ދިވެހި ފިލްމީ ދާއިރާގައި ކުރިން އެންމެ މަޝްހޫރު އެއް ތަރި ކަމަށްވާ ރީކޯ މޫސަ މަނިކު 25 އަހަރަށް ފަހު އަލުން ފިލްމެއްގެ ލީޑު ރޯލަކުން ފެންނަން ނިންމުމާ އެކު، ސަޕޯޓަރުންގެ މެދުގައި ބޮޑު ބަހުސެއް ފެށިއްޖެ އެވެ. އޮކްޓޯބަރު 11 ވަނަ ދުވަހު އިއުލާނުކުރި މި ހަބަރާއެކު، ގިނަ ބަޔަކު އަންނަނީ މިއީ ތެދެއްތޯ ސުވާލު އުފައްދަމުންނެވެ.
މޫސަ އެނބުރި އަންނަ ފިލްމަކީ މަޝްހޫރު ޑައިރެކްޓަރު އީސާ ޝަރީފު ޑައިރެކްޓުކުރާ "ކީއްވެ" ކިޔާ ފިލްމެކެވެ. މިއީ މޫސަގެ އެންމެ ކާމިޔާބު އެއް ފިލްމު ކަމަށްވާ "ފަތިސް ހަނދުވަރު" ވެސް ޑައިރެކްޓުކުރި ފަރާތެވެ. މި ފިލްމުގައި މޫސައާ އެކު ލީޑު ރޯލުން ފެނިގެންދާނީ ކުޅަދާނަ ބަތަލާ ޝީލާ ނަޖީބެވެ.
ނުވަދިހައިގެ އަހަރުތަކާއި ދެހާހުގެ ކުރީކޮޅު ދިވެހި ސިނަމާގައި ރަސްކަންކުރި މޫސަ ވަނީ ގިނަ ކާމިޔާބު ފިލްމުތަކެއް ކުޅެފަ އެވެ. އޭގެ ތެރޭގައި ހައްގު، ނާއުއްމީދު، ގިނިހިލަ، ދެރިޔާ އަދި ދަންމަޅި ފަދަ ފިލްމުތައް ހިމެނެ އެވެ. އަދި ދާދި ފަހުން 2024 ވަނަ އަހަރު ނެރުނު ފިލްމު "ލަސްވިޔަސް" ގައި އޭނާ ވަނީ ހާއްސަ ފެނިލުމަކުން ވެސް ފެނިފަ އެވެ.
މޫސަގެ މި ކުއްލި ނިންމުމާ ގުޅިގެން ސޯޝަލް މީޑިއާގައި ސަޕޯޓަރުން އަންނަނީ އެކި ގޮތްގޮތަށް ޝުއޫރު ފާޅުކުރަމުންނެވެ. މިކަމާ ގުޅޭގޮތުން ހިޔާލުފާޅުކުރި މީހަކު ބުނީ "މިއީ ދިވެހި ފިލްމީ ދާއިރާއަށް އަނެއްކާވެސް ދިރުން ލިބިގެންދާނެ ކަމެއް،" ކަމަށެވެ. ނަމަވެސް އަނެއް ބަޔަކު އަންނަނީ ގިނަ ދުވަސްތަކަކަށް ފަހު ލީޑު ރޯލަށް އައުމުން ފިލްމަށް ލިބޭނެ ތަރުހީބާ މެދު ސުވާލު އުފައްދަމުންނެވެ.
ސަޕޯޓަރުންގެ މެދުގައި ހިޔާލު ތަފާތުވުންތަކެއް ހުރި ނަމަވެސް، ގިނަ ބަޔަކު ތިބީ ފަތިސް ހަނދުވަރުގެ "ޖިނާ" އަލުން ސްކްރީނަށް އަންނާނެ ދުވަހެއްގެ އިންތިޒާރުގަ އެވެ. ސަޕޯޓަރުން ގަބޫލުކުރާ ގޮތުގައި އީސާ ޝަރީފާއި މޫސަގެ އެކުވުމަކީ އަބަދުވެސް ކާމިޔާބު ނަތީޖާއެއް ނެރެދޭނެ ކަމެކެވެ.