ސައުތު ސެންޓްރަލް ޕޮލިސް ރީޖަންގައި ހިމެނޭ ރަށެއްގައި އުމުރުން އެންމެ ތިން އަހަރުގެ ކުޑަކުއްޖަކަށް ޖިންސީ ގޯނާކުރި މައްސަލައެއްގައި އެ ކުއްޖާގެ ބައްޕަ ހައްޔަރުކޮށް، މި އަމަލުގައި ކުއްޖާގެ މަންމަގެ ބައިވެރިވުމެއް އޮތްތޯ ބަލަން ފުލުހުން ތަހުގީގު ފަށައިފިއެވެ.
މި މައްސަލައިގައި ފުލުހުން ހައްޔަރުކޮށްފައިވަނީ އަނިޔާ ލިބުނު ކުއްޖާގެ އުފަން ބައްޕައެވެ. އޭނާ ހައްޔަރުކޮށްފައިވަނީ ތިން އަހަރުގެ ދަރިފުޅަށް ޖިންސީ ގޯނާކުރުމަށް ފަހު، އެ މަންޒަރުތައް ވީޑިއޯ ކޮށްފައިވާކަމުގެ ތުހުމަތުގައެވެ. ފުލުހުން ބުނި ގޮތުގައި މި މައްސަލައާ ގުޅިގެން ކޯޓަށް ހާޒިރުކުރުމުން އޭނާގެ ބަންދަށް މިހާރު ވަނީ 30 ދުވަހުގެ މުއްދަތެއް ދީފައެވެ.
ބައްޕަގެ އިތުރުން، މި މައްސަލައިގައި ކުއްޖާގެ މަންމައަށް ވެސް އެކި ފަރާތްތަކުން އަންނަނީ ބޮޑެތި ތުހުމަތުތަކެއް ކުރަމުންނެވެ. އޭގެ ސަބަބުން، މި ހިތާމަވެރި ހާދިސާ ހިނގުމުގައި މަންމަގެ ބައިވެރިވުން އޮތީ ކިހާ މިންވަރަކަށްތޯ ފުލުހުން މިހާރު އަންނަނީ ބަލަމުންނެވެ. ނަމަވެސް، މި މައްސަލައިގެ ތަހުގީގު ކުރިއަށްދާތީ އިތުރު ތަފްސީލެއް ފުލުހުން އަދި ހާމަކޮށްފައެއް ނުވެއެވެ.
ފުލުހުން މި މައްސަލަ ވަރަށް ސީރިއަސް މައްސަލައެއްގެ ގޮތުގައި ބަލަމުން އައި ނަމަވެސް، މިހާތަނަށް މަންމަ ހައްޔަރުކޮށްފައެއް ނުވެއެވެ. ކުއްޖާގެ ރައްކާތެރިކަން ކަށަވަރުކުރުމަށާއި، ތަހުގީގަށް ބޭނުންވާ މައުލޫމާތު އެއްކުރުމުގެ މަސައްކަތް ކަމާބެހޭ ފަރާތްތަކުން ގުޅިގެން އަންނަނީ ކުރަމުންނެވެ.
މި މައްސަލައަކީ ކުޑަކުއްޖެއްގެ ހައްގުތަކާ ގުޅިފައިވާ ނާޒުކު މައްސަލައަކަށް ވުމާއެކު، ޖެންޑާ މިނިސްޓްރީން ވެސް އަންނަނީ މިކަމުގައި ބަލަންޖެހޭ ކަންކަން ބަލަމުންނެވެ. އަދި އަނިޔާ ލިބުނު ކުއްޖާއަށް ބޭނުންވާ ނަފްސާނީ އަދި އިޖުތިމާއީ އެހީތެރިކަން ފޯރުކޮށްދިނުމުގެ މަސައްކަތްތައް ވެސް އެ މިނިސްޓްރީން ކުރަމުން އަންނަ ކަމަށް މައުލޫމާތު ލިބެއެވެ.