ދުނިޔޭގައި އުޅެން ލިބޭނީ ކިހައި ދުވަހެއްކަން ހަމަ އެކަކަށްވެސް ނޭނގޭނެއެވެ. އެހެންކަމުން މި ކުރު މުއްދަތުގެ ގިނަ ވަގުތުތައް ބޭކާރުކޮށްފިނަމަ އާޚިރަތް ހޯދޭނީ ކިހިނަކުން ތޯ އަމިއްލަ ނަފްސާއި ސުވާލު ކުރުން ވަރަށްވެސް މުހިންމެވެ. އެވެނި މިވެނި މީހެެއް ކުރާ އަމަލުތަކަށް ތިމާ ވާހަކަ ދެއްކުމުގެ ބަދަލުގައި ތިމާ އަށް އެކަން ކުރެވޭ ގޮތާއި އެކަމަށް ހޭދަކުރެވޭ ވަގުތު ބެލުން ވަރަށްވެސް މުހިންމެވެ.

ގިނަ ބައެއްގެ ދެދުނިޔޭގެ ބާއްޖަވެރިކަން ގެއްލެނީ، ތިމާއާއި ނުބެހޭ، އެހެން މީހުންގެ ކަންކަމާއި ބެހެން ހަދައިގެންނެވެ. ތިމާއަށް ފައިދާކުރާނެ ކަންކަމަށްވުރެ އެހެން މީހުންގެ ކުށް ހޯދާ ދައްކަން ހަދައިގެންނެވެ. އެކަމަށް ހޭދަކުރާ ވަގުތު ގިނަވުމުން ތިމާ ކޮންމެހެން ކުރަންޖެހޭ ކަންކަމަށް ވަގުތު ނުދެވުމުގެ ސަބަބުންނެވެ. 

ވަގުތަކީ އަޅުކަމުގެ ބައެއް ކަމަށް ބުނެވިދާނެކަމަށް ބައެއް ޢިލްމުވެރިން ވިދާޅުވެއެވެ. އެއީ އަޅުކަން ކުރެވޭނީ ވަގުތު ހޭދަކޮށްގެން ކަމުގައިވާތީއެވެ. ވީމާ ވަގުތާއި އަޅުކަމާއި ވަނީ ވަރަށް ބޮޑަށް ގުޅި ލާމެހިފައެވެ. ގެއްލިއްޖެ ވަގުތެއް އަނބުރާ ނުލިބޭނޭ ބުނެ އުޅެނީ ވަގުތުގެ މުހިންމުކަން އިންސާނާއަށް ވަޒަންކޮށްދިނުމަށެވެ. މާނައަކީ ކޮންމެ ދުވަހަކީ ވީހައި ގިނައިން ހެޔޮ އަމަލުކުރާ ދުވަހަކަށް ހެދުމަށް ގަދައަޅައި މަސައްކަތްކޮށްގެން ނޫނީ އާޚިރަތެއް ނުހޯދޭނެއެވެ. އެހެން މީހުންގެ ކަންކަމާއި ނުބެހި ތިމާގެ ހަޔާތަށް އާރޯކަން ލިބޭތޯ މަސައްކަތް ކުރުމަކީ ދުނިޔޭގެ ބާއްޖަވެރިކަމަށްވެސް އޮތް ފަހި މަގެކެވެ. އާޚީރަތް ނުހޯދޭ މީހާއަކީ އެންމެ ބޮޑު އަބާއްޖަވެރިޔާއެވެ.

ދުނިޔެ އާއި އާޚިރަތް ކާމިޔާބުކުރަން ބޭނުން ނަމަ އެންމެ ބޮޑަށް ސަމާލުކަން ދޭން ޖެހޭނެ ދެ ކަމެއް ވެއެވެ. ފުރަތަމަ ކަމަކީ ކުރަން އުޅޭ ކަންކަމަށް ދޭން ޖެހޭ ސަމާލުކަން ދިނުމާއި އާޚިރަތުގައި ފައިދާ ނުކުރާނެ އެއްވެސް ކަމެއް ނުކުރުމެވެ. ދެވަނަ ކަމަކީ ވަގުތު އިސްރާފު ނުކުރުމާއި ލިބޭ ވަގުތުގެ ބޭނުން ހެޔޮގޮތުގައި ހިފުމެވެ. 

އަހަރެމެންގެ ތެރެއިން ގިނަ މީހުންނަކީ ދުވާލަކު 6 ގަޑިއިރާއި 8 ގަދި އިރާއި ދެމެދުގެ ވަގުތެއްގައި ނިދާ އުޅޭ ބައެކެވެ. އަދި އެއަށްވުރެ ގިނައިން ނިދާ މީހުންވެސް މަދެއް ނޫނެވެ. ވީމާ ދުވާލުގެ 24 ގަޑިއިރުގެ ތެރެއިން ހޭލައި ހުރެވެނީ 17 ވަރަކަށް ގަޑިއިރު ކަމަށް ބަލާށެވެ. އެ 17 ގަޑިއިރުގެ ތެރެއިން ގިނަ ވަގުތުތަކުގައި ތިމާގެ ވިސްނުން ބޭކާރު ކަންކަމުގައި ހޭދަކުރާނަމަ ދެން ވާނީ ކިހިނެއް ހެއްޔެވެ؟ އޭގެ ބަދަލުގައި ތިމާއަށް ފައިދާހުރި ކަންކަމަށް ވިސްނަން ނޫނީ ވަގުތު ހޭދަނުކުރާށެވެ.

ތިމާގެ ކަންކަން އިސްލާހު ނުކޮށް، އެހެން މީހުންގެ ކަންކަމާ އުޅުމަކީ ތިމާގެ ވަގުތު އިސްރާފު ކުރުމުވެ. ވަގުތު އިސްރާފު ކުރުމަކީ ފާފައެއްވެސް މެއެވެ. އެހެން ކަމުން ދެ ދުނިޔޭގެ ބާއްޖަވެރިކަން އެދޭނަމަ ވަގުތަށް ކަމޭ ހިތާށެވެ. ވަގުތަށް ފަރުވާތެރި ވާށެވެ.