ދުނިޔޭގައި 7000 އަށްވުރެ ގިނަ ބަސް އޮންނަ ކަމަށް ބަހާބެހޭ މާހިރުން ވިދާޅުވެއެވެ. އެކި ލިޔުންތަކުގައި އެކި އަދަދު ފެންނަން ހުރުމުން އަސްލު ސީދާ އަދަދެއް އިނގޭކަށް ނެތެވެ. މި ބަސްތަކުގައި އަދި އެތައް ބައިވަރު ބަހުރުވަ ތަކެއްވެސް ވެއެވެ. އެހެންކަމުން ދުނިޔޭގައި ބޭނުން ކުރެވެމުންދާ ބަސްތަކާއި ބަހުރުވަތަކުގެ ވާހަކަ އަކީ އޭގެ ވާހަކަ ދައްކާ ނިމޭނޭ ވާހަކައެއްނޫނެވެ.

މިހާގިނަ އަދަދެއްގެ ބަސް، މި ދުނިޔޭގައި ބޭނުން ކުރެވޭއިރު، އަޖައިބުކުރަނިވި ކަމެއް ފާހަގަ ވާން އެބައޮތެވެ. ނަމަވެސް މިކަން ފާހަގަ ވާނީ މިކަމާއި ވިސްނާ ފިކުރު ކުރި ބަޔަކަށެވެ. އާދެ! ބަސްތައް ލިޔެއުޅޭ ގޮތެވެ. މި ހުރިހާ ބަސްތަކެއްގެ ތެރެއިން ކަނާތުން ވާތަށް ލިޔަނީ ވަރަށްވެސް މަދު ބަހެކެވެ. މި އީ އެކަމާއި ހައިރާންވާންވީ ވަރުވެ ކަމެއް ކަމަށް ބަޔަކު ނުދެކުނަސް ހަގީގަތުގައި އަހަރެމެން ދިވެހީން މިކަމާ ހައިރާންވުން މުހިންމެވެ. ކަނާތުން ވާތަށް ލިޔާ މަދު ބަސްތަކުގެ ތެރޭގައި އަޅުގަނޑުމެންގެ ދިވެހި ބަސް ހިމެނެއެވެ. މިދެންނެވި އުސޫލުން، ކަނާތުން ވާތަށް ލިޔެ އުޅެނީ އެންމެ 12 ބަހެކެވެ.

މި މަދު ބަސްތަކުގެ ތެރޭގައި ހިމެނެނީ ޢަރަބި، އަރަމައިކް، އަޒެރި، ދިވެހި، ފުލަ، ހިބްރު، ކުރުދިޝް، އެން'ކޯ، ފާރިސީ، ރޮހިންޏާ، ސީރިއަކް އަދި އުރުދޫ ބަހެވެ.

މި ބަސްތަކުގެ ތެރެއިން އެންމެ ގިނަބަޔަކު ބޭނުން ކުރާ ބަހަކީ ޢަރަބި ބަހެވެ. ޢަރަބި ބަހުން ވާހަކަ ދައްކާ ނުވަތަ ލިޔެ އުޅޭ ގާތްގަނޑަކަށް 1.7 ބިލިއަން މީހުން އުޅެއެވެ. އަރަމައިކް ބަހަކީ އިރާގް ތުރުކީ އަދި ސީރިޔާގެ ބައެއް ހިސާބުތަކުގައި ބޭނުން ކުރާ ބަހެކެވެ. އަޒެރި އަކީ އަޖަރްބައިޒާންގެ މީހުން ބޭނުންކޮށް އުޅޭ ބަހެކެވެ. ފުލަ ނުވަތަ ފުލަނީ ބަހަކީ ހުޅަނގު އެފްރިކާގެ ސަރަހައްދުތަކުގައި ބޭނުން ކުރެވޭ ބަހެކެވެ. ދިވެހި ބަހަކީ އަހަރަމެން ދިވެހީން ބޭނުން ކުރާ ބަހެވެ. ހިބްރީންގެ ބަހަކީ އަސްލު އިސްރާއީލު ބާގައިގެ މީހުންގެ ބަހެކެވެ. މިއީ ކަން'އާނީންގެ ބަސްތަކުންގެ މިއަދާ ޖެހެންދެން ބޭނުން ކުރެވޭ ހަމައެކަނި ބަހެވެ.

އަހަރެމެން ދިވެހިން ފަހުރުވެރިވާ ދިވެހި ބަހަކީ މި ތަފާތު، މަދު ބަސްތަކުގެ ތެރެއިންވާ ބަހެކެވެ. މިކަން އަހަރެމެންގެ ގިނަ ބަޔަކަށް ނޭނގިފައި އޮތުމަކީ އެކަށީގެންވާ ކަމެކެވެ. އެހެން ކަމުން މި މައުލޫމާތަކީ ދިވެހީންގެ ހިތްތަކުގައި ދިވެހި ބަހަށް ލޯބި އިތުރުކޮށްދޭނެ މައިލޫމާތެއްކަމުގައި ދެކެމެވެ.