ކުރީގެ ރައީސުންނަށް ދޭ އިނާޔަތްތަކާއި ސަރުކާރުން ދޭ ސަބްސިޑީ ފަދަ މުހިންމު ކަންކަމަށް ހާއްސަކޮށްފައިވާ "ސްޕެޝަލް ބަޖެޓުން" މިހާތަނަށް 20.5 ބިލިއަން ރުފިޔާ ހަރަދުވެފައިވާ ކަމަށް ފިނޭންސް މިނިސްޓްރީގެ އެންމެ ފަހުގެ ހިސާބުތަކުން ދައްކައިފި އެވެ. މި މަހުގެ ތިންވަނަ ދުވަހުގެ ނިޔަލަށް ދައުލަތުން ކޮށްފައިވާ ހަރަދުތަކުގެ ތަފުސީލު ހާމަކޮށް އެ މިނިސްޓްރީން އާންމުކުރި ރިޕޯޓުގައިވާ ގޮތުން، މިއީ އެ ބަޖެޓުގެ ބޮޑު އިންސައްތައެއް ހިމެނޭ އަދަދެކެވެ.
ސްޕެޝަލް ބަޖެޓަކީ ފިނޭންސް މިނިސްޓްރީގެ ބެލުމުގެ ދަށުން ވަކިން ބަލަހައްޓަމުން އަންނަ ހާއްސަ ބަޖެޓެކެވެ. މި ބަޖެޓުގެ ތެރޭގައި އާންމު ރައްޔިތުންނަށް ފޯރުކޮށްދޭ ތަފާތު ސަބްސިޑީތަކުގެ އިތުރުން، ސަރުކާރު ހިއްސާވާ ކުންފުނިތައް ހިންގުމަށް ދޭ އެހީތެރިކަމާއި އެކި ކަންކަމަށް ބޭނުންވާ ފައިސާ ހިމެނެ އެވެ. އަދި ދައުލަތުގެ ނިޒާމުގެ ތެރެއިން ހަމަޖައްސަންޖެހޭ މުހިންމު އެތައް ހަރަދުތަކެއް ވެސް ހިނގަނީ މި ބަޖެޓުގެ ތެރެއިންނެވެ.
މީގެ އިތުރުން ރައްޔިތުންގެ މަޖިލީހުގެ މެންބަރުންނަށް ދައުލަތުން ދޭ އިނާޔަތްތަކާއި، ކުރީގެ ރައީސުލްޖުމްހޫރިއްޔާކަން ކުރައްވާފައިވާ ބޭފުޅުންނަށް ގާނޫނުން ލާޒިމުކުރާ ހަރަދުތަކާއި އިނާޔަތްތައް ދިނުން ވެސް ކުރިއަށްދަނީ މި ބަޖެޓުގެ ދަށުންނެވެ. މިފަދަ ހަރަދުތަކަކީ އަހަރުން އަހަރަށް ބަޖެޓު ކުރެވިގެން ގަވާއިދުން ހިނގަމުން އަންނަ ހަރަދުތަކެއްކަން ފާހަގަކޮށްލެވެ އެވެ.
ފިނޭންސް މިނިސްޓްރީން ހާމަކޮށްފައިވާ މައުލޫމާތުތަކަށް ބަލާއިރު، މި އަހަރަށް ސްޕެޝަލް ބަޖެޓުގެ ގޮތުގައި ޖުމްލަ ކަނޑައަޅާފައިވަނީ 28 ބިލިއަން ރުފިޔާ އެވެ. މި އަހަރުގެ މިހާތަނަށް 20.5 ބިލިއަން ރުފިޔާ ހަރަދުވެފައި ވުމާ އެކު، މުޅި އަހަރުގެ ބަޖެޓުން މިހާރު ބާކީ އޮތީ ގާތްގަނޑަކަށް ހަތް ބިލިއަނެއްހާ ރުފިޔާ އެވެ.
ދައުލަތުގެ މާލީ ހިސާބުތަކަށް ބަލާއިރު، އަހަރުގެ މެދުތެރެއިން ފެށިގެން ހަރަދުތައް ހަމަޖެއްސުމުގައި ހާއްސަ ސަމާލުކަމެއް ދޭންޖެހިފައިވާއިރު، ސްޕެޝަލް ބަޖެޓުގެ ބޮޑުބައެއް މިހާރު ވަނީ ހޭދަވެފަ އެވެ. ކުރިއަށް އޮތް މަސްތަކުގައި ދައުލަތުގެ ޖުމްލަ ހަރަދުތައް ވަކި މިންގަނޑެއްގައި ހިފެހެއްޓުމަށް މާލީ އިދާރާތަކުން ދަނީ ގިނަ ފިޔަވަޅުތަކެއް އަޅަމުންނެވެ.