ކެންޔާގައި އުމުރުން 95 އަހަރުގެ ފިރިހެނަކާއި 90 އަހަރުގެ އަންހެނަކު، 64 އަހަރު ވަންދެން އެކުގައި އުޅުމަށްފަހު، ކައިވެނިކޮށްފިއެވެ.
އިބްރާހިމް އެމްބޯގޯ އަދި ތަބީތާ ވަންގުއި އެމްބޯގޯގެ މި ކައިވެނި އޮތީ ކެންޔާގެ މުކުރުވެއިނީ ސަރަހައްދުގައި ހުންނަ ފައްޅިއެއްގައެވެ.
މި ދެމަފިރިން އެންމެ ފުރަތަމަ ބައްދަލުވެ ލޯބީގެ ގޮތުން ގުޅިފައިވަނީ 1960 ވަނަ އަހަރުއެވެ. އޭގެ ފަހުން އެ ގައުމުގެ ސަގާފަތާ އެއްގޮތަށް ކައިވެނިކޮށްގެން އެކުގައި ދިރިއުޅެމުން ދިޔަ ނަމަވެސް، އެމީހުން ބޭނުންވީ ދެމީހުންގެ މެދުގައި އޮތް ލޯބި ރަމްޒުކޮށްދިނުމަށް ހާއްސަ ހަފުލާއެއް ބޭއްވުމަށެވެ.
ކައިވެނީގެ ހަފުލާގައި އިބްރާހިމް ލައިގެން ހުރީ އަޅި ކުލައިގެ ސޫޓަކާއި ރިހި ކުލައިގެ ޓައީއެކެވެ. އަދި ތަބީތާ ހުރީ ހުދު ކުލައިގެ ތޮތްޕަކާއި ކްރީމް ކުލައިގެ ޖެކެޓެއް ލައިގެންނެވެ. އުމުރުން ދުވަސްވެފައި ތިބި ނަމަވެސް، މި ދެމީހުންގެ މޫނުމަތިން ވެސް ފެންނަން ހުރީ އުފާވެރިކަމާއި ހިނިތުންވުމެވެ.
60 އަހަރަށް ވުރެ ދިގު މުއްދަތަކަށް މި ގުޅުން ދެމެހެއްޓުމުގެ އެންމެ ބޮޑު ސިއްރަކީ ދެމީހުން އެކަކު އަނެކަކަށް ކުރާ އިހުތިރާމާއި، މާފުކުރުމުގެ އާދަ ކަމަށް އެމީހުން ބުންޏެވެ. އަދި މައްސަލައެއް ޖެހުނަސް ވީހާވެސް އަވަހަކަށް އެކަމެއް ހައްލުކޮށް މާފުކުރުމަކީ މި ދެމަފިރިންގެ އުފާވެރި ދިރިއުޅުމުގެ އަސާސެވެ.
މިއަދުގެ ދުނިޔޭގައި ގުޅުންތައް އަވަހަށް ރޫޅެމުންދާ ދުވަސްވަރެއްގައި، މި ދެމަފިރިންގެ ވާހަކަ އަކީ ގިނަ ބަޔަކަށް ލިބުނު ވަރަށް ރަނގަޅު ފިލާވަޅެކެވެ. މިއީ ހަގީގީ ލޯތްބަކީ އުމުރުން ދުވަސްވިޔަސް ފަނޑުވާނެ އެއްޗެއް ނޫންކަމާއި، އުފާވެރިކަން ހޯދުމަށް ވަކި އުމުރެއް ނެތްކަން ސާބިތުކޮށްދިން ވަރަށް ފުރިހަމަ ވާހަކައެކެވެ.