ޖަރުމަނުވިލާތުގެ ޔުނިވަސިޓީ އޮފް ކޯލޯންއިން ކުރި އާ ދިރާސާއަކުން ދައްކާގޮތުގައި، ހަށިގަނޑަށް ބޭނުންވާ އެސެންޝަލް އެމީނޯ އެސިޑެއް ކަމަށްވާ 'ލޫސީން' އަކީ ހަމައެކަނި މަސްތައް އާލާކޮށް ވަރުގަދަކޮށްދޭ މާއްދާއެއް ނޫނެވެ. މި މާއްދާއަކީ އިންސާނާގެ ހަށިގަނޑުގެ ސެލްތަކުގައި ހަކަތަ އުފެއްދުމުގެ ނިޒާމު އިތުރަށް ހަލުވިކޮށް، ސެލްތަކުގެ މަސައްކަތްތައް ހަރުދަނާކޮށްދިނުމުގައި އެންމެ މުހިންމު ދައުރެއް އަދާކުރާ އެއް މާއްދާއެވެ.
މި ދިރާސާއިން ހާމަވިގޮތުގައި ލޫސީން ސެލްތަކަށް ހަކަތަ ފޯރުކޮށްދެނީ، ސެލްތަކުގެ "ޕަވަރހައުސް" ކަމަށްވާ މައިޓޯކޮންޑްރިއާ ގައި ހުންނަ މުހިންމު ޕްރޮޓީންތައް ހަލާކުވިޔަނުދީ ރައްކާތެރިކޮށްދީގެންނެވެ. މައިޓޯކޮންޑްރިއާގެ މަސައްކަތްތައް ހަލާކުނުވެ ހުރުމަކީ ސެލްތަކުން އެކަށީގެންވާ މިންވަރަށް ހަކަތަ އުފެއްދުމަށް ކޮންމެހެން ބޭނުންތެރި ކަމެކެވެ. މިއީ ކޭންސަރާއި މެޓަބޮލިކް ބަލިތަކަށް އާ ފަރުވާތައް ހޯދުމަށް ލިބުނު ބޮޑު ކުރިއެރުމެކެވެ.
ލޫސީންއަކީ ހަށިގަނޑަށް އަމިއްލައަށް އުފެއްދޭ މާއްދާއަކަށް ނުވާތީ، މިއީ ކާނާގެ ތެރެއިން ހަށިގަނޑަށް ހޯދަންޖެހޭ މާއްދާއެކެވެ. މި މާއްދާ އެންމެ ގިނައިން ލިބެނީ ޕްރޮޓީން ގިނަ ކާނާގެ ބާވަތްތަކުންނެވެ. އެގޮތުން ކުކުޅުމަސް، ގެރިމަސް، މަހުގެ ބާވަތްތައް، ބިސް، އަދި ކިރާއި ޗީޒް ފަދަ ޑެއިރީ އުފެއްދުންތަކުން މިއީ ވަރަށް މަތީ މިންވަރަކަށް ލިބޭ މާއްދާއެކެވެ.
ގަސްގަހާގެހިން ލިބޭ ކާނާގެ ބާވަތްތަކަށް ބަލާއިރު، މުގުގެ ބާވަތްތައް، ކައްޓަލަ، ލެންޓިލްސް، އަދި ޕަންޕްކިން ސީޑްސް އާއި ބަދަމުގެ ބާވަތްތަކުންވެސް އެކަށީގެންވާ މިންވަރަކަށް ލޫސީން ލިބެއެވެ. މިއީ ކާނާއާއި ހަށިގަނޑުގެ މެޓަބޮލިޒަމްއާ ދެމެދު އޮތް ގުޅުން އިތުރަށް ސާފުވެ، ރަނގަޅު ކާނާގެ މާއްދާތައް ބޭނުންކޮށްގެން ހަށިގަނޑުގެ ސެލްތަކުގެ ސިއްހަތު ރަނގަޅުކުރުމަށް މަގުފަހިވެގެންދިޔަ މުހިންމު ހޯދުމެކެވެ.
ހަވާލާ: ސައިންސް ޑެއިލީ 2026.