ދުނިޔޭގެ މަޝްހޫރު ޓެކްނޮލޮޖީ ކުންފުނި އެޕަލްއިން ފާއިތުވި ދިހަ އަހަރު ދުވަހުގެ ތެރޭގައި އެ ކުންފުނީގެ ފޯނުތަކުގެ ޑިޒައިނަށް ގެންނަ އެންމެ ބޮޑު ބަދަލާއެކު، އެޕަލްގެ ފުރަތަމަ ފޯލްޑަބަލް ފޯނު "އައިފޯން އަލްޓްރާ" މި މަހުގެ 10 ވަނަ ދުވަހު ނެރުމަށް ތައްޔާރުވެއްޖެއެވެ. މިއީ އެޕަލްގެ އުފެއްދުންތަކަށް ލޯބިކުރާ ފަރާތްތަކުން ވަރަށް ބޮޑަށް އިންތިޒާރު ކުރަމުންދާ ފޯނެކެވެ.
މައުލޫމާތު ލިބިފައިވާ ގޮތުގައި، މި ފޯނު ހުޅުވާލުމުން އޭގެ ބޯމިނުގައި ހުންނާނީ އެންމެ 4.5 މިލިމީޓަރެވެ. ފޯނު އެހާ ބޮޑަށް ތުނިވުމުގެ ސަބަބުން ފޭސް އައިޑީއަށް ބޭނުންވާ ބޮޑެތި ސެންސަރުތައް ހަރުކުރުމަށް އެތެރޭގެ ސްކްރީނުގައި އަދި ބޭރުގެ ސްކްރީނުގައިވެސް ޖާގަ ނެތުމާއެކު، އެޕަލްއިން ވަނީ މި ފޯނުގައި ފިންގަޕްރިންޓް ސްކޭނަރެއް ހިމެނުމަށް ނިންމާފައެވެ. މި ސްކޭނަރު އިންނާނީ ފޯނުގެ އަރިމަތީގައެވެ.
މިއީ 2017 ވަނަ އަހަރު ނެރުނު އައިފޯން އެކްސް އަށް ފަހު، ފޭސް އައިޑީ ނުހިމަނައި އެޕަލްއިން ނެރޭ ފުރަތަމަ ފޯނެވެ. ފޭސް އައިޑީގެ ބަދަލުގައި މި ފޯނުގައި ބޭނުންކުރާނީ އެންޑްރޮއިޑް ފޯނުތަކުގައިވެސް އާންމުކޮށް ފެންނަ ފަދަ "ހޯލް-ޕަންޗް" ކެމެރާ ޑިސްޕްލޭއެކެވެ. އެގޮތުން ބޭރު ސްކްރީނުގެ މެދުގައި ކެމެރާ އިންނައިރު، އެތެރޭގެ ފަތްޖެހޭ ސްކްރީނުގެ ކެމެރާ އިންނާނީ ކަނާތްފަރާތު މަތީ ކަނުގައެވެ.
ޓެކްނޮލޮޖީ ދާއިރާގެ ތަޖުރިބާކާރުން ބުނާ ގޮތުގައި، ނޮޗް ޑިސްޕްލޭ ދޫކޮށްލުމަށްފަހު ހޯލް-ޕަންޗް ޑިސްޕްލޭއަކަށް ބަދަލުކުރުމަކީ ފޯލްޑަބަލް ފޯނުތައް އުފެއްދުމުގައި އިންޖިނޭރުންނަށް ކުރިމަތިވާ ވަރަށް ބޮޑު ގޮންޖެހުމެކެވެ. ލީކުވެފައިވާ އައިފޯން އަލްޓްރާގެ ސްކްރީން ކަވަރުތަކުގެ ފޮޓޯތަކުންވެސް، އެޕަލްގެ ޑިޒައިނަށް މި އަންނަ ބޮޑު ބަދަލު ވަރަށް ރަނގަޅަށް ހާމަވެގެންދެއެވެ.
އެޕަލްގެ ފޯނުތަކުގެ އެންމެ ހާއްސަ އެއް ސިފަ ކަމަށްވާ ފޭސް އައިޑީ ދޫކޮށްލުމުން، ފޯނު ވަރަށް ބޮޑަށް ތުނިކޮށްލެވޭނެއެވެ. ނަމަވެސް މީގެ ސަބަބުން ފާއިތުވި އަހަރުތަކުގައި އެޕަލްގެ ފޯނުތައް އެހެން ފޯނުތަކާ ތަފާތުކޮށްދިން މުހިންމު ސިފައެއް ގެއްލިގެންދާނެ ކަމަށް ގިނަ ބަޔަކު ގަބޫލުކުރެއެވެ.