ރާއްޖޭގެ މަޝްހޫރު މޮޑެލް މަރިޔަމް ނޫރު އޭނާގެ ފުރަތަމަ ދަރިފުޅަށް ބަލިވެއިންކަން، ސޯޝަލް މީޑިއާ މެދުވެރިކޮށް އާންމުކޮށްފި އެވެ.
މި އުފާވެރި ހަބަރު އޭނާ ހިއްސާކޮށްފައި ވަނީ ދިރިއުޅުމަށް އަންނަން އުޅޭ މި ބޮޑު ބަދަލާ މެދު އޮތް އުފާވެރި އިހުސާސްތައް ފާޅުކުރަމުންނެވެ.
މަރިޔަމް ނޫރު މި ހަބަރު އިއުލާންކުރީ ކީރިތި ގުރުއާނުގެ މަރިޔަމް ސޫރަތުގެ ހަތްވަނަ އާޔަތުގެ ތަންކޮޅެއް ހިމަނައިގެންނެވެ. އެއަށްފަހު އޭނާ ލިޔެފައިވާ މެސެޖުގައި ބުނީ، މާތް ﷲ ގެ ކުޅަދުންވަންތަކަމާ އެކު އެ ދެމަފިރިންނަށް އަގުހުރި އަމާނާތެއް ދެއްވަން އުޅޭތީ ޝުކުރުވެރިވާ ކަމަށެވެ.
އޭނާގެ މެސެޖުގައި ވަނީ މިއީ އާ ދިރުމެއް އަދި އާ ލޯތްބެއް ކަމަށް ބުނެ، ދެމަފިރިންގެ ފުރަތަމަ ދަރިފުޅު ވަރަށް އަވަހަށް ދުނިޔެއަށް އުފަންވާނެ ކަމަށް ބަޔާންކޮށްފަ އެވެ. މި ހަބަރާ އެކު އޭނާގެ ގިނަ އަދަދެއްގެ ސަޕޯޓަރުންނާއި މޮޑެލިން ދާއިރާގެ އެކުވެރިން ވަނީ ވަރަށް ހޫނު މަރުހަބާއެއް ކިޔައިފަ އެވެ.
މަރިޔަމް ނޫރު ވަނީ އޭނާގެ ބަނޑުގައިވާ ތުއްތު ދަރިފުޅުގެ ރައްކާތެރިކަމަށް އެދި ދުއާކޮށްފަ އެވެ. އެގޮތުން ލިބެން އުޅޭ ދަރިފުޅަކީ ރަހުމަތުގެ ދަށުގައިވާ، މީހުންގެ ލޯބި ލިބިގެންވާ އަދި ހެޔޮލަފާ ސޯލިހު ކުއްޖެއްގެ ގޮތުގައި ލެއްވުމަށް އެދި އޭނާ ވަނީ ދުއާ ކޮށްފަ އެވެ.
މޮޑެލިން ދާއިރާއިން ބޮޑު މަގުބޫލުކަމެއް ހޯދާފައިވާ މަރިޔަމް ނޫރު، ދިރިއުޅުމުގެ އާ މަރުހަލާއެއް ގިރާކުރަން ތައްޔާރުވަމުން އަންނަ އިރު، އޭނާގެ މި ހާއްސަ ޕޯސްޓަށް މިހާރު ވެސް އަންނަނީ ވަރަށް ގިނަ ބައެއްގެ ލޯތްބާއި ހެޔޮއެދުންތައް އޮހެމުންނެވެ.