ރާއްޖޭގެ އުތުރުގެ ރަށެއްގައި ކުޑަކުއްޖަކަށް ބުލީކޮށް، ޖިސްމާނީ އަދި ނަފްސާނީ ގޮތުން އަނިޔާކުރި ކަމަށް ތުހުމަތުކުރެވޭ ސީރިއަސް މައްސަލައެއް ފުލުހުން ބަލަން ފަށާފައިވާތީ، އެ ހާދިސާއާ ގުޅޭ އެއްވެސް ވީޑިއޯއެއް މީޑިއާތަކުގައްޔާއި ސޯޝަލް މީޑިއާގައި ދައުރުނުކުރުމަށް ފުލުހުން މިއަދު އެދިއްޖެއެވެ. ފުލުހުން ބުނީ އަޕާ ނޯތު ޕޮލިސް ރީޖަންގައި ހިމެނޭ ރަށެއްގައި މިފަދަ އަނިޔާތަކެއް ދީފައިވާ ކަމަށް ބުނެ އިއްޔެ ރިޕޯޓުކޮށްފައިވާ ކަމަށެވެ.
މި މައްސަލައާ ގުޅިގެން ފުލުހުން ބުނީ، މިއީ ވަރަށް ސީރިއަސް މައްސަލައެއްގެ ގޮތުގައި ބަލަމުން އަންނަ ކަމެއް ކަމަށެވެ. އަދި ކަމާގުޅުންހުރި އެހެނިހެން މުއައްސަސާތަކާ ގުޅިގެން މި ހާދިސާގެ ފުރިހަމަ ތަހުގީގެއް މިހާރު ފަށައިގެން ކުރިއަށްދާ ކަމަށް ވެސް ފުލުހުން މައުލޫމާތު ދެއެވެ.
ހާދިސާއާ ގުޅިގެން ފުލުހުން ވަނީ އާންމު ރައްޔިތުންނާއި މީޑިއާތަކަށް ހާއްސަ އިލްތިމާސެއް ކޮށްފައެވެ. އެގޮތުން، މި ހާދިސާއާ ގުޅޭ އެއްވެސް ވީޑިއޯއެއް ނުވަތަ އަނިޔާ ލިބުނު ކުއްޖާގެ ވަނަވަރު އެނގޭ ފަދަ އެއްވެސް މައުލޫމާތެއް މީސްމީޑިއާގެ އެކި މަންސަތަކުގައްޔާއި އެހެނިހެން މީޑިއާތަކުގައި ޝާއިއުނުކުރުމަށާއި، އެފަދަ ތަކެތި އިތުރަށް ދައުރުނުކުރުމަށް ވަނީ އަންގައިފައެވެ.
ފުލުހުން ފާހަގަކުރި ގޮތުގައި، އަނިޔާ ލިބޭ ކުދިންގެ ވީޑިއޯއާއި މައުލޫމާތު އާންމުކުރުމަކީ އެ ކުދިންގެ ކަރާމާތަށް ބޮޑެތި އުނިކަން އަންނާނެ ކަމެކެވެ. މީގެއިތުރުން، އޭގެ ސަބަބުން ކުއްޖާއަށް ނަފްސާނީ ގޮތުން އިތުރު ބޮޑެތި ގެއްލުންތަކެއް ކުރިމަތިވުމުގެ ފުރުސަތު ބޮޑުވެގެންދާނެ ކަމަށް ވެސް ބުނެފައިވެއެވެ.
ކުޑަކުދިންގެ ރައްކާތެރިކަމާ ގުޅުންހުރި މިފަދަ ނާޒުކު މައްސަލަތަކުގައި މައުލޫމާތު ހިއްސާކުރުމުގައި ހުރިހާ ފަރާތްތަކުން ވެސް ޒިންމާދާރުވުމަކީ މުހިންމު ކަމެއް ކަމަށް ފުލުހުން ހަނދާންކޮށްދެއެވެ. އެހެންކަމުން ކުޑަކުދިންގެ ހައްގުތަކާއި ކަރާމާތް ރައްކާތެރިކުރުމަށްޓަކައި މިފަދަ ކަންކަމުގައި ހާއްސަ ސަމާލުކަމެއް ދިނުމަށް ފުލުހުން ވަނީ ތަކުރާރުކޮށް އިލްތިމާސްކޮށްފައެވެ.