މިއީ ދިވެހި ރާއްޖޭގައި ހިނގައިދިޔަ ހަގީގީ ހާދިސާއެކެވެ. މިވާހަކަ ހިއްސާކޮށް މި ލެވެނީ މި ވާހަކަ ރައްދުވާ ފަރާތުގެ އިޒުނައާއި އެކުގައެވެ.

އުމުރުން ގާތްގަނޑަކަށް 22 އަހަރުގެ ޒުވާނެކެވެ. އޭނާ ކޯހެއް ހެދުމަށްޓަކައި އުޅެމުން އަންނަނީ މާލޭގައެވެ. އެއްދުވަހުގެ ހެނދުނު 10 ޖަހާލާކަން ހާއިރު އޭނާގެ ފޯނަށް ފޯނެއް އައެވެ. ގުޅީ އޭނާގެ ބޮޑުބޭބެގެ ދަރިއެކެވެ. ހަމަ އެދުވަހުގެ 12 ޖަހާއިރު ފުރާ ކަނޑު ބޯޓަކަށް އެއްޗެއް ގަނެފާ އެރުވުމަށް އެމީހަކު އޭނާގެ ގާތުގައި އެދުނެވެ. އޭނާ އެކަމަށް އެއްބަސްވިއެވެ. ބޯޓު ފުރުމަށް ބާކީ އޮތީ 2 ގަޑިއިރެވެ. 

ނަސީބު ކަންދިމާކުރިގޮތުން އޭނާއަށް ވެސް އެވަގުތު ހުރެވުނީ ބަނދަރުމަތީގައެވެ. ނަމަވެސް އޭނާގެ އަތުގައި އެ ބުނި އެއްޗެއް ގަންނާނޭ ފައިސާގެ ނޫޓު ހުރިކަން ނުވަތަ ނެތްކަން އޭނާ ވިސްނައެއްނުލައެވެ. އަވަސް އަވަސް އަރުވާލައިފައި އޭނާ ދިޔައީ އެސަރަހައްދުގައި އެ އެއްޗެހި ވިއްކަން ހުރި ފިހާރައަކަށެވެ. ބޭނުންވާ އަދަދު ބުނުމުން ސޭޓު އަގު ކިޔައިފިއެވެ. އެއީ 400 ރުފިޔާއެވެ. އޭނާ ވޮލެޓު ނަގާ ބަލައިލި އިރު އޭނާގެ އަތުގައި އޮތީ 275 ރުފިޔާއެވެ. އޭތި ގަނެވޭކަން ނެތެވެ. 1000 ރުފިޔާއަށްވުރެ ކުޑަ ވިޔަފާރިއެއް ކަމުން ޓްރާންސްފާ ބަލައެއްވެސް ނުގަތެވެ.

އޭނާ ދެން އަވަސްވެގަތީ އެންމެ ކައިރީގައި ހުރި އޭޓީއެމްއަށް ދާށެވެ. ކަސްޓަމް އިމާރާތުގެ ހުޅަނގަށް ހުރި އޭޓީއެމް ތަކުން އޭޓީއެމްއަކަށް ވަދެ ކާޑު ޖަހާ ފައިސާ ނަގަން ބަލައިލި އިރު ކާޑުގެ މުއްދަތު އޮތީ ހަމަވެފައެވެ. އެއީ އޭގެ ދެތިން ހަފްތާ ކުރިން ވީ ކަމެކެވެ. ނަމަވެސް އުޅެން ޖެހުނު ގޮތުން އޭނާ އެކަން ހަނދާން ނެތުނީއެވެ. ފައިސާ ނެގޭނޭ ގޮތެއްވެސް އަމުދުން ނެތުނީއެވެ.

އޭނާ އުންމީދު ކަނޑައެއް ނުލައެވެ. ކުޑަކޮށް ދުރަށް ޖެހިލުމަށްފަހު އޭޓީއެމް ގެ ހިދުމަތް ހޯދަން އައިސް ހުރި އެހެންމީހެއް ކައިރި އޭނާ އެހީއަކަށް އެދުނެވެ. އޭނާގެ ކާޑު މުއްދަތުވެފައި ހުރުމުން، އެމީހެއްގެ އެކައުންޓަށް ފައިސާ ފޮނުވައިދިނުމުން އެ ފައިސާކޮޅު ނަގައި ދެވޭނެތޯ އެހިއެވެ. އެމީހަކު އޭނާ އާއި ދެތިން ސުވާލު ކުރުމަށްފަހު އެކަން ކޮށްދިނުމަށް އެއްބަސްވިއެވެ.

އޭނާ އެދުނީ 400 ރުފިޔާ ނަގައިދިނުމަށެވެ. އެހެން އެމީހަކު 400 ރުފިޔާ ނެގިއެވެ. ނަަމަވެސް އެމީހަކަށް ލިބުނު ސްލިޕްކޮޅުގައި އޮތީ 410 ރުފިޔާއެވެ. އޭނާ އެއީ ތިބާއަށްދިން ހަދިޔާއެއް ކަމަށް ބުނެ ހިނިތުންވެލިއެވެ. އެމީހެއްގެ މޫނުމަތިންވެސް ފެނުނީ ހައިރާންކަމާއެކު ހިނިތުންވި މަންޒަރެވެ.

ފައިސާކޮޅު ލިބުމާއިއެކު، އޭނަ އަވަސްވެ ގަތީ އެ އެއްޗެއް ގަންނާށެވެ. އޭތި ގަތުމަށްފަހު ބޯޓަށް އެރުވުނުއިރު 30 11 ވެދާނެއެވެ. ނިއްކުރިމަތިން ހިލިފައިހުރި ދާތައް ފޮހެލުމަށްފަހު ފޯނު ނަގާ އެތަކެތި ގަތުމަށް އެދުނު މީހާއަށް ގުޅާ، ބޯޓަށް އެރުވި ވާހަކަ އާއި އަގަކީ 400 ރުފިޔާ ކަމަށް ބުންޏެވެ. އެމީހަކު އޯކޭ ކަމަށާއި އެކައުންޓަށް ޖަމާކޮށްލަނީ ކަމަށް ބުންޏެވެ.

އޭނާ ގެއަށް އައިސް ފޯނު ބަލައިލި އިރު ވައިބާރ ގައި ސްލިޕް ކޮޅެއްގެ ފޮޓޯ އެބައިނެވެ. އެއީ އެމީހަކު އޭނާއަށް ފޮނުވި ސްލިޕްކޮޅެވެ. އޭގައި އިނީ 500 ރުފިޔާ ޖަމާ ކޮށްދީފައެވެ. އަދި އޭގެ ތަފްސީލުގައި 100 ރުފިޔާ އެއީ ތިބާ ސައިބޯލަން ދިން އެއްޗެއްކަމަށް ލިޔެފައި އޮތެވެ.

އޭނާގެ މޫނު މަތިން އާދަޔާހިލާފު ހިނިތުންވުނެއް ފާޅުވިއެވެ. އޭނާ ގަބޫލު ކުރީ މިއީ އޭނާ ހޭދަކުރި 10 ގެ ބަދަލު ކަމަށެވެ.