މިއަހަރުގެ އިންޓަނޭޝަނަލް ކަސްޓަމާ ސާވިސް ހަފުތާ ފާހަގަކުރުމުގެ ގޮތުން، އުރީދޫން އެ ކުންފުނީގެ ކްލަބް ޕްރިމިއާ ޕާޓްނަރެއް ކަމަށްވާ ހީޕް ކެފޭއާ ގުޅިގެން ހާއްސަ ކޮފީ ޕްރޮމޯޝަނެއް މިއަދު ފަށައިފިއެވެ. މި ހަރަކާތަކީ ކަސްޓަމަރުންގެ އަގުވަޒަންކުރުމުގެ ގޮތުން ކުރިއަށްގެންދާ ހަރަކާތެކެވެ.
މި ޕްރޮމޯޝަން ކުރިއަށްދާނީ މިއަދު ހަވީރު 4:00 އިން ފެށިގެން އިރުއޮއްސި 6:00 އާ ހަމައަށް، ހުޅުމާލޭގައި ހުންނަ އުރީދޫގެ މައި އޮފީހުގައެވެ. މި ވަގުތުތަކުގައި އުރީދޫ ހެޑްކުއާޓާޒްގައި ހުންނަ ހީޕް ކެފޭގެ ކޮފީ ކާޓުން ތިން ކޮފީ ބައްލަވައިގަންނަވާ ކޮންމެ ކަސްޓަމަރަކަށް އިތުރު ކޮފީއެއް މުޅިން ހިލޭ ލިބިގެންދާނެއެވެ.
އުރީދޫ އޮފީހުން ބުނީ މި ފުރުސަތަކީ ކަސްޓަމަރުން އެމީހުންގެ ރަހުމަތްތެރިންނާ އެކު އުފާވެރި ވަގުތުކޮޅެއް ހޭދަކޮށްލުމަށް ފަހިކޮށްދިން ރަނގަޅު ފުރުސަތެއް ކަމަށެވެ. މާލެ ސަރަހައްދުގައި ބޮޑު މަގުބޫލުކަމެއް ހޯދަމުން އަންނަ ހީޕް ކެފޭއާ އެކު ވެވުނު މި ޕާޓްނާޝިޕްގެ ސަބަބުން ކަސްޓަމަރުންނަށް ތަފާތު އަދި ހިތްގައިމު ތަޖުރިބާއެއް ލިބިގެންދާނެ ކަމަށްވެސް އެ ކުންފުނިން ފާހަގަކުރިއެވެ.
ކަސްޓަމާ ސާވިސް ހަފުތާއާ ގުޅުވައިގެން ކަސްޓަމަރުންނާ އޮންނަ ގުޅުން އިތުރަށް ބަދަހިކުރުމުގެ ގޮތުން، އުރީދޫގެ މެނޭޖިން ޑިރެކްޓަރު އަދި ސީއީއޯ ހާލިދު ހަސަން އަލް-ހަމާދީ ސޯޝަލް މީޑިއާ މެދުވެރިކޮށް އާންމުންގެ ސުވާލުތަކަށް ޖަވާބުދެއްވުމަށް ވަނީ ހަމަޖެހިފައެވެ.
މީގެއިތުރުން، ކުންފުނީގެ އިސްވެރިންނާއި މުވައްޒަފުން އެކި ސަރަހައްދުތަކުގައި ހުންނަ ކަސްޓަމާ ސާވިސް ސެންޓަރުތަކަށް ޒިޔާރަތްކޮށް، ކަސްޓަމަރުންނާ ބައްދަލުކޮށް ހިޔާލު ހޯދުމުގެ ހަރަކާތްތަކެއްވެސް ދަނީ ހިންގަމުންނެވެ. މިފަދަ ކަންކަމުގެ މައިގަނޑު މަގްސަދަކީ ކަސްޓަމަރުންނާ އޮންނަ ގުޅުން ހަރުދަނާކޮށް، ފޯރުކޮށްދޭ ހިދުމަތްތަކުގެ ފެންވަރު އިތުރަށް މަތިކުރުމެވެ.