ލަންޑަންގެ ކުއީން މޭރީ ޔުނިވަސިޓީގެ ސައިންސްވެރިން ކުރި އާ ދިރާސާއަކުން ދައްކާ ގޮތުގައި، ގިނަ ދުވަސްތަކެއް ވަންދެން ކެއިންބުއިމާ ދުރުގައި ހުރުމުން އިންސާނާގެ މުޅި ހަށިގަނޑަށް ބޮޑެތި ބަދަލުތަކެއް އާދެއެވެ. ސައިންސްވެރިން ހަތް ދުވަހުގެ މުއްދަތަކަށް ރޯދައަށް ތިބި މީހުންގެ ހަށިގަނޑަށް އައި ބަދަލުތައް ދިރާސާކުރިއިރު، ހަށިގަނޑުގެ ގުނަވަންތަކަށް ސިއްހީ ގޮތުން މުހިންމު ބަދަލުތަކެއް އަންނަކަން ވަނީ ފާހަގަކުރެވިފައެވެ.
މި ދިރާސާއިން އެންމެ ފާހަގަކޮށްލެވުނު އެއް ކަމަކީ، ރޯދައަށް ހުންނަތާ ފުރަތަމަ ތިން ދުވަސް ފަހުން ހަށިގަނޑުގައި ހިނގަންފަށާ މުހިންމު ބަދަލުތަކެވެ. ކާނާ ނުލިބި ތިން ދުވަސް ހޭދަވުމަށްފަހު، ހަށިގަނޑުގެ ޕްރޮޓީންތަކުގެ މިންވަރަށް ބޮޑެތި ބަދަލުތަކެއް އައިސް، ވަކި ގުނަވަންތަކަކަށް ބޭނުންވާ ރައްކާތެރިކަން އިތުރުވެގެންދާކަން ސައިންސްވެރިންނަށް ކަށަވަރުކުރެވުނެވެ.
މި ބަދަލުތަކަކީ ހަމައެކަނި ބަރުދަން ލުއިވުމާ ގުޅިފައިވާ ބަދަލުތަކެއް ނޫނެވެ. ދިރާސާވެރިން ބުނާ ގޮތުގައި، ގިނަ ދުވަހު ރޯދައަށް ހުރުމުން ހަށިގަނޑުގެ ސެލްތަކަށް އަދި މުޅި ނިޒާމަށް ލިބޭ ފައިދާތަކަކީ ބަރުދަން ލުއިވުމަށްވުރެ މާ ބޮޑެތި، ސިއްހަތަށް ފައިދާހުރި ކަންތައްތަކެކެވެ.
މި ހޯދުމުގެ ސަބަބުން ކުރިއަށް އޮތް ތަނުގައި ސިއްހީ ދާއިރާއަށް ބޮޑެތި ކުރިއެރުންތަކެއް ލިބިގެންދާނެ ކަމަށް ބެލެވެއެވެ. ސައިންސްވެރިން އުއްމީދުކުރަނީ މި ދިރާސާގެ އަލީގައި، ރޯދައަށް ހުރުމުން ހަށިގަނޑަށް ކުރާ ފައިދާތައް ލިބިދޭފަދަ އާ ބޭސްތަކާއި ފަރުވާތައް އީޖާދުކުރެވިގެންދާނެ ކަމަށެވެ.
ހަވާލާ: ސައިންސް ޑެއިލީ 2026.