މަސްތުވާތަކެތީގެ މައްސަލައެއް ސާބިތުވުމާ ގުޅިގެން، މިސްރުގެ ޓީވީ ޕްރެޒެންޓަރު ސާރާ ހަލީފާ ދަންޖައްސައި މެރުމަށް އެ ގައުމުގެ ކޯޓަކުން ހުކުމްކޮށްފިއެވެ.
ސާރާ ހަލީފާގެ އިތުރުން މި މައްސަލައިގައި އިތުރު އެގާރަ މީހެއްގެ މައްޗަށް ވެސް ކޯޓުން ވަނީ މަރުގެ އަދަބު ކަނޑައަޅާފައެވެ. މި ހުރިހާ އެންމެންނަށް ވެސް އިއްވާފައިވަނީ ދަންޖައްސައިގެން މަރުގެ އަދަބު ތަންފީޒުކުރުމަށެވެ.
މި ބާރަ މީހުންގެ މައްޗަށް މަރުގެ ހުކުމް އިއްވާފައިވަނީ، ގައުމަށް މަސްތުވާތަކެތި އެތެރެކޮށް އޭގެ ވިޔަފާރިކުރި ކަމުގެ ކުށް ޝަރީއަތަށް ސާބިތުވުމާ ގުޅިގެންނެވެ. މިއީ ފަހުގެ ތާރީހެއްގައި މީޑިއާގެ ދާއިރާގައި މަސައްކަތްކުރާ މަޝްހޫރު ފަރާތެއްގެ މައްޗަށް މިފަދަ ބޮޑު ހުކުމެއް މިސްރުގައި އިއްވި ފުރަތަމަ ފަހަރެވެ.
މިސްރުގެ ޝަރުއީ ނިޒާމުން ބުނާ ގޮތުގައި، މަސްތުވާތަކެތީގެ ނެޓްވޯކްތަކާ ދެކޮޅަށް އެ ގައުމުން ގެންގުޅެނީ ވަރަށް ހަރުކަށި ސިޔާސަތެކެވެ. އެގޮތުން މި މައްސަލައިގައި ވެސް ކޯޓުން ނިންމީ މުޖުތަމައުގެ ސަލާމަތަށްޓަކައި އެންމެ ހަރުކަށި އަދަބު ދިނުމަށް ކަމަށް ރިޕޯޓުތައް ބުނެއެވެ.
މިސްރަކީ މަސްތުވާތަކެތީގެ ކުށްތަކަށް ދުނިޔޭގައި ވެސް އެންމެ ބޮޑެތި އަދަބުތައް ދެމުން އަންނަ އެއް ގައުމެވެ. އެ ގައުމުގެ ގާނޫނުތައް އޮންނަ ގޮތުން، ގިނަ އަދަދަކަށް މަސްތުވާތަކެތި ޓްރެފިކްކުރާ މީހުންނާއި އޭގެ ވިޔަފާރިކުރާ މީހުންނަށް އާންމުކޮށް ކަނޑައަޅަނީ މަރުގެ އަދަބެވެ.