ސައިންސްވެރިން ކުރި އާ ދިރާސާއަކުން ދައްކާ ގޮތުގައި، އުމުރުން ދުވަސްވަމުންދާއިރު ސިކުނޑީގައި މެނިން ނަމަކަށް ކިޔާ ޕްރޮޓީންއެއް މަދުވުމަކީ ހަށިގަނޑުން އުމުރުން ދުވަސްވުމުގެ ނިޝާންތައް ފެނުމަށް މެދުވެރިވާ މުހިންމު ސަބަބެކެވެ. މީދާތަކެއް ބޭނުންކޮށްގެން ހެދި މި ދިރާސާގައި، ސިކުނޑީގައި މެނިންގެ މިންވަރު ދައްވުމުން ހަނދާން ނެތުމާއި، ކަށިތައް ގިރުމާއި، އަދި ހަމުގެ ބޯމިން ތުނިވުން ފަދަ އުމުރުން ދުވަސްވުމުގެ އަލާމާތްތައް އަވަހަށް ފެންނަކަން ވަނީ ފާހަގަކުރެވިފައެވެ.
ނަމަވެސް، އުމުރުން ދުވަސްވެފައިވާ މީދާތަކުގެ ސިކުނޑީގައި މެނިން ޕްރޮޓީން އަލުން އިއާދަކޮށްދިނުމުން، އުމުރުން ދުވަސްވުމުގެ ސަބަބުން ހަށިގަނޑަށް އައިސްފައިވާ ގިނަ ބަދަލުތަކެއް ވަނީ މަޑުޖެހި، ރަނގަޅުވާން ފަށާފައެވެ. މީގެ ތެރޭގައި ހަނދާންގަދަވުމާއި، ކަށިތަކުގެ ވަރުގަދަކަން އިތުރުވުމުގެ އިތުރުން ހަމުގެ ބޯމިން އަލުން އިއާދަވުން ހިމެނެއެވެ. މިއީ އިންސާނުންގެ އުމުރުން ދުވަސްވުމުގެ މަރުހަލާ ދުޅަހެޔޮކޮށް ދެމެހެއްޓުމަށް އާ ދޮރުތަކެއް ހުޅުވިގެންދިޔަ ކަމެކެވެ.
މީގެއިތުރުން، މެނިން ޕްރޮޓީންގެ ސަބަބުން ޑީ-ސެރީން ނަމަކަށް ކިޔާ އެމިނޯ އެސިޑެއް އުފެއްދުމަށް އެހީތެރިވެދޭކަން ސައިންސްވެރިންނަށް ވަނީ ހޯދިފައެވެ. އުމުރުން ދުވަސްވީ މީދާތަކަށް ޑީ-ސެރީން ދިނުމުން، އެ މީދާތަކުގެ ވިސްނުމާއި ހަނދާން ބަހައްޓާ މިންވަރު އިތުރުވެގެންދިޔަކަން ފާހަގަކުރެވުނެވެ. މިއީ ސިކުނޑީގެ މަސައްކަތްތައް ހަރަކާތްތެރިކޮށް ބެހެއްޓުމަށް ލިބުނު މުހިންމު ކުރިއެރުމެކެވެ.
މި ހޯދުމަކީ ދުޅަހެޔޮ ސިއްހަތެއްގައި އުމުރުން ދުވަސްވުމަށް މަގުފަހިކޮށްދޭނެ އާ ފަރުވާތަކެއް ހޯދުމަށް ލިބުނު ބޮޑު ހިތްވަރެކެވެ. ސައިންސްވެރިން އުއްމީދުކުރަނީ މި ދިރާސާގެ އަލީގައި، އިންސާނުންގެ ސިކުނޑިއާއި ހަށިގަނޑު ރައްކާތެރިކޮށް، އުމުރާއެކު އަންނަ ނޭދެވޭ ބަދަލުތަކުން ސަލާމަތްވުމަށް އެހީތެރިވެދޭނެ އާ ބޭސްތަކެއް ކުރިއަށް އޮތް ތަނުގައި އުފެއްދިގެންދާނެ ކަމަށެވެ.
ހަވާލާ: ސައިންސް ޑެއިލީ 2026.