ރާއްޖޭގެ އެކި ކަންކޮޅުތަކުގައި ގާއިމުކޮށްފައިވާ 267 ސެންޓަރެއްގައި 8،000 އަށް ވުރެ ގިނަ ދަރިވަރުންނާ އެކު މިއަހަރުގެ ސެކަންޑަރީ ސްކޫލް ސެޓްފިކެޓް (އެސްއެސްސީ) އަދި ކޭމްބްރިޖް އޯލެވެލް އިމްތިހާނު މިއަދު ރަސްމީކޮށް ފަށައިފިއެވެ. އެޑިއުކޭޝަން މިނިސްޓްރީން ހާމަކުރި ގޮތުގައި މިއަދު ފުރަތަމަ ފަށާފައި ވަނީ އެސްއެސްސީ ދިވެހި އަދި އިސްލާމް އިމްތިހާނެވެ.
މިނިސްޓްރީން ބުނި ގޮތުގައި އެސްއެސްސީ އިމްތިހާނުގައި ޖުމްލަ 7،776 ދަރިވަރުން ބައިވެރިވެއެވެ. ތާވަލުކުރެވިފައިވާ ގޮތުން މިއަދާއި މާދަމާ ކުރިއަށްދާނީ ދިވެހި މާއްދާގެ ޕޭޕަރުތަކެވެ. އަދި މި ހިނގާ ސެޕްޓެމްބަރު މަހުގެ 22 އަދި 23 ވަނަ ދުވަހު އޮންނާނީ އިސްލާމް މާއްދާގެ ޕޭޕަރުތަކެވެ.
މިފަހަރުގެ އިމްތިހާނުގެ ސެންޓަރުތައް ބެހިފައިވާ ގޮތަށް ބަލާއިރު، ވެރިރަށް މާލޭގެ 25 ސެންޓަރެއްގައި 3،222 ދަރިވަރުން އިމްތިހާނު ހަދަމުން އެބަދެއެވެ. އަދި އަތޮޅުތެރޭގެ އެކި ރަށްރަށުގައި ގާއިމުކޮށްފައިވާ 242 ސެންޓަރެއްގައި 2،869 ދަރިވަރުން އިމްތިހާނުގައި ބައިވެރިވަމުން އަންނަ ކަމަށް އެޑިއުކޭޝަން މިނިސްޓްރީގެ ތަފާސްހިސާބުތަކުން ދައްކައެވެ.
އެސްއެސްސީ އިމްތިހާނުގެ ދިވެހި އަދި އިސްލާމް މާއްދާ ނިމުމަށް ފަހު، ކޭމްބްރިޖް އޯލެވެލް އިމްތިހާނުގެ އެހެނިހެން މާއްދާތައް މެދުކެނޑުމެއް ނެތި ކުރިއަށްދާނެއެވެ. އެޑިއުކޭޝަން މިނިސްޓްރީން ބުނެފައި ވަނީ މިއަހަރުގެ މުޅި އޯލެވެލް އިމްތިހާނު އަންނަ ނޮވެމްބަރު މަހުގެ 12 ވަނަ ދުވަހުގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ ކަމަށެވެ.
މުޅި ރާއްޖެއިން މިއަހަރުގެ އޯލެވެލް އިމްތިހާނުގައި ޖުމްލަ 8،111 ދަރިވަރުން ބައިވެރިވެެއެވެ. މި އިމްތިހާނުތައް ހުރިހާ ސެންޓަރެއްގައި ވެސް އަމާންކަމާއި އޮމާންކަމާ އެކު ކުރިއަށް ގެންދިއުމަށްޓަކައި، އިމްތިހާނު ހަދާ މަރުކަޒުތަކުގެ ސަލާމަތީ އަދި އިދާރީ ހުރިހާ އިންތިޒާމުތަކެއް ފުރިހަމަކޮށްފައިވާ ކަމަށް ކަމާބެހޭ އިދާރާތަކުން މައުލޫމާތު ދެއެވެ.