ޕާކިސްތާނުގެ ކުރީގެ ޕްރައިމް މިނިސްޓަރު އިމްރާން ހާން ކައިވެންޏަށް އެދިވަޑައިގެންފިނަމަ، އެކަން ގަބޫލުކޮށް އޭނާއާ ކައިވެނިކުރަން ތައްޔާރަށް ހުރި ކަމަށް އިންޑިއާގެ މުނިފޫހިފިލުވުމުގެ ދާއިރާގެ މަޝްހޫރު ތަރި ރާކީ ސާވަންތު ބުނެފިއެވެ.
ސޯޝަލް މީޑިއާގައި މިހާރު ދައުރުވަމުންދާ ވީޑިއޯއެއްގައި ރާކީ ބުނެފައިވަނީ، އިމްރާން ހާންގެ ހުށަހެޅުމެއް ލިބިއްޖެނަމަ ޕާކިސްތާނުގެ ޅީދަރިއަކަށް ވާން އޭނާ ފަސްނުޖެހޭނެ ކަމަށެވެ.
އިމްރާން ހާން މިވަގުތު ޖަލު ހުކުމެއް ތަންފީޒު ކުރައްވަމުން ގެންދަވާކަން ފާހަގަކުރަމުން ރާކީ ބުނީ، އޭނާ ބޭނުންވަނީ އިމްރާން ހާން ޖަލުގައި ހުންނަވަނިކޮށް އެ ކައިވެނި ކުރަން ކަމަށެވެ. އަދި ކައިވެނީގެ ރަސްމިއްޔާތަށް ފަހު، އިމްރާން ހާންއާ އެކު އޭނާ ވެސް ޖަލުގައި ބަންދުކޮށްފައި ބަހައްޓަންވީ ކަމަށް ސަމާސާ މިޒާޖެއްގައި އޭނާ ވަނީ ބުނެފައެވެ.
ސޯޝަލް މީޑިއާގައި މި ވާހަކަތަކުގެ ކްލިޕްތައް އާންމުވުމާ އެކު، ގިނަ ބައެއްގެ ސަމާލުކަން ވަނީ މިކަމަށް ލިބިފައެވެ. އަދި މި ވީޑިއޯއަށް ކޮމެންޓް ކުރި ގިނަ ބަޔަކު ވަނީ މިއީ އާންމުންގެ ސަމާލުކަން ހޯދުމަށް އަބަދުވެސް ތަފާތު ވާހަކަތައް ދައްކާ ރާކީގެ އިތުރު މަޖާ ސްޓަންޓެއްގެ ގޮތުގައި ފާހަގަކޮށްފައެވެ.
"އިމްރާން ހާން އަހަންނަށް ކައިވެނީގެ ހުށަހެޅުމެއް ދީފިއްޔާ އަހަރެން އެކަން ގަބޫލުކުރާނަން،" ވީޑިއޯގައި ރާކީ ބުންޏެވެ. "އަހަރެން ބޭނުންވަނީ އޭނާ ޖަލުގައި ހުއްޓާ ކައިވެނިކުރަން. އަދި ކައިވެންޏަށް ފަހު އަހަރެން ވެސް ޖަލުގައި އޭނާއާ އެކު ބައިންދާ."
މިއީ ހަގީގީ ކައިވެނީގެ ހުށަހެޅުމަކަށް ވުރެ ބޮޑަށް، މަޖަލަކަށް އަދި ސަމާސާއަކަށް ދައްކާފައިވާ ވާހަކަތަކެއް ކަމަށް ބެލެވެއެވެ. ރާކީ ސާވަންތަކީ މީގެ ކުރިން ވެސް ސޯޝަލް މީޑިއާގައި މިފަދަ ހެއްވާ މަޖާ ވާހަކަތަކާއި ބަޔާންތައް ދީގެން އާންމުންގެ ބޮޑު ސަމާލުކަމެއް ހޯދަމުން އަންނަ ފަރާތެކެވެ.