ދަރިންގެ ޢިއްފަތްތެރިކަމަަކީ ކޮންމެ މައަކާއި ބަފައަކު ނުހަނު ރައްކާތެރިވާ އެއްޗެކެވެ. އެހެނަސް އެކަން ކުރެވެނީ އެންމެ ރަނގަޅަށްތޯ މިއަދު ސުވާލު ކުރަން މަޖުބޫރުވެއެވެ. ދަރިންގެ ޢިއްފަތްތެރިކަމަށް މައިން ބަފައިން އަރައިގަންނަކަމަށްވާނީ ހަމައެކަނި މައިންބަފައިން އެކަންކުރުމަކުން ނޫނެވެ. ދަރިން ބަލައި، ބޮޑުކުރުމަށްފަހު މައިން ބަފައިން ދަރިންގެ ޢިއްފަތް ނަގައިލުމުގެ ޝަކުވާއަކީ މިހާރަކަށް އައިސް ގިނައިން ކުރެވޭ އެއް ޝަކުވާއެވެ. ބައްޕައިން އެމީހުންގެ ދަރިންގެ އިއްފަތަށް އަރައިގަންނައިރު މައިންމައިން ވެސް އެކަން ކުރާ މަންޒަރު ފެނެއެވެ. އެހެނަސް ދައްކާން މިއުޅެނީ މުޅިއަކުން މި ވާހަކައެއް ނޫނެވެ.

ގިނަ މައިންބަފައިންނަށް މިއަދު ޤަބޫލު ނުކުރެވޭ އެއް ކަމަކީ އަންހެން ދަރިފުޅާއި ހިލޭ ފިރިހެނުން ޖާމިނުކުރުވައިގެން ދަރިންގެ އިއްފަތް ނަގައިލުންވެސް ހިމެނިގެންދާނީ ދަރިންގެ ޢިއްފަތްނަގައިލުންކަމެވެ. އެހެންނަމަވެސް މިއީ މިއަދުގެ މުޖުތަމައުގައި އިންތިހާއަށް ގިނަ ބައެކެވެ.

ހަގީގަތަކީ އެއީ ކިތަންމެ ލަދުވެތިކަމެއް ނަމަވެސް އެކަން ހިނގަނީ އެގޮތަށެވެ. ސުވާލަކީ އަމިއްލަ ދަރިންގެ އިއްފަތްތެރިކަމަށް އަރައިގަތުމަށްފަހު އެދެން އޮތީ ކޮން ސުވަރުގެއެއް ހެއްޔެވެ؟ މިސުވާލު މިކުރަނީ އެކަމުގެ ފާފައިގެ ބޮޑުކަމުންނެވެ. އެއީ އެންމެ ބޮޑެތި ފާފަތަކުގެ ތެރޭގައި ހިމެނޭ ފާފައަކަށްވާތީއެވެ. ﷲ ތަޢާލާ އެންމެ ބޮޑަށް ކޯފާވެވޮޑިގަންނަވާ ކަމަކަށްވާތީއެވެ.

ޤިޔާމަތް ދުވަހު އެކަންކަމާ ޖެހޭނީ ކުރިމަތިލާށެވެ. ޒިންމާ އުފުލާށެވެ. ވީމާ ދަރިން އެމީހުން ބޭނުންހައި ގޮތަކަށް އުޅެން އަދި ދާން ބޭނުންވާހައިތަނަކަށް ދާން މިނިވަންކަމާއިއެކު ދޫކޮށްލުމަކީ ސުވާލު ކުރެވޭނޭ ކަމެކެވެ. އެފަދަ ގޯޅިއަކަށް އެޅި އެއިން ގޯޅިއަކުން އެކުދިން ކުރާ ފާފައިން މައިންބަފައިންނަށް ބައި ބައި އެޅިދާނެއެވެ. އަދި މަގުފަހިކޮށްދިންކަމުގެ ފާފަވެސް އެޅިދާނެއެވެ. 

ހަމައެއާއިއެކު އެފަދަ ނުބައިކަން ބޮޑު ހަޑި މުޑުދާރު އަމަލުތައް ކުރުމަށްފަހު މައިން ބަފައިން މުސްކުޅިވުމުން ދަރިންގެ އަޅައިލުމާއި އެހީތެރިކަމަށްވެސް އެބަ އެދެއެވެ. އެކަމަށް އެބަ އިންތިޒާރުވެސް ކުރެއެވެ. އެހީތެރިކަން ނުލިބުމުން ޝަކުވާވެސް އެބަ ކުރެވެއެވެ. 

މައިން ބަފައިން ކޮންމެ ގޮތަކަށް ކަންތައްތައް ކޮށްފައިވީނަމަވެސް ދަރިންނަށް އޮތީ މައިން ބަފައިންނަށް އޯގާތެރިވުމެވެ. އެހީތެރިވުމެވެ. އެހެންކަމާއިއެކުވެސް ވިސްނައިލާށެވެ. ދަރިންނަކީވެސް އިންސާނުންނެވެ. އެމީހުންގެ ވެސް އޮންނަނީ ހަމަ ހިތެކެވެ. ވީމާ އަނިޔާވެރިވެފައިވާ މައިންބަފައިންނަށް ހެޔޮކޮށް ހިތަން ބޭނުންވި ނަމަވެސް ހުރަސްތަކެއް ހުންނާނެކަން ޤަބޫލުކުރަން ޖެހޭނެއެވެ. 

މިއަދު މިއުޅެނީ ހުރިހާ ކަންކަން ރަނގަޅަށް ކުރުމުން ވެސް ދަރިންގެ އެހީތެރިކަން ނުލިބިގެންނެވެ. ވީމާ މުޅި އުމުރުގައި ހަނދާން ނުނެތޭނެ ފަދަ އަނިޔާތައް ކުރުމަށްފަހު ދަރިންގެ ކިބައިން އެހީތެރިކަން ލިބޭނެ ކަމަށް އުންމީދު ކުރި ނަމަވެސް މަޤްޞަދު ޙާޞިލުވުން ވަރަށް ދުރުވާނެކަން ޤަބޫލުކުރަން ޖެހޭނެއެވެ. 

އަދިވެސް އެއްކަމެއް ފާހަގަކޮށްލާނަމެވެ. މުސްކުޅިވުމުން ދަރިން ތިމާ އާއިއެކު ވަގުތު ހޭދަކުރަން އުންމީދުކުރާ ނަމަ ދަރިން ކުޑައިރު އެކުދިންނަށް ވަގުތުދޭށެވެ. އަޅައިލާށެވެ. އޯގަަތެރިވާށެވެ. ލޯތްބާއި ހަމްދަރުދީވާށެވެ. ފައިސާއިން ދެވޭ އަޅާލުމަށްވުރެ، އޯގާތެރި ކަމުން ދެވޭ އަޅާލުމުގެ ބާރު އެތައް ގުނައަކުން ބޮޑުވާނެއެވެ.