ގަވާއިދުން ކުޅި ކާނާ ބޭނުންކުރުމަކީ އުމުރު ދިގުވުމާ އަދި ހާއްސަކޮށް ހިތުގެ ބަލިތަކުގައި މީހުން މަރުވުމުގެ ނުރައްކާ ބޮޑުތަނުން ދަށްކޮށްދޭ ކަމެއް ކަމަށް ބައިނަލްއަގުވާމީ ފެންވަރުގައި ކުރެވުނު ބޮޑެތި ސައިންޓިފިކް ދިރާސާތަކުން ހާމަވެފައެވެ.
ދުނިޔޭގެ މަޝްހޫރު މެޑިކަލް ޖާނަލް އެއް ކަމަށްވާ "ބްރިޓިޝް މެޑިކަލް ޖާނަލް" (ބީއެމްޖޭ) ގައި 2015 ވަނަ އަހަރު ޝާއިއުކުރި ފުޅާ ދިރާސާއެއްގައި 487,000 އަށްވުރެ ގިނަ ބޮޑެތި މީހުން ބައިވެރިކޮށްގެން ދިރާސާކުރި އެވެ. މި ދިރާސާއިން ދެއްކި ގޮތުގައި، ހަފުތާއަކު 6 ދުވަހު ނުވަތަ 7 ދުވަހު ކުޅި ކާނާ ބޭނުންކުރާ މީހުން، ހަފުތާއަކު އެއް ފަހަރަށް ވުރެ މަދުން ކުޅި ކާ މީހުންނާ އަޅާބަލާއިރު އެކި ސަބަބުތަކާ ހުރެ މަރުވުމުގެ ނުރައްކާ 14 ޕަސެންޓް ކުޑަ އެވެ.
މީގެ އިތުރުން 2021 ވަނަ އަހަރު، 564,000 އަށްވުރެ ގިނަ މީހުންގެ މައުލޫމާތު ހިމަނައިގެން ހެދި މެޓާ-އެނަލިސިސް އަކުން ވެސް މި ނަތީޖާތަކަށް ވަނީ ބާރު ލިބިފަ އެވެ. އެ ދިރާސާއިން ދައްކާ ގޮތުގައި ގަވާއިދުން ކުޅި ކެއުމުގެ ސަބަބުން އާންމުކޮށް މަރުވުމުގެ ފުރުސަތު 12 ޕަސެންޓް ދަށްކޮށްދޭއިރު، ހިތުގެ ބަލިތަކުގައި މީހުން މަރުވުމުގެ ފުރުސަތު 18 ޕަސެންޓް ކުޑަކޮށްދެ އެވެ.
ސައިންސްވެރިން ފާހަގަކުރާ ގޮތުގައި، ކުޅި ކާނާއިން މިފަދަ ބޮޑު ސިއްހީ ރައްކާތެރިކަމެއް ލިއްބައިދެނީ މިރުހުގައި އެކުލެވޭ "ކެޕްސައިސިން" ނަމަކަށް ކިޔާ ބައޯއެކްޓިވް ކެމިކަލް މާއްދާގެ ސަބަބުންނެވެ. މި މާއްދާއަކީ މިރުހަށް ކުޅިރަހަ ގެނެސްދޭ މާއްދާގެ އިތުރުން، ހަށިގަނޑުގައިވާ ޓީއާރުޕީވީ1 ރިސެޕްޓާތައް ހަރަކާތްތެރިކޮށްދީ، މެޓަބޮލިޒަމާއި ލޭހޮޅިތަކުގެ ދުޅަހެޔޮކަމަށް އެތައް ފައިދާތަކެއް ފޯރުކޮށްދޭ މާއްދާއެކެވެ.
އެގޮތުން ކެޕްސައިސިންގެ ސަބަބުން ހަށިގަނޑަށް ލިބޭ މައިގަނޑު ފައިދާތަކަކީ:
ހިތާއި ލޭހޮޅިތަކުގެ ދުޅަހެޔޮކަން: ނައިޓްރިކް އޮކްސައިޑް އުފެއްދުމަށް ބާރުއަޅައި ލޭހޮޅިތައް ހަމައަކަށް އަޅުވައިދިނުމާއެކު، ލޭގެ ޕްރެޝަރު ދަށްކޮށް، ލޭހޮޅިތައް ދުޅަވުމުން ރައްކާތެރިކޮށްދެ އެވެ.
މެޓަބޮލިޒަމް ވަރުގަދަކުރުން: ހަށިގަނޑުގައި ހަކަތަ އަންދާ މިންވަރު މަތިކޮށް، ސަރުބީ ވިރުވުމަށް އެހީތެރިވެދީ، އިންސިއުލިން މަސައްކަތްކުރާ މިންވަރު ރަނގަޅުކޮށްދެ އެވެ.
ގޮހޮރުގެ ސިއްހަތު: ޕްރީބަޔޮޓިކެއްގެ ގޮތުގައި މަސައްކަތްކޮށް، ގޮހޮރަށް ފައިދާހުރި ޖަރާސީމުތައް އިތުރުކޮށްދީ، ގޮހޮރުގެ އެތެރޭގެ ދުލިފަށް ރައްކާތެރިކޮށް ދުޅަހެޔޮކަން ދަމަހައްޓައިދެ އެވެ.
ދިރާސާވެރިން ފާހަގަކުރާ ގޮތުގައި މިއީ ސީދާ ސަބަބާއި ނަތީޖާ ގުޅިފައިވާ ހަމައެކަނި ކަމެއް ކަމަށް ކަނޑައެޅިގެން ނުބުނެވުނު ނަމަވެސް، ކެޕްސައިސިންގެ ސަބަބުން ހަށިގަނޑުގައި އުފެދޭ ދުޅަތައް ކުޑަކޮށް، މެޓަބޮލިޒަމް ހަރުދަނާކޮށްދޭތީ ދިގު މުއްދަތަކަށް ދުޅަހެޔޮ ސިއްހަތެއްގައި ދެމިހުރުމަށް ކުޅި ކާނާއަކީ ވަރަށް މުހިންމު ދައުރެއް އަދާކުރާ އެއްޗެކެވެ.