ދިވެހިރާއްޖޭގެ ސަރަހައްދުގެ އެއްވެސް ބައެއް އަސްކަރީ ގޮތުން ނުވަތަ އެނޫންވެސް ގޮތަކުން ބެލެހެއްޓުމަށް ބޭރުގެ އެއްވެސް ފަރާތަކަށް ދިވެހި ސަރުކާރުން ފުރުސަތު ނުދޭނެ ކަމަށް ސަރުކާރުން ހާމަކޮށްފިއެވެ. ސަރުކާރުން ބުނީ ރާއްޖޭގެ ސަރަހައްދާއި ދައުލަތުގެ ސިޔާދަތަކީ ގައުމުގެ މިނިވަންކަން ބަރޯސާވާ، ބަދަލުނުކުރެވޭނެ ހައްގެއް ކަމަށެވެ.
ރާއްޖޭގެ ސަރަހައްދުގައި ހިމެނޭ އިންޓަނޭޝަނަލް ވިޔަފާރީގެ ކަނޑުއޮޅިތަކާއި ހާއްސަ އިގްތިސާދީ ސަރަހައްދު ބެލެހެއްޓުމުގެ ފުރިހަމަ ބާރާއި ޒިންމާއަކީ ގާނޫނުއަސާސީން ދައުލަތާ ހަވާލުކޮށްފައިވާ ޒިންމާއެއް ކަމަށް ސަރުކާރުން ފާހަގަކުރިއެވެ. އަދި މި ހުދޫދުގެ ތެރެއިން މިނިވަންކަމާއި ސިޔާދަތު ރައްކާތެރިކުރުމަކީ ދިވެހިން އަބަދުވެސް ވަރަށް ފަހުރުވެރިކަމާ އެކު ކުރަމުން އަންނަ ކަމެއް ކަމަށް ވެސް ބުންޏެވެ.
ޖޯގުރަފީ ގޮތުން ރާއްޖެ އޮތް ސަރަހައްދަކީ ދުނިޔޭގެ ތެލުގެ ވިޔަފާރި އާއި އާންމު ވިޔަފާރީގެ ވަރަށް ބޮޑު ޕަސަންޓެއް އެއް ބައްރުން އަނެއް ބައްރަށް ދަތުރުކުރާ މުހިންމު މަގެކެވެ. މި ސަރަހައްދު އަމާންކަމާ އެކު ބޭނުންކުރުމުގެ ފުރުސަތު ފަހިކޮށްދިނުމަކީ މުޅި ދުނިޔެ އާއި މި ސަރަހައްދުގެ ހަމަޖެހުމަށް ރާއްޖެއިން ޒަމާނުއްސުރެ ކޮށްދޭ އަގުހުރި ހިދުމަތެއް ކަމަށް ސަރުކާރުން ބުންޏެވެ.
ސަރުކާރުން ބުނީ "ދިވެހިރާއްޖޭގެ ސަރަހައްދުގެ އެއްވެސް ބައެއް، އެއްވެސް ހާލެއްގައި، ބޭރުގެ އަސްކަރީ ނުވަތަ އެނޫންވެސް ބެލެހެއްޓުމުގެ ބާރަކަށް ދިވެހި ސަރުކާރުން ނުދޭނެ" ކަމަށެވެ. އަދި ރާއްޖޭގެ އެއްވެސް ސަރަހައްދެއް ބޭރުގެ ފަރާތަކާ ހަވާލުކުރުމަކީ މިނިވަންކަމަށާއި ސަރަހައްދުގެ ސަލާމަތަށް ވެސް ނޭދެވޭ އަސަރުކުރާނެ ކަމެއް ކަމަށް ބުންޏެވެ.
މީގެ އިތުރުން، މިނޫން ގޮތަކަށް މޭރުންވެދާނެ ފަދަޔަކުން ބޭރުގެ ނުފޫޒަކަށް، ސީދާ ނުވަތަ ނުސީދާ ގޮތުން ވިޔަސް އެއްވެސް ފަރާތަކުން ދައުވަތު ނުދިނުމަށް ވެސް ސަރުކާރުން ވަނީ އިލްތިމާސްކޮށްފައެވެ.