މާލެއާއި އަތޮޅުތަކުގައި ގެދޮރު އެޅުމަށް ދަތިވެފައިވާ ފަރާތްތަކަށް ހާއްސަކޮށްގެން ސަރުކާރުން ތައާރަފުކުރި "ހިޔާވެހި ފައިނޭންސިން ސްކީމް" ގެ ދަށުން 839 ފަރާތަކަށް 1 ބިލިއަނަށް ވުރެ ގިނަ ރުފިޔާގެ ލޯނު ދޫކުރުމަށް އެޕްރޫވްކޮށްފައިވާ ކަމަށް ހައުސިން މިނިސްޓްރީން ހާމަކޮށްފިއެވެ. މި ސްކީމަށް އާންމުންގެ ފަރާތުން ބޮޑު ތަރުހީބެއް ލިބެމުން އަންނައިރު، މިހާތަނަށް ފާސްކުރެވުނު ފައިސާގެ ޖުމްލަ އަދަދު ވަނީ 1,084,537,557 ރުފިޔާއަށް އަރާފައެވެ.
ހައުސިން މިނިސްޓްރީގެ ތަފާސްހިސާބުތަކުން ދައްކާ ގޮތުގައި، މި ސްކީމްގެ ތެރެއިން އެންމެ ބޮޑު ތަރުހީބެއް ލިބިފައިވަނީ އަތޮޅުތަކުގެ ރަށްރަށުގައި ގެދޮރު ބިނާކުރުމަށް ހުޅުވާލި ފުރުސަތަށެވެ. އެގޮތުން ރަށްވެހި ހިޔާވެހި ކެޓަގަރީން 1,329 އެޕްލިކޭޝަން ލިބިފައިވާއިރު، އާބަން ސެންޓަރުތަކަށް ހާއްސަ ސަހަރު ހިޔާވެއްސަށް 586 އެޕްލިކޭޝަން އަދި މާލެ ސަރަހައްދަށް ކަނޑައެޅި ފަހިމާލެ ހިޔާވެއްސަށް 341 އެޕްލިކޭޝަން ވަނީ ހުށަހަޅާފައެވެ.
މި ޕްރޮގްރާމަކީ ރާއްޖޭގެ 3 ބޭންކަކާ ގުޅިގެން އިސްލާމީ އުސޫލުތަކާ އެއްގޮތަށް، އެންމެ 5 ޕަސަންޓުގެ ކުޑަ ފައިދާއެއްގައި ކުރިއަށްގެންދާ ހާއްސަ ފައިނޭންސިން ފުރުސަތެކެވެ. މިއީ ސަރުކާރުން ސީދާ ދޫކުރާ ލޯނަކަށް ނުވި ނަމަވެސް، ރައްޔިތުންނަށް ފަސޭހަކޮށްދިނުމުގެ ގޮތުން ފައިސާ އަނބުރާ ދެއްކުމަށް 25 އަހަރުގެ ދިގު މުއްދަތެއް ކަނޑައަޅާފައިވެއެވެ.
މި ސްކީމް ބަހާލާފައިވަނީ މައިގަނޑު ތިން ބަޔަކަށެވެ. އެއީ އެއްވެސް އިކުއިޓީއަކާ ނުލައި 1 މިލިއަން ރުފިޔާއާ ހަމައަށް ލޯނު ދޫކުރާ ރަށްވެހި ހިޔާވެހި ސްކީމާއި، 5 އިން 10 ޕަސަންޓާ ދެމެދުގެ އިކުއިޓީއަކާއެކު 3 މިލިއަން ރުފިޔާއާ ހަމައަށް ފައިސާ ދޫކުރާ ސަހަރު ހިޔާވެހި ސްކީމްގެ އިތުރުން، 6 މިލިއަން ރުފިޔާއާ ހަމައަށް ފައިނޭންސް ހަމަޖައްސައިދޭ ފަހިމާލެ ހިޔާވެހި ސްކީމެވެ.
ރާއްޖޭގެ ހުރިހާ ސަރަހައްދެއްގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ތަކުލީފުތަކަށް ލުޔެއް ހޯދައިދިނުމަށް މިދިޔަ އަހަރުގެ ނޮވެމްބަރު މަހު ފެށި މި ސްކީމަކީ، މިހާތަނަށް ރާއްޖޭގައި ކުރިއަށްގެންދާ އެންމެ ފުޅާ އަދި އެންމެ ލުއި ހައުސިން ފައިނޭންސިން މަޝްރޫއެވެ. މި މަޝްރޫއުގެ ސަބަބުން މާލީ ދަތިކަމާ ހުރެ ގެދޮރު އެޅުން ހުއްޓިފައިވާ އެތައް ބަޔަކަށް ބޮޑު ހައްލެއް ލިބިގެންދާނެއެވެ.