ކައްޗަށް އެޅިއްޖެ ބިންގަލެއް، ކެއްޗާކަމަޔަށް ނެގިޔަސް އޮންނާނީ ކައްޗަށެވެ. މިއީ ދިވެހި އަދަބީ ބަސްތަކުންކުރެ ހަރު ބަހެކެވެ.

މި ބަހުގެ ބަހަވީ މާނައަށް ބަލައިލާނަމަ، މި ބަހުގައި އެ ބުނެވެނީ އިމާރާތެއް ނުވަތަ ފާރެއް ބިނާކުރުމުގައި އެންމެ ފުރަތަމަ އަޅާ އެއްޗަކީ ބިންގާ ކަމުގައި ވީ ހިނދު، އެ ބިންގާ ކަތިކޮށް އެޅިއްޖެނަމަ، އެ އިމާރާތެއް ނުވަތަ ފާރެއް، ކެއްޗާ (އުޑުމަތިން ފެންނަން ހުންނަ ތަރިބޮޑިއެއް) ހަމައަށް އުފުލިޔަސް ނުވަތަ ނެގިޔަސް ހުންނާނީ ކަތިކޮށް ކަމަށެވެ. ނަމަވެސް މި ބަސް ހަގީގަތުގައި ރައްދު ކުރެވެނީ އިމާރާތަކަށް ނުވަތަ ފާރަކަށް ނޫނެވެ.

މިބަހުގެ ހަގީގީ މާނައަށް ބަލައިލާނަމަ، މި ބުނެވެނީ އިންސާނުން ކުރާ ކަމެއް، ކޮންމެ ކަމެއް ކަމުގައި ވީނަމަވެސް، އެކަމެއް ނުބައިކޮށް ނުވަތަ ގޯސްކޮށް ފެށިއްޖެ ނަމަ ނުވަތަ ފަށައިފި ނަމަ، އެކަމެއް ކިތަންމެ ގިނަ ދުވަހަކަށް ދެމިގެން ދިޔަސް، ނުވަތަ އެކަމެއް ކިތަންމެ ފުޅާވިޔަސް، އެކަމެއް ރަނގަޅު ވާނޭ ގޮތީ ނެތް ގޮތެއް ކަމެވެ. ދަރިން ތަރުބިއްޔަތު ކުރުމާއި ވިއްދައިގެން މި ބަސް ބޭނުން ކޮށް އުޅެއެވެ.

މިސާލަކަށް މީހެއްގެ ދަރިއަކަށް ރަނަގަޅު ތަރުބިއްޔަތެއް ނުދެވުމުގެ ސަބަބުން އެ ކުއްޖާ މަގު ގެއްލިގެން ދިއުމުން، އެ ކުއްޖާގެ މައިންބަފައިންނާއި ދިމާލަށް، ކައްޗަށް އެޅިއްޖެ ބިންގާ ކެއްޗާ ހަމައަށް ނެގިޔަސް ހުންނާނީ ކައްޗަށޭ ބުނެއުޅެއެވެ.