ކުއްޖެއްގެ ހިތުގެ އޮޕަރޭޝަނަށް ހާއްސަކޮށްފައި ހުރި ފައިސާއިން މަޝްހޫރު ލަވަކިޔުންތެރިޔާ ބިޔޯންސޭގެ ކޮންސަޓް ޓިކެޓު ގަތް ކަމަށް ބުނެ ސޯޝަލް މީޑިއާގައި ވަރުގަދަ އަޑުތަކެއް ފެތުރިއްޖެ އެވެ.
މި ހާދިސާއާ ގުޅިގެން އެ ކުއްޖާގެ ބައްޕަ، އޭނާގެ އަނބިމީހާ ކައިރިން ވަރިވާން ކޯޓަށް ހުށަހެޅި ކަމަށް ބުނެ އިންޓަނެޓުގައި ވަނީ ބޮޑު ހަލަބޮލިކަމެއް އުފެދިފަ އެވެ.
ޓިކްޓޮކް އަދި އެހެނިހެން ސޯޝަލް މީޑިއާ ޕްލެޓްފޯމުތަކުގައި މި ވާހަކަ ވަރަށް ބާރަށް ފެތުރިގެން ދިޔައިރު، މިކަމާ ގުޅޭ ވީޑިއޯތަކަށް އެތައް ލައްކަ ވިއުސްއެއް ވަނީ ލިބިފަ އެވެ. އަދި އަންހެންމީހާ ކަންތައް ކުރި ގޮތާމެދު އާންމުންގެ މެދުގައި ހޫނު ބަހުސްތަކެއް ހިނގައި، ގިނަ ބައެއްގެ ފާޑުކިޔުން އޭނާއަށް އަމާޒުވި އެވެ.
ނަމަވެސް، މި ހާދިސާ ހިނގި ކަމަށް ބުނާ އެއްވެސް ހެއްކެއް ނުވަތަ ރަސްމީ އެއްވެސް މައުލޫމާތެއް މިހާތަނަށް ފެންނާކަށް ނެތެވެ. މި ހާދިސާ ހިނގީ ކޮން ސިޓީއެއްގައި ކަމެއް، ފަރުވާ ދިން ހޮސްޕިޓަލަކީ ކޮބައިކަމެއް، އަދި އެއްވެސް މީހެއްގެ އަސްލު ނަމެއް ނުވަތަ ކޯޓު ލިޔުމެއް ވެސް އެއްވެސް އިދާރާއަކުން ހާމަކޮށްފައެއް ނުވެ އެވެ.
މި މައްސަލަ ދިރާސާކުރި ފަރާތްތަކުން ފާހަގަކުރި ގޮތުގައި، މި ވާހަކަ އެކި މީހުން ކިޔައިދީފައިވަނީ އެކި ގޮތަށެވެ. އެގޮތުން ބައެއް ޕޯސްޓުތަކުގައި އެއީ އަނބިމީހާ ކަމަށް ބުނާއިރު، އަނެއްބައި ޕޯސްޓުތަކުގައި އެއީ ލޯބިވެރިޔާ ކަމަށް ބުނެފައިވާތީ މިއީ އެއްވެސް އަސްލެއް ނެތް ވާހަކައެއް ކަމަށް ބެލެވެ އެވެ.
މި ހާދިސާއަކީ އެއްވެސް ހަގީގަތެއް އަދި ހެއްކެއް ނެތް ނަމަވެސް، މީހުންގެ ޖަޒުބާތުތަކާ ކުޅެލާ ފަދަ ވާހަކަތައް ސޯޝަލް މީޑިއާގައި ކިހާ ފަސޭހައިން ވައިރަލްވެދާނެ ކަމުގެ މިސާލެކެވެ. މައުލޫމާތުގެ ހަގީގަތް ބެލުމެއް ނެތި އިންޓަނެޓުގައި ދައުރުވާ ހަބަރުތައް ގަބޫލުކުރުމަކީ ބޮޑެތި އޮޅުންތަކަކަށް މަގުފަހިވާ ކަމެކެވެ.