އިސްލާމްދީނުގައި ދުލުގެ ރައްކާތެރިކަމާއި ތެދުވެރި ބަސްމަގަކީ އިންސާނާގެ އީމާންކަމުގެ މައިބަދައެވެ. މުސްލިމެއްގެ އެންމެ ބޮޑު ސިފައަކީ އެމީހެއްގެ ބަހާއި ޢަމަލު ދިމާވުމާއި، ތެދުވެރިކަމާއެކު ވާހަކަދެއްކުމެވެ. ދުލުން ނުކުންނަ އެންމެ ބަހަކުން އިންސާނާގެ ދުންޔަވީ ޙަޔާތާއި އާޚިރަތުގެ ބާއްޖަވެރިކަން ކަނޑައެޅިގެންދެއެވެ. އެހެންކަމުން، ކޮންމެ ޙާލަތެއްގައިވެސް ތެދުބަހުން ވާހަކަދެއްކުމަކީ އިސްލާމީ މުޖުތަމަޢެއްގެ ބިންގަލެވެ.
ﷲ ތަޢާލާ ކީރިތި ޤުރްއާނުގެ ސޫރަތުލް އަޙްޒާބުގެ 70 ވަނަ އާޔަތުގައި ވަޙީކުރައްވާފައިވެއެވެ: ﴿يَا أَيُّهَا الَّذِينَ آمَنُوا اتَّقُوا اللَّهَ وَقُولُوا قَوْلًا سَدِيدًا﴾ (މާނައީ: "އޭ އީމާންވެއްޖެ މީސްތަކުންނޭވެ! ތިޔަބައިމީހުން ﷲ އަށް ތަޤުވާވެރިވާށެވެ! އަދި ޞައްޙަ، ތެދު ބަހުން ވާހަކަދައްކާށެވެ!"). މި އާޔަތުން އެނގޭގޮތުގައި ﷲ އަށް ބިރުވެތިވުމާއި ތެދުބަހުން ވާހަކަދެއްކުމާ ދެމެދުވަނީ ވަރަށް ބޮޑު ގުޅުމެއް އުފެދިފައެވެ.
މުފްތީ މެންކްގެ ދަރުސްތަކުގައި ފާހަގަކުރައްވާ ގޮތުގައި، ދޮގުހެދުމަކީ މީހާގެ ހިތުގެ ނޫރު ކަނޑުވާލައި، މާތް ﷲ ގެ ރަޙްމަތުން އެމީހާ މަހުރޫމްކުރުވާ ކަމެކެވެ. މުފްތީ މެންކް އިރުޝާދު ދެއްވާގޮތުގައި، އަޅުގަނޑުމެންގެ ދިރިއުޅުމުގައި ސަމާސާއަކަށް ނަމަވެސް، ނުވަތަ ކުޑަކުއްޖަކު ގާތުގައި ނަމަވެސް ދޮގުބުނުމުން ދުރުހެލިވާންޖެހެއެވެ. ތެދުވެރިކަމަކީ ހިތަށް ހަމަޖެހުމާއި، ރިޒުޤުގައި ބަރަކާތްލައްވާ ކަމެއްކަން މުފްތީ މެންކު އަބަދުވެސް ހަނދާންކޮށްދެއްވައެވެ.
ބަސްމަގުގެ ތެދުވެރިކަމުގެ ސަބަބުން މުޖުތަމަޢުގެ ތެރޭގައި އެކަކު އަނެކަކަށް އޮންނަ ޔަގީންކަމާއި އިތުބާރު ބޮޑުވެގެންދެއެވެ. ވިޔަފާރީގައްޔާއި، އާއިލީ ގުޅުންތަކުގައި އަދި އެކުވެރިންގެ މެދުގައި ތެދުވެރިކަން އިސްކުރުމަކީ މުޅި މުޖުތަމަޢު ފަސާދައިން ރައްކާތެރިކޮށްދޭ ކަމެކެވެ. ދޮގުބުނުމަކީ ނިފާޤުކަމުގެ ސިފައެއް ކަމުގައިވާތީ، ތެދުވެރިއަކަށްވުމީ ނަފްސު ޠާހިރުކުރުމަށް އޮތް އެންމެ ކުރު މަގެވެ.
ދުލުގެ ތެދުވެރިކަމަކީ ހަމައެކަނި އަޚްލާޤީ ސިފައެއް ނޫނެވެ. އެއީ އީމާންކަމުގެ އަސާސެކެވެ. އަޅުގަނޑުމެންގެ ދުލުން ބުނާ ކޮންމެ ބަހަކީ ﷲ ސުބްޙާނަހޫ ވަތަޢާލާ އައްސަވާވޮޑިގެންވާ ބަހެއްކަން ދަނެ، ކޮންމެ ފަދަ ޙާލަތެއްގައިވެސް ތެދުބަހުން ވާހަކަދެއްކުމުގެ ހެޔޮ ތައުފީޤު އަޅުގަނޑުމެން އެންމެންނަށް މިންވަރުކުރައްވާށިއެވެ. އާމީން.
ހަވާލާ: މުފްތީ މެންކުގެ ދަރުހަކުން 2025.