ޗެސްގެ ދުނިޔޭގައި އުމުރުން އެންމެ 11 އަހަރުގައި "ވުމަން ގްރޭންޑްމާސްޓާ" (ޑަބްލިއުޖީއެމް) ޓައިޓަލް ހާސިލުކޮށް، އެ ޝަރަފު ހޯދި ތާރީހުގައި ވެސް އެންމެ ހަގު ކުޅުންތެރިޔާގެ ރެކޯޑު އިނގިރޭސިވިލާތުގެ ބޮދާނާ ސިވަނަންދަން ގާއިމުކޮށްފިއެވެ.
އުޒްބެކިސްތާނުގެ ސަމަރްގަންދުގައި ކުރިއަށްދިޔަ ޗެސް އޮލިމްޕިއާޑުގައި އިންގްލެންޑް ތަމްސީލުކުރަމުން ދިޔަ ބޮދާނާ މި ތާރީހީ ކާމިޔާބީ ހާސިލުކުރީ، އެ ޓައިޓަލް ކަށަވަރުކުރުމަށް ބޭނުންވާ ތިންވަނަ އަދި އެންމެ ފަހު ޑަބްލިއުޖީއެމް ނޯމް ހަމަކޮށްގެންނެވެ. މި ޝަރަފު ލިބުމުގެ ކުރިން ވެސް އޭނާ ވަނީ މި ޓައިޓަލްއަށް ބޭނުންވާ 2،300 ރޭޓިން މާކް ފަހަނައަޅައި ގޮސްފައެވެ.
އިނގިރޭސިވިލާތުގެ ވެރިރަށް ލަންޑަންގެ އުތުރު ހުޅަނގު ސަރަހައްދަށް ނިސްބަތްވާ މި ސްކޫލް ދަރިވަރު އަންނަނީ ދުނިޔޭގެ ފެންވަރުގެ ވާދަވެރި މުބާރާތްތަކުގައި ހައިރާންކުރުވަނިވި ކުޅުމެއް ދައްކަމުންނެވެ. ވުމަން ގްރޭންޑްމާސްޓާ ޓައިޓަލްގެ އިތުރުން، އޭނާ މިހާރު ވެސް ވަނީ ފިރިހެނުންނާއި އަންހެނުން އެކުވެގެން ވާދަކުރާ މަތީ ފަންތީގެ "އިންޓަނޭޝަނަލް މާސްޓާ" (އައިއެމް) ގެ ދެ ނޯމް ވެސް ކާމިޔާބުކަމާއެކު ހާސިލުކޮށްފައެވެ.
ޗެސްގެ ދާއިރާގެ މާހިރުން ފާހަގަކުރާ ގޮތުގައި ބޮދާނާ ދައްކަމުންދާ އާދަޔާ ހިލާފު ހުނަރުވެރިކަމަކީ، ޗެސްގެ އެންމެ މަތީ ޝަރަފު ކަމަށްވާ "ގްރޭންޑްމާސްޓާ" (ޖީއެމް) ޓައިޓަލް ހޯދުމުގެ މަގުގައި އޭނާ ކުރިއަށް އަޅާ ވަރަށް މުހިންމު ފިޔަވަޅެކެވެ.
އުމުރުން އެންމެ 11 އަހަރުގައި ބޮދާނާ ހޯދި މި ތާރީހީ ކާމިޔާބީއާ ގުޅިގެން އިނގިރޭސިވިލާތުގެ އިތުރުން ބައިނަލްއަގުވާމީ ޗެސް ފެޑެރޭޝަނާއި، ދުނިޔޭގެ މަޝްހޫރު ގްރޭންޑްމާސްޓަރުން އަންނަނީ އޭނާއަށް ތައުރީފުކޮށް މަރުހަބާ ކިޔަމުންނެވެ.