ކުޑައިރު މަޝްހޫރުކަން ހޯދި ތަރި ރާކެލް ލީ، އުމުރުން 14 އަހަރުގައި ޑިސްނީގެ ފިރިހެން މުވައްޒަފަކު އޭނާއަށް ޖިންސީ ގޯނާ ކުރި ކަމަށް ބުނެ ޑިސްނީ ކުންފުންޏާ ދެކޮޅަށް ކޯޓަށް މައްސަލަ ހުށަހަޅައިފިއެވެ. އޭނާ މި މައްސަލަ ހުށަހަޅާފައިވަނީ 2001 ވަނަ އަހަރު ޑިސްނީ ޗެނަލްއިން އުފެއްދި ފިލްމެއް ކުޅުމުގެ ތެރޭގައި ހިނގި ކަންތައްތަކަކާ ގުޅިގެންނެވެ.
ރާކެލް ލީ ކޯޓަށް ހުށަހެޅި މައްސަލައިގައި ބުނެފައިވަނީ، "ދަ ޕޫފް ޕޮއިންޓް" ނަމަކަށް ކިޔާ ފިލްމުގެ ޝޫޓިން ކުރިއަށް ދިޔަ ދުވަސްވަރު އެ ކުންފުނީގެ މުވައްޒަފަކު އޭނާއަށް އޮޅުވާލައިގެން ޖިންސީ ގޯނާ ކޮށްފައިވާ ކަމަށެވެ. އަދި އެ ދުވަސްވަރު އޭނާއަކީ ކުޑަކުއްޖަކަށް ވުމާއެކު، އެކަމުގެ ސަބަބުން ނަފްސާނީ ގޮތުން ބޮޑެތި ގެއްލުންތަކެއް ލިބުނު ކަމަށް އޭނާ ފާހަގަކޮށްފައިވެއެވެ.
މި ދައުވާގައި ޑިސްނީގެ މައްޗަށް ވަނީ އިހުމާލުވުމުގެ ތުހުމަތު ވެސް ކޮށްފައެވެ. އެގޮތުން، ފިލްމު ކުޅުނު ސެޓުގައި ޖިންސީ ފުރައްސާރައިގެ އަމަލުތައް ހިންގުމަށް މަގުފަހިވާ ފަދަ ނުރައްކާތެރި މާހައުލެއް އޮތް ކަމަށާއި، އެކަމުން އޭނާ ސަލާމަތްކޮށްދިނުމަށް ޑިސްނީން އެއްވެސް ފިޔަވަޅެއް އަޅާފައި ނުވާ ކަމަށް އެ މައްސަލައިގައި ބުނެފައިވެއެވެ.
މި ފިލްމަކީ މީގެ 20 ވަރަކަށް އަހަރު ކުރިން ނެރެފައިވާ ފިލްމަކަށް ވާއިރު، މިހާ ދުވަސް ފަހުން މި މައްސަލަ ކޯޓަށް ހުށަހެޅުމުން ގިނަ ބައެއްގެ ސަމާލުކަން ވަނީ މިކަމަށް ލިބިފައެވެ. ނަމަވެސް މި މައްސަލައާ ގުޅިގެން މީޑިއާތަކުން ކުރި ސުވާލުތަކަށް ޑިސްނީން މިހާތަނަށް އެއްވެސް ޖަވާބެއް ދީފައެއް ނުވެއެވެ.
ފަހަކަށް އައިސް ހޮލީވުޑް އަދި ޑިސްނީ ފަދަ ބޮޑެތި ކުންފުނިތަކުގައި ކުޑައިރު މަސައްކަތްކުރި ގިނަ ތަރިންތަކެއް އަންނަނީ އެމީހުންނަށް ކުރިމަތިވި މިފަދަ ޖިންސީ ގޯނާގެ މައްސަލަތައް ފަޅާއަރުވާލަމުންނެވެ. ރާކެލް ލީގެ މި ދައުވާއާއެކު، ކުޑަކުދިން ލައްވައި ފިލްމު ކުޅުވާ ސެޓުތަކުގައި ކުދިންގެ ރައްކާތެރިކަމާ މެދު އަނެއްކާވެސް މިވަނީ ބޮޑެތި ސުވާލުތަކެއް އުފެދިފައެވެ.