މުމްބާއީގައި ހުންނަ އޭނާގެ ގޭގެ ތެރޭގައި ތޫނު އެއްޗަކުން ދިން ނުރައްކާތެރި ހަމަލާއަށްފަހު، ވަޅިއެއް ފެނުމުން އަދިވެސް ވަރަށް ބޮޑަށް އަސަރުކޮށް ބިރުގަންނަ ކަމަށް ބޮލީވުޑް އެކްޓަރު ސައިފް އަލީ ހާން ބުނެފިއެވެ. ބޮ
މްބޭ ޓައިމްސްއަށް ދިން އިންޓަވިއުއެއްގައި ސައިފް ބުނީ، އެ ހާދިސާއިން އަރައިގަތުމަށް އާއިލާއިން ވަރަށް މަސައްކަތްކުރި ނަމަވެސް، އަދިވެސް އޭގެ ސިހުމުން އޭނާއަށް އެއްކޮށް ސަލާމަތް ނުވެވޭ ކަމަށެވެ.
ސައިފް ފާހަގަކުރި ގޮތުގައި އެ ނާމާން ހާދިސާގެ އެންމެ ބޮޑު ނޭދެވޭ އަސަރެއް ކުރީ އޭނާގެ އަނބިމީހާ ކަރީނާ ކަޕޫރަށެވެ. ކަރީނާއަކީ އަބަދުވެސް ވަރަށް ނާޒުކު އަދި އަވަހަށް އަސަރުކުރާ މިޒާޖެއްގެ މީހަކަށް ވާތީ، އެ ހާލަތުން އަރައިގަތުމުގައި އޭނާއަށް ވަރަށް ބޮޑު ނަފްސާނީ އުނދަގޫތަކަކާ ކުރިމަތިލާން ޖެހުނު ކަމަށް ސައިފް ވަނީ ބުނެފައެވެ.
އެ ހަމަލާގައި ލިބުނު ޒަހަމްތަކާ ގުޅިގެން ސައިފްގެ މައިބަދައަށް ވަނީ ބޮޑެތި ގެއްލުންތަކެއް ލިބިފައެވެ. އަދި އޭނާގެ ހަށިގަނޑަށް ވަޅި ހަރައި އެތައް ޒަހަމްތަކެއް ދީފައިވާއިރު، އެ ވަގުތު ބޭނުންކުރި ވަޅި ބިނދިގެން ދިއުމަކީ ފުރާނަ ސަލާމަތްވުމަށް މެދުވެރިވި މުހިންމު ސަބަބެއް ކަމަށް އޭނާ ގަބޫލުކުރެއެވެ.
އެ ހާދިސާއާ ބެހޭ ގޮތުން އިތުރަށް ވާހަކަދައްކަމުން ސައިފް ބުނީ، "އަހަރެމެން އެ ހާލަތާ ވަރަށް ފުރިހަމައަށް ކުރިމަތިލިން. އެކަމަކު އަދިވެސް އަހަރެން އެކަމުން ސައްތައިން ސައްތަ ސަލާމަތެއް ނުވޭ. ވަޅިއެއް ފެނިއްޖެނަމަ އަދިވެސް އަހަރެންގެ ހަށިގަނޑުން އެކަމަށް ވަގުތުން ރިއެކްޓް ކުރެވޭ،" ކަމަށެވެ.
އެ ހާދިސާ ހިނގި ވަގުތު އޭނާގެ ފުރާނަ ސަލާމަތްވީ ވަރަށް ނަސީބު ރަނގަޅުކަމުން ކަމަށް ސައިފް ދެކެއެވެ. މުޅި އާއިލާއިން އެ ހާދިސާގެ ހަނދާންތަކާ ދުރަށް ދިއުމަށް ކުރިއަށް ފިޔަވަޅު އަޅަމުން ދިޔަ ނަމަވެސް، ކޮންމެ ދުވަހެއްގެ ދިރިއުޅުމުގައި ފެންނަ ބައެއް އާދައިގެ ކަންކަމުގެ ސަބަބުން ވެސް އެ ބިރުވެރި ރޭގެ ހަނދާންތައް އަލުން އާވާ ކަމަށް އޭނާ ވަނީ ފާހަގަކޮށްފައެވެ.