ރާއްޖެއާއި އިސްލާމީ ގައުމުތަކުގެ ވިޔަފާރިއާ ގުޅޭ ޖަމިއްޔާއަކާ ދެމެދު އޮތް ގުޅުން ބަދަހިކުރުމުގެ ގޮތުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި އިސްލާމިކް ޗެމްބަރު އޮފް ކޮމަސް އެންޑް ޑިވެލޮޕްމަންޓް (އައިސީސީޑީ) ގެ ސެކްރެޓަރީ ޖެނެރަލް ޝައިހް ޔޫސުފް ހަސަން ހަލާވީ މިއަދު ހެނދުނު ރައީސް އޮފީހުގައި ބައްދަލުކުރައްވައިފިއެވެ.
ރައީސް އޮފީހުން ބުނީ މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެއްވީ އިސްލާމީ އިގުތިސާދު ކުރިއެރުވުމަށް ދެ ފަރާތް ގުޅިގެން މަސައްކަތް ކުރުމާ ގުޅޭގޮތުން ކަމަށެވެ. އެގޮތުން، ރާއްޖޭގައި ހަލާލް ޓޫރިޒަމް ފުޅާކުރުމަށް ކުރެވެން ހުރި ކަންކަމާ މެދު ދެ ބޭފުޅުން ވަނީ ފުޅާ ދާއިރާއެއްގައި ވާހަކަދައްކަވާފައެވެ.
ހަލާލް ޓޫރިޒަމްގެ އިތުރުން، މެހެމާންދާރީގެ ދާއިރާއިންނާއި ހަލާލް ވިޔަފާރީގެ ދާއިރާއިން އެއްބާރުލުން އިތުރުކުރުމަށް ވެސް މި ބައްދަލުވުމުގައި މަޝްވަރާކުރެއްވިއެވެ. އަދި އިންސާނީ ވަސީލަތްތައް ތަރައްގީކޮށް، ގާބިލުކަން އިތުރުކުރުމަށް އައިސީސީޑީގެ ފަރާތުން ރާއްޖެއަށް ވެދެވެން ހުރި އެހީތެރިކަމާ ގުޅޭގޮތުން ވެސް މަޝްވަރާކުރެއްވި ކަމަށް ރައީސް އޮފީހުން ބުންޏެވެ.
މި ބައްދަލުވުން ނިންމަވާލެއްވުމުގެ ގޮތުން، އައިސީސީޑީގެ ސެކްރެޓަރީ ޖެނެރަލް ވަނީ ރައީސް މުއިއްޒަށް ހާއްސަ ހަދިޔާއެއް އަރުވާފައެވެ. އެއީ އެއްކޮށް އަތުލިޔުމުން ލިޔެފައިވާ ކީރިތި ގުރުއާނުގެ މުސްހަފެކެވެ. ރައީސް ވަނީ މި އަގުހުރި ހަދިޔާއަށްޓަކައި ޝައިހް ޔޫސުފް ހަސަން ހަލާވީއަށް ޝުކުރު އަދާކުރައްވާފައެވެ.
އައިސީސީޑީ އަކީ އިސްލާމީ ގައުމުތަކުގެ މެދުގައި ވިޔަފާރިއާއި އިގުތިސާދީ ގުޅުން ބަދަހިކުރުމަށް މަސައްކަތްކުރާ މުހިންމު ޖަމިއްޔާއެކެވެ. މި ބައްދަލުވުމުގެ ސަބަބުން ރާއްޖެއާއި އިސްލާމީ އެހެން ގައުމުތަކާ ދެމެދު އޮންނަ އިގުތިސާދީ ގުޅުން އިތުރަށް ބަދަހިވެ، ހަލާލް ވިޔަފާރީގެ ދާއިރާއިން ރާއްޖެއަށް އާ ފުރުސަތުތަކެއް ފަހިވެގެންދާނެ ކަމަށް ބެލެވެއެވެ.