ސިހުރު ހަދައިގެން ކޮވިޑް-19 ފެތުރުުން ކޮންޓްރޯލްކޮށް ބަލި ނައްތާލަން ހިތްވަރުދިން ސްރީލަންކާގެ ހެލްތް މިނިސްޓަރު މަގާމުން ވަކިކޮށް، އެ މަގާމަށް އެހެން ބޭފުޅަކު އައްޔަނު ކޮށްފިއެވެ.
އެ ގައުމުގެ ހެލްތް މިނިސްޓަރު ފަވިތުރާ ވަންނިއަރައްޗީ ވަކިކުރަން އެންގީ އެ ގައުމުގެ ރައީސް ރާޖަޕަކްސާއެެވެ. މިނިސްޓަރު މަގާމުން ވަކިކުރަން ރައީސް އޮފީހުން އެންގި މި ދަނޑިވަޅަކީ އެ ގައުމުގައި ހަލުވިކަމާއެކު ކޮވިޑް ފަތުރެމުންދާ ދުވަސްވަރެކެވެ. އަދި އެ ގައުމުގައި ރެކޯޑް އަދަދަކަށް މީހުން ދަނީ ކޮވިޑަށް ފައްސިވެ މަރުވަމުންނެވެ.
އެ ގައުމުގެ އައު ހެލްތް މިނިސްޓަރަކަށް އައްޔަންކޮށްފައި ވަނީ، އެގައުމުގެ މީޑިއާ މިނިސްޓަރު އަދި ސަރުކާރުގެ ތަރުޖަމާން ކެހެލިޔާ ރަމްބުކްވެލިއާއެވެ.
ފަވިތުރާ އަކީ އާއްމުން ކުރިމަތީގައި، ސިހުރު ހަދައިގެން ކޮވިޑް ނައްތާލަން ހިތްވަރުދީ ވާހަކަދެއްކި ބޭފުޅެކެވެ. އެގޮތުން އޭނާ ވަނީ، "ބެލްސްޑް ވޯޓާ" ކޯރަށް އެޅުމުން ޕެންޑެމިކް ދަށަށްދާނެ ކަަމަށް ބުނި ފާދިރީއެއްގެ ބަހަށް ހެއްލި އެކަން ކޮށްފައެވެ. އޭނާ އެކަން ކުރާ މަންޒަރު ފެންނަ ވީޑިއޯއެއް މީސް މީޑިއާގައި ދައުރުވެފައިވެސް ވިއެވެ.
ލަންކާގައި ކޮވިޑް ކޮންޓްރޯލް ނުވެ ހަލުވިކަމާއެކު ފެތުރެމުންދާތީ، އެ މިނިސްޓްރީއަށް ގިނަބައެއްގެ ފާޑުކިޔުންތައް ދަނީ އަމާޒުވަމުންނެވެ.
ރިޕޯޓްތައް ބުނާގޮތުގައި، އޭނާގެ ހެލްތް މިނިސްޓަރުކަމުން ވަކި ކުރިކަމުގައިވިޔަސް، އޭނާ ކެބިނެޓްގައި ހިމެނިވަޑައިގަންނަވާނެއެވެ. އެގޮތުން އޭނާއާ ހަވާލުކުރާނެ މިނިސްޓްރީއަކީ ޓްރާންސްޕޯޓް މިނިސްޓްރީކަމަށް ރައީސް އޮފީހުން އަންގާފައިވާ ކަމަށް އެގައުމުގެ ރިޕޯޓްތައް ބުނެއެވެ.
ލަންކާގައި އެއް ދުވަސް ތެރޭގައި ފައްސިވާ އަދަދުތައް 3000 އިން މައްޗަށްވެސް އެރިއިރު، އެ ގައުމުގައި ސިއްހީ ދާއިރާއަށް ނުކަތާ ވަރަށް ކޮވިޑު ޖެހޭ މީހުން އިތުރުވެ، ބިރުވެރިކަން ވަނީ އިންތިހާއަށް ބޮޑުވެފަައެވެ.