ވޭތުވެދިޔަ ހަފުތާގެ ތެރޭގައި މާލެ ސަރަހައްދުން ހިމަބިހީގެ އިތުރު 12 ކޭސް ފެނި، ރާއްޖެއިން މި ބަލި ޖެހުނު މީހުންގެ ޖުމްލަ އަދަދު 264 އަށް އަރައިފި ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ހާމަކުރި ތަފާސްހިސާބުތަކަށް ބަލާއިރު، މިދިޔަ ހަފުތާގައި 12 މީހަކު މި ބައްޔަށް ޕޮޒިޓިވްވި ނަމަވެސް، ކުރީ ހަފުތާތަކާ އަޅާބަލާއިރު ބަލި ޖެހިގެން ރިޕޯޓުކުރާ މީހުންގެ ނިސްބަތް މިހާރު ވަނީ ދަށްވާން ފަށާފައެވެ. ރާއްޖެއިން ހިމަބިހި ނައްތާލާފައި އޮތުމަށްފަހު އަލުން ކޭސްތަކެއް ފެނުމާއެކު، ސިއްހީ އިދާރާތަކުން އަންނަނީ ޑަބްލިއުއެޗްއޯގެ މިންގަނޑުތަކާ އެއްގޮތަށް އަވަސް ފިޔަވަޅުތަކެއް އަޅަމުންނެވެ.
އެގޮތުން ބަލި ޖެހިފައިވާ މީހުން ދެނެގަތުމާއި، އެ މީހުންނާ ކޮންޓެކްޓްވި ފަރާތްތައް ހޯދައި ވެކްސިން ދިނުމުގެ އިތުރުން، އާންމުން ހޭލުންތެރިކުރުވުމުގެ މަސައްކަތް ވަނީ ވަރުގަދަކޮށްފައެވެ. އަދި ބަލިން ރައްކާތެރިވުމަށްޓަކައި ވެކްސިން ފުރިހަމަކޮށްފައިވާކަން ކަށަވަރުނުވާ ފަރާތްތަކަށް ހާއްސަކޮށްގެން ހިންގި ޕްރޮގްރާމުގެ ދަށުން މިހާތަނަށް 16،320 މީހުންނަށް ވެކްސިން ދީފައިވާ ކަމަށް އެޗްޕީއޭ އިން ބުންޏެވެ.
މި ބައްޔަކީ ފަސޭހައިން ގައިންގަޔަށް އަރާ ބައްޔަކަށްވާތީ، ހުން އައިސް ގައިގައި ރަތް ބިހިތަކެއް ނަގައިފިނަމަ ލަސްނުކޮށް ސިއްހީ ފަރުވާ ހޯދުމަށް ވަނީ އިލްތިމާސްކޮށްފައެވެ. އަދި ހުމާއި ރޯގާގެ އަލާމާތެއް ހުރިނަމަ އާންމު ދަތުރުފަތުރުގެ ވަސީލަތްތައް ބޭނުންކުރާއިރު އަދި ހޮސްޕިޓަލްތަކަށް ދާއިރު މާސްކު އެޅުމަށާއި، ބައްޔަށް ޝައްކުކުރެވޭނަމަ ޓެސްޓުގެ ނަތީޖާ ލިބެންދެން އެކަހެރިވެ ތިބުމަށް އެ އެޖެންސީން އިރުޝާދު ދެއެވެ.
ހިމަބިހި ފެތުރުން ހުއްޓުވުމަށްޓަކައި އެޅި ހަރުދަނާ ފިޔަވަޅުތަކާއެކު މިހާރު ބަލިޖެހޭ މީހުންގެ އަދަދު މަދުވަމުން އައި ނަމަވެސް، ބަލީގެ އެއްވެސް އަލާމާތެއް ފެނިއްޖެނަމަ މީހުން އެއްވެ އުޅޭ ތަންތަނަށް ނުދިއުމާއި، ސިއްހީ އިރުޝާދުތަކަށް ފުރިހަމައަށް އަމަލުކުރުމަކީ މި ދަނޑިވަޅުގައި ކޮންމެ މީހަކުވެސް ސަމާލުކަން ދޭންޖެހޭ މުހިންމު ކަމެކެވެ.