެވެ.

އޭނާ އަރަބި ބަހުން އެއްޗެކޭ ބުނުމުން ހާޖަރު އޭނާގެ ފަހަތުން ހިނގާށޭ ބުނެ ތެދުވިއެވެ. ޝާނާގެ ހަރަކާތް ވަރަށްވެސް ލަހެވެ. ނަމަވެސް ހާޖަރު ޝާނާ ނަގާ ކޮޅަށްޖަހާ ކޮއްޕާ ކަހަލަ ގޮތަކަށް ގެންގޮސް އެމީހާގެ ފަހަތުން ހިންގުވިއެވެ. އޭނާ ހުއްޓާނުލާ ތަކުބީރު ކިޔާތީ ޝާނާއަށް އަޑުއިވުނެވެ. އެއާއި އެކު ހާޖަރާއި ދެން ހުރި އަންހެން މީހާވެސް ކިޔަން ފެށިއެވެ. ޝާނާވެސް ތަކުބީރުކިޔަން ފެށީ އެމީހުންގެ އަޑުދަށުންނެވެ.

އަނދިރި ބިންގަރާހެއްގެ ތެރެއަށް އެމީހުން ވަދެގެން ދިޔައެވެ. އަދި ބިމު އަޑީގައި ހުރި ކޮޓަރިއެއްކަހަލަ ތަނެއްގެ ތެރެއަށްވަދެ ތަޅުލިއެވެ. އެތަނުގައި ދުވަނީ ފާޑަކަށް ނުބައި ވަހެކެވެ. ޝާނާ އޭނާގެ ނޭފަތްވެސް ނިވާކޮށްލިއެވެ. އެތަނުގެ ބިންމަތީގައި އެންމެން އިށީނެވެ. ޝާނާވެސް އެމީހުންނާއި އެކު އިށީނެވެ.

ޝާނާގެ އުފާވެރި ދިރިއުޅުން މިފަދައިން ކިލަނބުވި ކަމަށްޓަކައި ޝާނާ ހިތާމަކުރިއެވެ. ސިކުނޑި ކިތަންމެ ރަނަގަޅަށް ދޮވެލާފައި ހުއްޓަސް ޝާނާއަށް މި ވިސްނުން ވިސްނުނެވެ. އެއާއި އެކު އަޑުން އަޑުނަގާ ޝާނާއަށް ރޮއެގަނެވުނެވެ. އެނބުރި ރާއްޖެއަަށް ދާން ބޭނުން ވާހަކަ އާއި މިކޮޅުގައި ހުންނަން ބޭނުން ނުވާ ވާހަކަ ޝާނާ ބުންޏެވެ. ނަމަވެސް ހާޖަރު ބެލީ އަނެއްކާވެސް ޝާނާއަށް ހިތްވަރުދޭށެވެ. މިއީ ކުރާ މަތިވެރި ޖިހާދެއްކަމާއި މިއީ ސުވަރުގެ ދެވޭނޭ މަގެއް ކަމުގައި ހާޖަރު ދިޔައީ ޝާނާއަށް ވިސްނައިދެމުންނެވެ. ހާޖަރަށް ސުވަރުގޭގެ ވަސް މިހާރުވެސް ދުވާކަމަށާއި ޝާނާވެސް އީމާންތެރިކަމެއް ހުރިނަމަ އެ ވަސް ދުވާނޭކަމަށް ބުނެ އަނެއްކާވެސް ހާޖަރުގެ ދަންޖާލުގައި ރަނގަޅަށް ޝާނާ ޖެއްސިއެވެ.

އެ ބިންގަރާހުގައި ވަގުތުތައް ގުނަމުން ދަނިކޮށް މީހަކު އައިސް އެ ބިންގަރާހުގެ ދޮރު ހުޅުވާލިއެވެ. އެމީހާ އަކީ އަރައްބެއް ނޫނެވެ. އެއީ ވަރުގަދަ ޔުނީފޯމެއްގައި ހުރި ސިފައިންގެ މީހެކެވެ. އެމީހާ ފެނުމާއި އެކު ހާޖަރާއި ދެން ތިބި ދެމީހުން އެމީހުންގެ ހެދުން ތެރެއިން ބަޑިއެއް ނަގާ އެމީހާ އާއި ދިމާލަށް ޖެހިއެވެ. އެ ވަޒަންތައް އޭނާގެ ހަށިގަނޑަށް އަރާ އޭނާ ބިންމައްޗަށް ވެއްޓުނެވެ. ޝާނާ ބިރުން އެ ބިންގަރާހުގެ ފާރުބުޑަށް ގުޅަވެއްޖެއެވެ. އަޑުން އަޑުނަގާ ރޯންފެށިއެވެ. ހާޖަރުމެން ހިތްވަރުލާފައި ތަކުބީރު ކިޔަމުން ބަޑި ޖަހަމުން ގެންދިޔައެވެ. ޝާނާ އޭނާގެ ކަންފަތް ނިވާކޮށްގެން ރޯން އިނެވެ. އޭނާގެ ހަޔާތުގައި މީހަކު މަރާލާމަންޒަރު ހަމަލޮލުން ފެނުނީ އަދި ކިރިޔާއެވެ. ޝާނާ މޭނުބައިކޮށް ހޮޑުލެވޭގޮތްވެސް ވިއެވެ.

އިރުކޮޅެއްފަހުން ބަޑީގެ އަޑުފަށްގަނޑު ކެނޑިއްޖެއެވެ. ޝާނާ ބޯ ހިއްލާލައި ބަލައިލި އިރު ހާޖަރު ނޫން ދެން ތިބި ދެ އަންހެން މީހުން ތިބީ ބިންމަށްޗަށް ވެއްޓިފައެވެ. ހާޖަރު އޭނާގެ ބަޑި ބިންމަތީގައި ބޭއްވިއެވެ. ދެ އަތް އުފުލާ ދުއާކުރަންފެށިއެވެ. ޝާނާ ހުރީ ހައިރާން ކަމާއި އެކީ ހާޖަރަށް ބަލާށެވެ. ހާޖަރު ޝާނާއާއި ދިމާލަށް އެނބުރި ބަލައިލިއެވެ. މިއީ އެމީހުންގެ އެންމެ ފަހު ވަގުތުކަމާއި ދުނިޔޭގައި އެދޭނެ އެންމެ ފަހުގެ އެދުން އެދުމަށް ހާޖަރު ޝާނާ ކުރެން އެދުނެވެ. ޝާނާއަށް ވާނުވާއެއް އަދިވެސް ސާފެއް ނުވެއެވެ. ޝާނާ އަނެއްކާ ހާޖަރުކުރެން ތަކުރާރުކޮށް ސުވާލު ކުރުމުން އިނގިރޭސި ސިފައިން އެރީ ކަމަށާއި އެ ނުބައި ކާފަރުންގެ އަތުން ސަލާމަތް ނުވާނެކަމަށާއި އެމީހުންނަށް ބިންގަރާސް ފެނިއްޖެކަމާއި މިތަނަށް ބޮމެއް އަޅާނޭކަމަށް ހާޖަރު ބުންޏެވެ. ސަލާމަތް ހޯދަން ދާނޭ ތަނެއް ނުހުންނާނެ ކަމަށާއި ޝަހީދުވުން ނޫން އިތުރުގޮތެއް ނެތްކަމަށް ހާޖަރު ބުންޏެވެ.

ޝާނާއަށް ރޮވުނެވެ. އަޑުން އަޑުނަގައެވެ. ނަމަވެސް ހާޖަރުގެ ފަރާތުން ހިތާމައެއް ނުފެނެއެވެ. އޭނާގެ މޫނުމަތިން ފެންނަނީ އުންމީދެއްގެ ކުލަވަރެކެވެ. ޝާނާ ރޮމުން ގިސްލަމުން ދިޔައީ އޭނާގެ ހިތުން ދުޢާކުރަމުންނެވެ. އޭނާގެ ފާފަ ފުއްސަވާ މައިންބަފައިންނަށް ހެޔޮ ދުއާކުރަމުންނެވެ. ދޮވެފައި ހުއްޓަސް ޝާނާގެ ސިކުނޑިން ހެޔޮ ވިސްނުމުގެ ކުޑަ ނަމަވެސް ވިންދެއް ޖަަހަމުން ދިޔައެވެ. އެ ވިސްނުމުގައި މިއީ ޝަހީދުވުން ނޫން ކަމާއި މިއީ ހަރުކަށިކަން ކަން ކޮންމެވެސްވަރަކަށް ޝާނާއަށް ވިސްނެމުން ދިޔައެވެ. އޭނާގެ ޅަފަތުގެ ދުވަސްވަރާއި އޭނާއާއި މިސްހާތާއި ދެމެދު ދެކެވިފައި ހުރި ވާހަކަތައް ޝާނާ ހަނދާންވަމުން ދިޔައެވެ.

ކުއްލިއަކަށް ބާރުގަދަ އަޑަކާއި އެކު މުޅި ތަން ފުނޑުފުނޑުވެއްޖެއެވެ. ހަފުސްވެ ބިމު ހުރި ވެއްޔަށް ވެއްޖެއެވެ. މީހެއްގެ ހަށިގަނޑެއް އަޅިގަނޑެއް ވަތްކެއް ނުވެއެވެ. ޝާނާއާއި ހާޖަރުވެސް މަރުވީއެވެ. ހާޖަރުގެ ދަންޖާލުގައި ޖެހި ޝާނާގެ ދިރިއުޅުން ނިމުނީއެވެ. އެކަން ދެނަހުރި މީހަކު ނެތެވެ.

ދުވަސްތައް ފާއިތުވަމުން ގޮސް ޝާނާގެ ހަބަރެއް ނުވެ އެތައް ދުވަހެއް ވުމަށްފަހުގައިވެސް އޭނާ ހޯދާ ނުފެނުވެ. އެންމެފަހުން ގެއްލުނީ ކަމަށް ނިންމާ ސިއްކަ ޖެހިއެވެ. ޝާނާގެ މައިންބަފައިންނަށް ޔަގީންވި އެއް ކަމަކީ ޝާނާ ދިޔައީ ސުކޫލު ދަތުރެއްގައި ނޫންކަމެވެ. އެއީ ބަޔަކު ޝާނާގެ ސިކުނޑި ދޮވެލައިގެން ބަޔަކު މީހުންގެ ދަންޖާލުގައި ޖައްސައިގެން ބަޔަކު ކުރުވި ކަމެކެވެ. ޝާނާގެ މައިންބަފައިންގެ ހިތުގައި އެބަޔަކަށް ނަފްތަރުވަނީ އުފެދިފައެވެ. އަދި ދުވަހަކުވެސް މާފެއް ކުރުމެއް ނެތެވެ. މޮޅިވެރި ކަމުގައި ދުވަސްތައް ގުނަމުން ދިޔަ މިސްހާތު އައު ހަޔާތަކަށް ދިރުން ގެނުވަން އެހެން ފަސްގަނޑެއްގައި އައު އޮށެއް އިނދިއެވެ.

ނިމުނީ......