ޓެލެގްރާމް ޗެނަލްތަކެއްގައި ދައުރުވަމުންދާ ބަރަހަނާ ވީޑިއޯތަކުން ފެންނަނީ އޭނާ ކަމަށް ބުނެ ބައެއް ނޫސްތަކުގައި ޝާއިއުކޮށްފައިވާ ހަބަރުތަކަކީ އެއްވެސް ހަގީގަތެއް ނެތް ވާހަކަތަކެއް ކަމަށް، ސަންގު ޓީވީގެ ކުރީގެ ނޫސްވެރިޔާ ފާތިމަތު މަދަދާ ބުނެފިއެވެ.
ސޯޝަލް މީޑިއާގައި މިރޭ އާންމުކުރި ބަޔާނެއްގައި އޭނާ ވަނީ، މިއީ އޭނާގެ އަގު ވައްޓާލުމަށްޓަކައި ބަޔަކު ކުރަމުންދާ ނާތަހުޒީބު އަމަލެއްގެ ގޮތުގައި ސިފަކޮށްފައެވެ.
މަދަދާ ނެރުނު ބަޔާނުގައި ފާހަގަކޮށްފައިވާ ގޮތުގައި، ސަރުކާރުގައި ރަޖިސްޓްރީކޮށްފައިވާ ބައެއް ނޫސްތަކުން މިފަދަ ހަބަރެއް ޝާއިއުކުރިއިރު، އެއީ ހަބަރެއްގެ އަސާސީ އޮޅިގަނޑު ގިރާކުރާ ފަދަ މައުލޫމާތެއް ނޫން ކަމަށެވެ. އަދި އާންމު ރައްޔިތުންނާ ގުޅުވައިގެން ބަޔަކު ދައްކާ ތޯތޯ ވާހަކަތަކަކީ ނޫސްވެރިކަމުގެ ހަމަތަކުން ބަލާއިރު ޝާއިއުކުރަން އެކަށީގެންވާ ކަންކަން ނޫން ކަމަށާއި، މި ވާހަކަތަކުގައި އެއްވެސް އަސްލެއް ނެތް ކަމަށް ވެސް އޭނާ ބުންޏެވެ.
އަމިއްލަ ނަފްސުގެ ދިފާއުގައި ވަރަށް ސާބިތުކަމާ އެކު ވާހަކަދައްކަމުން މަދަދާ ބުނީ "އަޅުގަނޑު އެއްވެސް މީހެއްގެ ކުރިމަތީގައި ހާސްވެ ގޮތްހުސްވެދާނޭ ހާލަތަށް ގެންދެވޭނޭ ކަހަލަ، ނުވަތަ އާންމުންގެ ތެރޭގައި ލަދުގަންނަ ހާލަތަށް ހިނގައިދާނޭ ފަދަ އެއްވެސް ފޮޓޯއެއް ނުވަތަ ވީޑިއޯއެއް ނުހުންނާނެ. އަޅުގަނޑުގެ ފުށުން އެފަދަ ފޮޓޯއެއް އެއްވެސް މީހަކަށް ނުލިބޭނެ. އެފަދަ ފޮޓޯއެއް ނުވަތަ ވީޑިއޯއެއް ނަގައިފައި ނުވާނެ. އަދި އެފަދަ ފޮޓޯއެއް ނުވަތަ ވީޑިއޯއެއް އެއްވެސް މީހަކަށް ފޮނުވާފައި ވެސް ނުވާނެ،" ކަމަށެވެ.
މީގެ އިތުރުން މަދަދާ ބުނީ، މިއީ މީގެ އަހަރެއްހާ ދުވަސް ކުރިން ވެސް އޭނާގެ އަގު ވައްޓާލަން އޭއައި ބޭނުންކޮށްގެން އުފައްދައިގެން ދައުރުކުރި ފޮޓޯތަކަކާއި ވީޑިއޯތަކެއް ކަމަށެވެ. އަދި މިހާރު ސޯޝަލް މީޑިއާގައި އަލުން ފަތުރަމުން އެ ދަނީ ވެސް އެ ތަކެތި ކަމަށާއި، އެ ފަދަ ތަކެތި އުފައްދައި ފަތުރާ އަދި އެ ވާހަކަތައް ޝާއިއުކުރާ މީޑިއާތަކުން އެ ކުރަނީ ބަރަހަނާ މަންޒަރު އުފެއްދުމާއި ފެތުރުމުގެ ގާނޫނީ ކުށެއް ކަމަށް ވެސް އޭނާ ބުންޏެވެ.
މި މައްސަލައާ ގުޅިގެން ފުލުހުންގެ ބަހެއް ހޯދުމަށް ނޫސްވެރިން ކުރި މަސައްކަތުން އެނގިފައިވަނީ، މިފަދަ އެއްވެސް މައްސަލައެއްގެ ރިޕޯޓު މިހާތަނަށް ފުލުހުންގެ އިދާރާއަށް ލިބިފައި ނުވާ ކަމަށެވެ. އެހެންކަމުން މި މައްސަލައިގެ އެއްވެސް ރަސްމީ ތަހުގީގެއް އަދި ފުލުހުން ފަށާފައެއް ނުވެއެވެ.