އިންޑިއާގެ ޓެމިލް ނާޑޫ ސްޓޭޓްގެ ޗީފް މިނިސްޓަރު އަދި މަޝްހޫރު ފިލްމީ ތަރި ސީ. ޖޯސެފް ވިޖޭ (ތަލަޕަތީ ވިޖޭ)، އެ ސްޓޭޓްގައި ދިރިއުޅޭ މުސްލިމް އަންހެން ކުދިންނަށް ހިލޭ ކިޔެވޭނެ އިންތިޒާމު ހަމަޖައްސަވައިދެއްވަން ނިންމަވައިފިއެވެ. އޭނާ މިކަން އިއުލާނު ކުރެއްވީ، ރައްޔިތުންނަށް ފައިދާހުރި ގިނަ ކަންތައްތަކެއް ކޮށްދެއްވުމަށް ފަށްޓަވާފައިވާ މަސައްކަތްތަކުގެ ތެރެއިން، މުސްލިމް އަންހެން ކުދިންގެ ތައުލީމަށް ހާއްސަ އެހީތެރިކަމެއް ފޯރުކޮށްދެއްވުމުގެ ގޮތުންނެވެ.
މި ނިންމެވުމުގެ ދަށުން، މަތީ ތައުލީމު ހާސިލުކުރަން ބޭނުންވާ މުސްލިމް އަންހެން ދަރިވަރުންގެ ކިޔެވުމުގެ ފީ އެއްކޮށް ދައްކައިދޭނީ ސަރުކާރުންނެވެ. އެގޮތުން ސަރުކާރުގެ ކޯޓާތަކުން ޖާގަ ހޯދާ ކުދިންނާއި، ސަރުކާރުގެ އެހީގައި ހިންގާ ކޮލެޖުތަކުގެ އިތުރުން އަމިއްލަ ހަރަދުގައި ހިންގާ އިންސްޓިޓިއުޓްތަކުގައި ކިޔަވާ މުސްލިމް އަންހެން ކުދިންނަށް ވެސް މި އެހީތެރިކަން ލިބިގެންދާނެއެވެ.
މިއީ ފިލްމީ ދާއިރާގައި ގިނަ ބައެއްގެ މަގުބޫލުކަން ހޯއްދެވުމަށްފަހު، ސިޔާސީ މައިދާނަށް ނުކުމެވަޑައިގެން ޗީފް މިނިސްޓަރުގެ މަގާމާ ހަވާލުވެވަޑައިގަތުމަށްފަހު ވިޖޭ ނިންމެވި ވަރަށް މުހިންމު ނިންމެވުމެކެވެ. މީގެ ކުރިން ވެސް އޭނާ ވަނީ އާންމު ރައްޔިތުންގެ ދިރިއުޅުމުގެ ފެންވަރު ރަނގަޅު ކުރުމަށް ގިނަ މަސައްކަތްތަކެއް ފައްޓަވާނެ ކަމަށް ވިދާޅުވެފައެވެ. މި މަސައްކަތްތަކުގެ ތެރެއިން މައިނޯރިޓީތަކަށް، ހާއްސަކޮށް މުސްލިމުންނަށް އަމާޒުކޮށްގެން މިފަދަ ފުރުސަތެއް ފަހިކޮށްދެއްވުމަކީ ގިނަ ބަޔަކު ބަލައިގަންނަ ކަމެކެވެ.
މި ޕްރޮގްރާމާ ގުޅޭގޮތުން ޗީފް މިނިސްޓަރުގެ އޮފީހުން ބުނީ، މިއީ އާއިލާތަކަށް އުފުލަންޖެހިފައިވާ މާލީ ބުރަ ކުޑަކޮށްދީ، މުސްލިމް އަންހެން ކުދިން މަތީ ތައުލީމަށް އަހުލުވެރިކުރުވުމަށް އެޅުނު ވަރަށް މުހިންމު ފިޔަވަޅެއް ކަމަށެވެ. އަދި މި ފުރުސަތުގެ ސަބަބުން ގިނަ އަދަދެއްގެ މުސްލިމް އަންހެން ކުދިންނަށް މަތީ ތައުލީމު ހާސިލުކުރުމުގެ މަގު ފަހިވެގެންދާނެ ކަމަށް ވެސް ވިޖޭ ވަނީ ވިދާޅުވެފައެވެ.
މުސްލިމް އަންހެން ކުދިންނަށް އަމާޒުކޮށްގެން ފެށި މި ހާއްސަ އެހީގެ ޕްރޮގްރާމާއެކު، ޓެމިލް ނާޑޫގައި އަންހެނުން ބާރުވެރިކުރުވުމަށް ސަރުކާރުން ކުރާ މަސައްކަތްތަކަށް އިތުރު ކުރިއެރުމެއް ލިބޭނެއެވެ. އަދި މިއީ ވިޖޭގެ ސަރުކާރުން ރައްޔިތުންގެ މެދުގައި ތަފާތުކުރުމެއް ނެތި ހަމަހަމަ ފުރުސަތުތަކެއް ހޯދައިދިނުމަށް ކުރަމުންދާ މަސައްކަތުގެ މުހިންމު މިސާލެއް ކަމަށް އިންޑިއާގެ ނޫސްތަކުން ވަނީ ފާހަގަކޮށްފައެވެ.