ފިންލޭންޑުގައި ޕީއެޗްޑީ ހާސިލުކުރާ ދަރިވަރުންނަށް އެ ކުދިންގެ ސެޓްފިކެޓުގެ އިތުރުން ހާއްސަ ތޮތްޕަކާއި ކަނޑިއެއް ދެއެވެ. މިއީ ތައުލީމީ މިނިވަންކަމާއި ހަގީގަތް ހިމާޔަތްކުރުން ރަމްޒުކޮށްދިނުމުގެ ގޮތުން އެ ގައުމުގެ ޔުނިވާސިޓީތަކުން ދޭ ހާއްސަ ހަދިޔާއެކެވެ.
މިއީ މުޅިން އާ ކަމެއް ނޫނެވެ. ތާރީހީ ގޮތުން ބަލާއިރު، މި ސަގާފަތަކީ 1600ގެ އަހަރުތަކުން ފެށިގެން ފިންލޭންޑުގައި އަމަލުކުރަމުން އަންނަ ވަރަށް ހާއްސަ ކަމެކެވެ. ޒަމާންތަކެއް ވަންދެން މިކަން ކުރަމުން އައި ނަމަވެސް، މި ފަހަކަށް އައިސް ސޯޝަލް މީޑިއާގައި މިކަން ވަނީ ވަރަށް ބޮޑަށް ވައިރަލްވެ، ގިނަ ބައެއްގެ ސަމާލުކަން ހޯދާފައެވެ.
ޕީއެޗްޑީ ނިންމާ ދަރިވަރުންނަށް ދޭ މި ހާއްސަ ކަނޑިއާއި ތޮފި، އެ މީހުންގެ ގްރެޖުއޭޝަން ރަސްމިއްޔާތުގައި ބޭނުންކުރެއެވެ. ރަސްމީ ހެދުމުގައި މި ތަކެތި ބޭނުންކުރުމުން، މިއީ ވަރަށް ހާއްސަ ސިއްރު ޖަމާއަތެއްގެ ގޮތުގައި ގިނަ ބަޔަކަށް ސިފަވެގެން ދެއެވެ. މިއީ ދުނިޔޭގެ އެހެން ގައުމުތަކުން އާންމުކޮށް ފެންނަ ކަމަކަށް ނުވާތީ، މިއީ ވަރަށް ތަފާތު މަންޒަރެކެވެ.
މި ރަސްމިއްޔާތުގައި ދޭ ސިލްކް ތޮތްޕާއި ކަނޑީގެ ފަހަތުގައި ފުން މާނަތަކެއް ވެއެވެ. ކަނޑިން ރަމްޒުކޮށްދެނީ ދޮގާއި ނުބައި ކަންތައްތަކާ ދެކޮޅަށް ހަނގުރާމަކޮށް، ހަގީގަތް ދެމެހެއްޓުމަށް މަސައްކަތް ކުރުމެވެ. އަދި ތޮތްޕަކީ އިލްމީ ގޮތުން ލިބިފައިވާ މިނިވަންކަމާއި، މުޖުތަމައުގައި އެ މީހަކަށް ލިބިގެންވާ ގަދަރުވެރި މަގާމު އަންގައިދޭ ނިޝާނެކެވެ.
ތައުލީމީ ދާއިރާއިން އެންމެ މަތީ ހަރުފަތަށް ވާސިލުވުމުން ލިބޭ މިފަދަ ހާއްސަ ޝަރަފުގެ ސަބަބުން، ގިނަ ބަޔަކު މިހާރު އަންނަނީ ފިންލޭންޑުގައި ޕީއެޗްޑީ ހެދުމަށް ޝައުގުވެރިކަން ފާޅުކުރަމުންނެވެ. އެހެންކަމުން މިއީ ހަމައެކަނި ސެޓްފިކެޓަކަށް ވުރެ ބޮޑަށް، ތައުލީމީ ހަޔާތުގައި ލިބޭނެ އެންމެ ފަހުރުވެރި އެއް ކާމިޔާބީއަށް ވަނީ ވެފައެވެ.]